Nehemías 1 - Qheshwa Biblia DC

Nehemiasqa Diosmanta nacionnimpaj mañakun

^1-2 Kaykunamin kanku Hacaliaspa wawan Nehemiaspa ruwasqasnenqa. Rey Artajerjes jina iskay watastaña kamachisqanmanta, Quisleu kaj killapi, noqa Nehemías Susa llajtapi kashajtiy hermanoy Anani jamorqa Judamanta uj mashkha runas jamojkunawan khuska. Chaypacha tapurerqani Jerusalenmanta, jinataj judiosmanta, pischus llusp'isqanku jallp'ankumanta wijch'usqas kaymanta.

³ Niwarqankutaj: Wijch'usqa kaymanta ayqerqanku chaykunaqa qhepakorqanku chay provincia llajtapi. Paykunaqa may llakiypi may p'enqaypitaj kashanku. Jerusalén llajtaj perqasnin pampachasqas kashanku, punkusnintaj ninawan q'olasqas kashanku, nispa.

⁴ Chayta willawajtinkukamataj waqaj tiyaykukorqani. Uj mashkha diasta jina sinch'i llakisqa karqani, ayunaspa, janaj pacha Diosmanta mañaspataj.

⁵ Nerqanitaj: Señor, janaj pachapi kaj Diosníy, qanqa jatun Dios atiyniyoj manchachikunataj kanki. Qanqa trato ruwasqaykitaqa sumajta jallch'anki. Jinataj munakusojkunatapis, kamachiykita junt'ajkunatapis mana jayk'aj saqenkichu.

⁶ Kunanqa mañayki uyarinawaykita kay tuta p'unchay kay mañakamususqayta, kamachisniyki israelitasmanta khuyakunaykita. Yachakuyku noqayku israelitasqa contraykipi juchallisqaykuta. Ayllusniypis, noqa kikiypis juchallillaykutaj.

⁷ Imatachus may sinch'i millaytapuni ñaupaqeykipi puriyku. Imatachus mana kamachiykunasniykita, nitaj leykunasniykita kamachiyki Moisesnejta imatachus niwasqasniykuta ima mana junt'aykuchu.

⁸ Yuyarikuy, kamachiyki Moisesnejta k'amiwasqaykuta, juchallikojtiykoqa kay pachanejpi tukuynejman qan ch'eqerachinawaykuta.

⁹ Sitajchus qanman kutirikamuspa kamachiykunasniykita junt'aykuman, nisqasniykitataj ruwaykuman chayqa, kay pachaj k'uchusninmampis ch'eqerasqas kaykuman chaypis, qan chaykunamanta kutichimuspa, maypichus sutiyki jatunchasqa kanampaj ajllakorqanki chay cheqaman watejmanta tantaykunawaykuta.

¹⁰ Noqayku qampa kamachisniyki ayllusniykitaj kayku, qan kacharichikuwarqayku jatun atiyniykiwan, kallpaykiwantaj.

¹¹ Mañarikuyki ari Señorníy, mañakususqayta uyarinawaykita, kamachisniyki qhaparikamususqaykutapis, paykunaj k'ata munayninkoqa qampa sutiykita jatunchaylla. Mañakullaykita tukuy imapi allin rinawanta, jinallataj reypa khuyakuyninta tarinayta, nispa. Noqaqa Artajerjespa ujyanasninta wakichejnin karqani.