Miqueas 1 - Qheshwa Biblia DC

¹ Kaymin Moresetmanta Miqueasman Señorpa parlaykusqanqa, Jotam, Acáz jinataj Ezequías Judapi kamachishajtinku. Kayta rikorqa Samariamanta chantá Jerusalenmantataj imatachus mosqoypi rikusqanta.

Diospa jasut'in Samariapaj

² Tukuy ayllumanta kajkuna uyariychej kayta; Señormin, yupaychana santo wasinmantapacha qankunaj contraykichejpi qhawamonqa.

³ Señormin llojsimonqa maypichus tiyakushan chaymanta thaskispataj pay jamonqa montesniykichejpa orqosninta pampachaspa.

⁴ Chakisnin urapi orqos unuyanqanku imaynatachus cera mach'aqa ninaman churaykunchej jinata, vallestaj iskayman kicharisqas kanqanku, imaynatachus uj wayk'upi may chhika yaku correspa kicharin ajinata.

⁵ Kay tukoyqa jamonqa Jacobpa ayllun mana kasukoj kasqanrayku, jinataj Israelpa juchasninrayku. Maypitaj kashan Jacobpa mana kasukoj kayninri? Chayqa kashan Samaria llajtapi! Maypitaj kashanku Jacobpa, juchallikuna lanti churana wasisninkuri? Chayqa kashan Jerusalempi!

⁶ Chayraykumin Señor nin: Samaria llajtata ruwasaj phirisqa wasi qollusllataña, uvas plantana campotataj kicharisaj. Chay llajtamanta rumisninta tukuy pampata junt'achisaj, ura urannej rumistapis patannej sut'iman churamusaj.

⁷ Tukuy lantikunasnimpis t'unasqas qhepakonqanku, tukuy lanti k'aspisninkupis ruphachisqas qhepakonqanku. Imaynatachus qhenchakunaspa qolqesninkuwan ruwasqas karqanku; ajinallatataj ujtawan qhenchaspa qolqellanmantaj tukuchisaj.

Miqueaspa llakiy waqaynin

⁸ Chayrayku waqasaj jik'un jik'unta, chayraykumin q'ara chakilla purisaj q'arallataj pampa alqo jina auqespa, qhaparqachaspataj waqaspa suri jina.

⁹ Imaraykuchus Samariaj nanachikusqanqa mana jayk'aj jampinapaj jina: Chaytaj chayarqa Judakama chantá maypichus aylluy tiyakun chay Jerusalén llajtakamataj chayarqa.

¹⁰ Ama kayta willaychejchu Gatpi tiyakojkunaman; amataj waqaychejchu. Nanaywan sunt'iraychej Bet-le-afraj polvon ukhupi.

¹¹ Safirpi tiyakojkuna, jallp'aykichejmanta llojsiychej q'araslla; p'enqayniykichejwantaj junt'a! Mana llojsenqankuchu Zaanampi tiyakojkuna! Bet-eselpi waqay kashan, qankunataj mana piniyoj qhepakunkichej!

¹² Marotpi tiyakojkuna nanaywan mayta q'ewiykachakunku walejyarikuyta mayta mask'ashanku, imaraykuchus Señor munarqa chay sajra, Jerusalempa kikin punkusninkama chayananta.

¹³ Qankuna Laquispi tiyakojkuna israelitas jinallataj juchallikorqankichej, qankunanejta Sión orqopis juchallikorqa, caballosniykichejman carrosta t'inkiychej.

¹⁴ Moreset-gatmanta wiñaypaj despidikuychej. Aczib llajta misk'achejmanta sirvikonqa Israelpa reykunasninman.

¹⁵ Señor nin: Maresa llajtapi tiyajkuna, qankunaj contraykichejpi watejmanta uj atipajta kachamusaj Israelmanta aswan ajllasqa kajtaj Adulampa chhanka jusk'usninman sat'ikamonqa.

¹⁶ Qanrí, Sión llajta, umaykita q'arakuy llakiyniykita rikuchispa chay sumaj munasqa wawasniykimanta. Astawan umaykita q'araykuy alqamarej umanman rijch'akunankama, imaraykuchus wawasniykeqa waj jallp'aman apasqas kanqanku.