Miqueas 4 - Qheshwa Biblia DC

Señorpa sonqo tiyasqa kaj reinon

¹ Jaqay qhepa kaj p'unchaykunapeqa, Señorpa yupaychana wasin maypichus qhepakun chay orqoqa churasqa qhepakonqa aswan jatun kaj orqo, tukuy orqosmanta aswan jatumpuni kanqa, tukuy llajtas kajkunataj chayman jamonqanku.

² May chhika llajtastaj jamonqanku nispa: Jamuychej, Señorpa orqonman wicharinachej, Jacobpa Diosnimpa chay yupaychana wasinman, Pay ñankunasninta rikuchinawanchejpaj, purinanchejpajtaj chay ñankunasninta, imaraykuchus Sionmanta llojsimonqa Señorpa yachachiykunasnenqa, kamachiykunasnintaj Jerusalenmanta.

³ Ashkha naciones ukhupi Señor juzganqa, may chhika llajtaspa phiñankuykunasninkutataj tukuychanqa, may karumanta kajkunajpatapis. Paykunaqa chay t'ojsinasninkutaqa aradosman tukuchenqanku, lanzasninkutapis hocesman tukuchenqanku. Ni mayqen llajta oqharillanqatajchu armasninkuta wajpa contrampi maqanakupaj, nitaj guerrapajpis yachachiykunasta jap'enqankuchu.

⁴ Jinaqa tukuy kausanqanku ni ima manchayniyoj; sapa ujtaj samarikuyta atenqa uvasninku llanthupi, jinataj higueronkoj llanthoj urampi. Kaykuna, Tukuy Atiyniyoj Señorpa kikin palabrasnin kanku.

⁵ Waj llajtakunaqa kasunku kikin lantisnillankuta, jinapis noqanchejqa kasusunchejpuni Señor Diosninchejta.

Señor qhespenqa llajtanta

^6-7 Kayta nin Señor: Jaqay p'unchaypeqa ovejasniyta tantaykusaj jasut'erqani chaykunata; wist'usta, sayk'usqasta, jinataj ch'eqerasqasta. Chaykunawan, chay qhepakojkunawantaj uj atiyniyoj llajtata ruwasaj. Noqa, Señor, Sión orqomantapacha Israel aylluyta kamachisaj, kunan wiñaypajtaj.

⁸ Qanrí, Jerusalén, Siompata torren, jark'akuntaj qan ujtawan Israel reinoj capitalnin kallankitaj, imaynachus ñaupajpi may uyarisqa warmi karqanki jina.

⁹ Kunanrí, imarayku ajinata qhaparinki uj onqokoj warmi nanayninwan jinari? Manachu qampi reyqa tiyan? Chayri umachasojkunachu wañupusqanku?

¹⁰ Sión llajta, wijsayoj warmi nanayninwan jina q'ewiykachakuy qhapariytaj, imaraykuchus runasniyki qanmanta llojsenqanku, q'ara pampapi tiyamonqanku, Babiloniakamataj chayanqanku. Jinapis Señor chaypi ayllunta kacharichejqa, enemigosninmanta salvanqa.

¹¹ Kunanqa ashkha naciones contraykipi tantaykukunku nispa: Jakuchej kusikamunachej Jerusalempa honran t'akasqata rikuspa.

¹² Chaywampis chay nacionesqa mana rejsinkuchu Diospa yuyasqasninta, imachus ruwanan kasqantapis; mana yachankuchu Pay tantaykumanta imaynatachus trigo q'apista eraman tantaykunchej jinata.

¹³ Sión llajta, jatarikuy trillaytaj, Señor nin: Noqa qosqayki toroj kallpata jina fierro wajrasniyojta bronce talonesniyojta jina, ashkha llajtasta phirita ruwanaykipaj jina. Qan qhechunki millay qhapaj kayninkuta, noqapajtaj t'aqapuwanki, noqa tukuy jallp'aj Señornimpaj.