Miqueas 5 - Qheshwa Biblia DC

Israelman Dios kamachejkunata qoponqa

¹ Chaywampis kunanqa, Jerusalén wakichikuy jark'akunaykipaj imaraykuchus muyuykusunku may sinch'itata jasut'enqanku Israelpa kurajninta.

² Qantajrí Efratamanta Belén, Judapi llajtas kajmanta aswan juch'uy kanki, qanmantamin llojsenqa Israelta kamachejqa unay aylloj mirayninmanta.

³ Señorqa kunan saqerenqa Paypata kajkunata, chay warmi pichus uj qhari wawata nacechikunan kashan chay nacekunankama. Chaypacha tantarikonqanku chay llajtankumanta wijch'usqas kashanku llajta masisnin israelitaswan.

⁴ Reyqa jatarikonqa michinampaj chay Israel ayllunta tukuy atiywan, Señor Diospa jatun kaynimpitaj, paykunataj sonqo tiyasqa kaypi tiyakonqanku, imaraykuchus Señor jatunchasqa kanqa tukuy jallp'aj cantosninkama.

⁵ Paymin sonqo tiyasqa kayta apamonqa. Maypachachus asirios jallp'anchejman junt'aykamojtinku palaciosninchejmantaj yaykuykamojtinku, chaypacha kachasunchej paykunaj contrankupi qanchis kurajkunata pusaj sumachej runastataj.

⁶ Paykuna Asiriata kamachenqanku, Nimrodpa jallp'antapis t'ojsinasninkoj puntampi apaykachanqanku, jallp'asninchejta yaykumorqanku jallp'anchejmantaj. Junt'aykamorqanku chay asiriosmantataj librawasunchej.

⁷ Chaypacha, Jacobpa ayllunmanta puchojkuna ashkha llajtaspa chaupimpi kanqanku; Señorpaj apachimusqan chhulla jina, para imaynatachus qhoras pataman urmamun mana runaj munasqanraykullachu ajinata.

⁸ Chaypacha, Jacobpa ayllunmanta puchojkunaqa ashkha llajtaspa chaupimpi kanqa; imaynatachus uj león monte uywas chaupipi karin ajinata, chantá imaynatachus uj león ovejas chaupipi rikhurispa pasaj jina t'isaspa wañurachintaj ujtapis kausashajta saqespa ajinata.

⁹ Ajinatamin qan Señor, phinkiykunki wañurachinkitaj tukuy qampa contraykipi kajkunataqa.

¹⁰ Kayta Señor nillantaj: Jaqay p'unchaykunapeqa caballosniykita wañurachisaj, guerrapaj carrosniykitapis t'unarasaj.

¹¹ Llajtasniykitapis raqaykunasman tukuchisaj, chay tukuy jark'akunasniykichejtapis urmarachisaj.

¹² Layqakunasniykitataj tukuchisaj, mana ni uj adivinoyojtataj saqesqayki.

¹³ Phirisaj chay lantisniykita, chay sumaj ruwasqa rumisniykitapis, amaña jayk'ajpis chaykunaman yupaychaj kutinaykipaj chay kikin makisniykej ruwasqan dioskunasniykiman.

¹⁴ T'irarasaj chay yupaychana sach'asniykita mana puchuyojtataj llajtasniykita t'unasaj.

¹⁵ Phiñakuyniypi, vengakusaj mana kasuyta munawarqankuchu chay nacioneswan.