San Mateo 9 - Qheshwa Biblia DC

Jesús puririchin tunuyasqa runata

¹ Jesús boteman yaykuspa rerqa qocha chimpaman, llajtanmantaj chayarqa.

² Chaymantaj apamorqanku uj tunuyasqa runata, phullupi wantumuspa. Jesustaj feninkuta rikuspa onqosqaman nerqa: Sonqochakuy wawáy! Juchasniykeqa pampachasqasña kanku.

³ Wakin leymanta yachachejkunataj sonqonku ukhupi nisharqanku: Kay runa Diospis kanman jina parlashan.

⁴ Jesustaj imatachus yuyasqankuta yachaspa, nerqa: Imaraykutaj sonqoykichejpi sajra imasta yuyashankichej?

⁵ Ima niytaj aswan allin kanman: Juchasniyki pampachasqaña; chayrí, sayariy, puririy, niychu?

⁶ Chayrayku yachanaykichejpaj Runaj Churenqa atiyniyoj, kay mundopi juchasta pampachanampaj. Tunuyasqa runamantaj nerqa: Sayariy, phulluykita oqharikapuspa wasiykiman ripuy.

⁷ Paytaj jatariytawan wasinman riporqa.

⁸ Runastaj chayta rikuspa mancharikorqanku, Diostataj jatuncharqanku, chay jina atiyta runasman qosqanmanta.

Jesús wajyan Mateota

⁹ Chaymanta rishaspa, Jesús rikorqa Mateo sutiyoj runata, impuesto jap'inampi tiyashajta, nerqataj: Noqawan jaku. Paytaj sayariytawan Jesuswan rerqa.

¹⁰ Jesús, Mateoj wasimpi mikhunampaj kashajtin, ashkha impuesteros, juchasapaswan jamorqanku mikhoj, maypichus Jesús yachachisqasninwan kasharqa chayman.

¹¹ Fariseostaj kayta rikuspa Jesuspa yachachisqasninta taporqanku: Imaraykutaj maestroykichej impuesteroswan, juchasapaswan ima mikhunri?

¹² Jesustaj chayta uyarispa nerqa: Walej kajkunaqa mana jampejta mask'ankuchu, manachayqa onqosqas kajkunalla.

¹³ Rispa yachamuychej, imatachus kay niyta munasqanta: Khuyakuyta munani, mana uywa wañuchisqatachu. Chayrayku, mana cheqanta kausajkunatachu mask'aj jamuni; astawanqa juchasapasllata.

Ayunomanta tapukunku

¹⁴ Chaypacha, Juan Bautistaj yachachisqasnin Jesusman qayllaykorqanku, nispa: Imaraykutaj, noqayku, fariseospis, sapa kuti ayunayku; yachachisqasniykitaj mana ayunankuchu?

¹⁵ Jesustaj paykunaman nerqa: Atinkumanchu casamientoman wajyasqas llakisqas kayta, casarakoj runa paykunawan kashajtin? Uj p'unchay jamonqa, maypachachus casarakoj runa, paykunamanta qhechusqa kanqa, chaypachamá ayunanqanku.

¹⁶ Mana pipis t'irinmanchu mauk'a p'achaman mosoj trapotaqa. Mosoj trapoqa q'entispa aswan jatunta llik'irparinman mauk'a p'achataqa.

¹⁷ Manallataj pipis mosoj vinota jich'anmanchu mauk'a qara botasman. Mosoj vinoqa, poqoykuspa qara botasta phatachinman; jinapitaj vinoqa jich'akunman, qara botaspis usunkuman. Chayrayku, mosoj vinotaqa mosoj qara botasmampuni jich'anku; ajinamanta iskayninku waqaychasqas kanku.

Jairoj wawan kausarin, onqosqa warmitaj thañin

¹⁸ Jesús kay imasta parlashajtintaj, uj kamachej runa payman qayllaykorqa, ñaupaqenman qonqoriykukuspataj nerqa: Ususiy kunallan wañupun; jamuy ari, makiykita payman churanki, kausarenqataj.

¹⁹ Jesustaj sayarispa paywan khuska rerqa, yachachisqasninwan ima.

²⁰ Chaypachataj uj warmi karqa, chunka iskayniyoj watataña yawar apaywan onqosqa; paytaj Jesuspa qhepanmanta qayllaykuspa, p'achampa cantonta llankhaykorqa.

²¹ Payqa sonqompi nerqa: P'achallantapis llankharisaj chayqa, thañikapusaj.

²² Jesustaj kutirikuspa payta qhawarerqa, nerqataj: Sonqochakuy wawáy; feniykirayku thañisqa kanki. Chaymantapachataj warmeqa thañikaporqa.

²³ Jesustaj, kamachej runaj wasinman yaykuspa, rikorqa qena tocajkunata, ashkha runastataj ch'ajwajta.

²⁴ Nerqataj: Ithiriychej, sipasqa mana wañusqachu, payqa puñushallan. Runastaj Jesusta asipayarqanku.

²⁵ Runasta jawaman llojsichispa, wasi ukhuman yaykorqa. Sipasta makinmanta aysarispataj sayaricherqa.

²⁶ Kay ruwasqantaj tukuy chay jallp'api yachakorqa.

Jesús iskay ciegosta qhawarichin

²⁷ Jesús chaymanta ripushajtintaj, iskay ciegos qhepanta rerqanku qhaparispa: Davidpa Churin, khuyariwayku!, nispa.

²⁸ Jesús wasiman chayasqantawantaj, chay ciegosqa payman qayllaykorqanku. Jesustaj paykunata taporqa: Creenkichejchu atiyniyoj kasqayta, kayta ruwanaypaj? Paykunataj kuticherqanku: Arí Señor, nispa.

²⁹ Chantá ñawisninkuta llankhaykuspa nerqa: Creesqaykichejman jina ruwasqa kachun.

³⁰ Ñawisninkutaj rikorqanku. Jesustaj allinta paykunaman kamacherqa: Ama ni piman kayta willankichejchu, nispa.

³¹ Paykunataj llojsiytawankama, tukuy jaqay jallp'api willararqanku Jesusmanta.

Jesús parlarichin opata

³² Chaymanta llojsejtinkukamataj, Jesusman pusamorqanku uj opa runata.

³³ Jesús supayta qharqojtintaj, opaqa parlarerqa. Runastaj t'ukusharqanku: Mana jayk'ajpis Israelpi rikukorqachu kay jinaqa, nispa.

³⁴ Fariseostaj nisharqanku: Kamachej supaypa atiyninwan, payqa qharqon supaykunata.

Jesús khuyan runasta

³⁵ Ajinata Jesusqa muyuynin llajtasta, ranchosta ima purerqa, yachachispa sinagogasninkupi, predicaspataj reinoj evangelionta; tukuy onqoykunamanta nanaykunamantawan thañichispa.

³⁶ Ashkha runasta rikuspataj sonqonta nanachikorqa, imaraykuchus paykunaqa saqerpayasqas, ch'eqerasqastaj kasharqanku, mana michejniyoj ovejas jina.

³⁷ Chaymantataj yachachisqasninman nerqa: Cheqamanta cosechaqa ashkha, llank'ajkunataj pisis kanku.

³⁸ Mañakuychej ari Señormanta, astawan llank'ajkunata cosechanman kachamunampaj.