Miqueas 3 - Qheshwa Biblia DC

Sajra kamachejkunaj contrampi willanku

¹ Kunan uyariychej Israelpa kamachejkunasnin jinataj kurajkunasnin: Manachu qankuna yachanaykichej kashan imachus cheqan kaj chayta?

² Chaywampis qankunaqa, allin kajta chejninkichej munakunkichejtaj sajra kajta, qankuna aylluytaqa qaranta ch'uskinkichej q'ara tullusllatataj saqenkichej.

³ Aylluytaqa kausashajllata mikhuykunkichej; qaranta orqhonkichej, tullusnintapis t'unankichej; mankaman churaykunapaj aychata jina ruwankichej.

⁴ Uj p'unchaypi qankuna Señorta wajyakunkichej. Chaywampis Paytaj mana kutichisonqachejchu. Jaqay tiempopeqa qankunamanta Pay pakakonqa chay millay juchasta ruwasqaykichejrayku.

⁵ Israel aylloyqa pantay ñankunasta rishan chay profetaswan ch'aukiyasqankurayku. Paykuna ninku: Sonqo tiyasqalla tiyakusunchej, nispa; mikhunankupaj qonku chaykunaman. Chaywampis maqaj sayaykunku piskunachus mana imatapis mikhunankupaj qonkuchu chaykunaman. Señor nin chay profetasman:

⁶ Manaña ujtawan ch'isisnimpi profetaspa rikunasninta rikunkichejchu, nitaj imachus jamunanmanta ch'isiyaykuypi niyta atinkichejñachu. Inti yaykuponqa chay profetaspajqa, p'unchaypis laqhayaykapullanqataj.

⁷ Chay qhawajkunapis adivinospis q'ala p'enqaypi rikhurenqanku. Tukuy paykuna t'ukushaj qhepakonqanku, Dioswan mana uyarichikusqankurayku.

⁸ Noqatatajri Diospa espíritun atiywan junt'achiwan, justiciawan, kallpawantaj, uyanchanaypaj Israelpa mana kasukoj, juchayojtaj kasqanta.

⁹ Kunan kayta uyariychej, qankuna cheqan kajta chejnejkuna Israelpa kamachejkunasnin kurajkuna kajkunapis, q'ewinchejtaj tukuy cheqan kajtapis,

¹⁰ qankuna Diospa llajtan Jerusalenta ruwankichej wañuchinakuy, mana allin ruwaykunaj patampitaj.

¹¹ Llajtaj juezkunasnimpis rantichikunku, sacerdotesnimpis qolqeraykulla yachachinku, profetasninkupis qolqeraykullataj adivinanku; chantá mayta parlanku Señor paykunaman kutikusqanta; kay jinata nispa: Señorqa noqanchejwan kashan; mana ni ima sajrapis qhatiriwasunchejchu, nispa.

¹² Jinapis, qankunaj juchasniykichejrayku Diospa llajtan Jerusalenqa barbecho llank'asqaman tukonqa, wasispis phirisqa qolluman jinataj, Diospa yupaychana wasimpa orqontaj qhoraswan pakaykusqa kanqa.