Nahúm 3 - Qheshwa Biblia DC

¹ Ay qanmanta, yawar jich'ayman qosqa llajta! Llullakuywan, ñak'arichinakuywantaj junt'a kanki, suwakuyniykeqa mana tukukuyniyoj.

² Seq'oykunaj siuj siuj niynin! Ruedaspa ch'ajwaynin! Caballospa correkachasqanku, carrospa phinkiyakachasqanku!

³ Caballospi runas junt'aykunku! t'ojsinasninkoj k'anchaynin, lanzasninkoj liuj liuj niynin! Waranqas parte wañusqas Qollu qollustaj ayasmantapis! Wañusqas mana tukukuyniyoj! Runaspis chay wañusqaspi misk'akunku!

⁴ Tukuy chaykunaqa qhencha warmej qhenchachakusqanrayku. Chay qhencha warmeqa manchay k'achita may yachayniyojtaj layqeriyaspajqa Chay layqeriyasninwan hechizeriasninwantaj llajtasta, nacionestapis sonqonkuta suwaspa ch'aukiyasharqa.

⁵ Tukuy Atiyniyoj Señor nillantaj: Qhaway, noqa contraykipi kashani: P'achaykita uyaykikama q'ollurisqayki naciones q'ara ukhuykita rikunankupaj, reinospis p'enqayniykita rikunankupajtaj.

⁶ Pataykiman millay ch'ichita jich'aykamusaj; chaytaj honraykita qhechusonqa, tukuy p'enqayta qhawakunasunkupajtaj ruwasaj.

⁷ Tukuy rikusojkunaqa qanmanta ayqenqanku nispa: Niniveqa phirisqa kashan! Pitaj paymanta khuyakunmanri? Maypitaj kanman sonqochaykojri?, nispa.

⁸ Qanrí, Tebasmanta aswan sumajchu kanki, Nilo mayu patapi kashan kay llajtamanta nisqaqa? Muyuynimpi ashkha yakusniyoj jark'arichisqa kashan yakuswantaj perqasqa kashan.

⁹ Etiopía, Egipto ima sumaj pakakunasniyki karqanku. Futmanta kajkuna jinataj Libiamanta kajkunapis qanta yanapasojkuna karqanku.

¹⁰ Chaywampis jallp'asninkumanta apasqas karqanku, wawasninkurí calle esquinaspi ch'allpasqas karqanku. Allin qharisninmanqa suertesta choqarqanku, Chay kamachi runasnintaj cadenaswan ch'ipasqas karqanku.

¹¹ Qantapis machaykuchisonqanku, uma muyusqataj pakakunki enemigoykimanta ayqeyta munaspa.

¹² Tukuy jark'achakuyniyki higos sach'as jina kanku, llullu poqoyninwan junt'asqa, thalajtinkutaj urmaykun pichus mikhunayashan chaypaj siminman.

¹³ Ejercitoykeqa warmis kankuman jina kashan; nacionniykichej punkun kicharisqas kashanku, enemigosniykipaj chay llavenasninta nina q'olarparisqanrayku.

¹⁴ Wakichikuy yakuta chay kashanki chaymanta jark'akunaykipaj, jark'achasniykitataj astawan jark'aykuchiy. Yaykuy yaku t'uruman, saruytaj t'uruta.

¹⁵ Ladrillosta ruwanaykipajtaj wakichikuy espadapitaj t'ukuychakunki, jinataj langosta khuruta jina tukuchisonqa. Langostas jina mayta miraychej! Chay phawaykachaj monte khuru jinataj miraychej!

¹⁶ Chay qolqe mask'ajkunasniykeqa janaj pacha ch'askasmanta aswan ashkhaman tukorqanku. [Langostaqa waj jina colorman tukuspa phawan]

¹⁷ Jark'asoj soldadosniykeqa langostas jina kanku, soldado runasniykita jap'iramojkunapis may chhika phoqeshaj khurus jina kanku, imaynatachus chiriykamojtenqa perqa jusk'usman sat'irakunku, inti llojsimojtinkamataj llojsirapunku, nitaj pipis chantá yachanchu maymanchus risqankuta, kikillantataj paykunapis ruwanku.

¹⁸ Oh Asiriamanta rey, imaynatataj puñunku michejkunasniyki kamachejkunasniykipis samarikunku, runasniykitaj montespi ch'eqerasqas purishanku ni pitaj paykunata tantaykamoj kanchu!

¹⁹ Mana jampi kanchu chay nanasqasniykipaj. Mana jampikuyniyoj chay onqoyniykeqa! Tukuy uyarejkuna kay llakiypi rikhurisqaykimantaqa kusikuspa makisninkuta t'ajllarakunku. Pitaj chay juchasniykej mana tukukoj ñak'ariyninta mana ñak'arerqachuri?