San Mateo 8 - Qheshwa Biblia DC

Jesús thañichin lepra onqoyniyojta

¹ Jesús orqomanta uraykamusqantawan, ashkha runas paywan khuska rerqanku.

² Uj lepra onqoyniyoj runataj, Jesusman qayllaykorqa; ñaupaqenman qonqoriykukuspataj, nerqa: Señor, munanki chayqa, atinki llimphuchawayta.

³ Jesustaj makinta aysarispa payta llankhaykorqa, nispa: Arí munani, llimphu kay! Kayta nejtinkamataj lepramanta llimphuchasqa karqa.

⁴ Jesustaj nerqa: Uyariway, amataj ni piman willankichu; rispa sacerdoteman rikuchikamuy. Moisespa kamachisqanman jinataj, ofrendaykita jaywamuy, runas yachanankupaj.

Jesús thañichin capitampa uywasqanta

^5-6 Jesús Capernaum llajtaman yaykusqantawankama, uj capitán Jesusman qayllaykorqa, mañakorqataj: Señor, uywasqay wasiypi mana kuyurej, suchuyasqa kashan; anchatapuni nanaywan ñak'arishan.

⁷ Jesustaj nerqa: Noqa kikiy rispa, payta thañichimusaj.

⁸ Capitantaj, kutichispa nerqa: Señor, noqaqa mana wasiyman yaykunaykipaj jinachu kani. Uj palabrallata niy, uywasqaytaj thañikaponqa.

⁹ Noqapis kurajkunaj kamachisqallantaj kani. Noqapis soldadosta kamachini. Ujninta kamachini riy nispa, rintaj; ujnintapis nillanitaj, jamuy nispa, jamuntaj. Kamachiypis, imatachus nisqayta ruwan.

¹⁰ Jesustaj kayta uyarispa, t'ukorqa; paywan rejkunamantaj nerqa: Cheqamanta niykichej, manaraj Israelpipis kay jina feniyoj runataqa tarerqanichu.

¹¹ Niykichej ari: Ashkha runakuna jamonqanku inti llojsimuynejmanta, inti yaykuynejmanta ima. Janaj pachapitaj Diospa reinompi mikhonqanku Abrahamwan, Isaacwan. Jacobwan ima.

¹² Janaj pacha reinoj wawasnintaj jawa laqhaman wijch'usqas kanqanku; chaypitaj jatun waqay, kiru k'arukuytaj kanqa.

¹³ Chaymanta Jesús, capitanman nerqa: Ripuy wasiykiman: creesqaykiman jina ruwasqa kachun, nispa. Uywasqantaj chay kikimpacha thañikaporqa.

Jesús thañichin Pedroj suegranta

¹⁴ Jesustaj Pedroj wasinman rerqa; chaypitaj Pedroj suegranta rikorqa k'ajaj onqoywan camapi sirishajta.

¹⁵ Onqosqaj makinta llankharerqa, k'ajayninmantataj thañikaporqa. Jatarimuspataj payta sirverqa.

Jesús thañichin ashkha onqosqasta

¹⁶ Ch'isiyaytataj, Jesusman pusamorqanku ashkha supayniyoj runakunata. Paytaj uj simillawan jawaman supaykunata qharqorqa. Ajinallatataj tukuy onqosqastapis thañicherqa.

¹⁷ Kaytaj karqa, profeta Isaiaspa willasqan junt'akunampaj. Kay jinata nerqa: Pay kikin aparqa onqoykunasninchejta, jap'erqataj nanaykunasninchejta.

Jesuswan riyta munajkuna

¹⁸ Jesustaj muyuynimpi ashkha runasta rikuspa, kamacherqa qocha chimpaman rinankuta.

¹⁹ Leymanta yachachej runataj Jesusman qayllaykuspa nerqa: Maestro, qanwan risaj, maymanchá rinki chayman.

²⁰ Jesustaj payman kuticherqa: Atojkunaqa cuevasniyoj kanku, p'isqaspis thapasniyoj. Runaj Churimpatarí, mana maypi umanta churaykunampaj kapunchu.

²¹ Yachachisqasninmanta ujnin kajtaj nerqa: Señor, saqeway tataytaraj ñaupajta p'ampamunayta.

²² Jesustaj kuticherqa: Noqata qhatiway; saqey wañusqas wañusqasninkuta p'ampanankuta.

Jesús thañichin wayrata phiña qochatawan

²³ Chaymantataj, Jesús boteman yaykuspa yachachisqasninwan khuska rerqa.

²⁴ Jinallaman sinch'i wayra oqharikorqa qochapi; yakutaj manchayta oqharikuspa boteta chinkachinayasharqa. Jesustaj puñusharqa.

²⁵ Yachachisqasnintaj, qayllaykuytawan rijch'arichispa, nerqanku: Señor, salvawayku, chinkaykushanchejña!

²⁶ Jesustaj paykunaman nerqa: Imaraykutaj manchachikunkichej pisi feniyoj runas? Sayariytawantaj, qochata, wayratawan k'amerqa. Wayra thañejtintaj qocha tiyaykorqa.

²⁷ Runakunataj, t'ukuspa nerqanku: Pi runataj kayrí, wayrawan, qochawan ima kasuchikojrí?

Gadaramanta iskay runas supayniyoj

²⁸ Jesús, qocha chimpa, Gadarenospa jallp'anman chayarqa; iskay supayniyoj runastaj panteonmanta llojsimuspa payman chimpaykorqanku. Manchay phiñas kasqankuraykutaj, chay ñanta ni pi purejchu.

²⁹ Qhaparerqankutaj: Diospa Churin, ima ruwanayki tiyan noqaykuwan? Noqaykuta ñak'arichejchu jamuwayku, manaraj ñak'arinayku kashajtin?

³⁰ Paykunamanta karunejpitaj, ashkha khuchis mikhusharqanku.

³¹ Supaykunataj Jesusmanta mañakorqanku: Kay runasmanta qharqowasqayku chayqa, kachawayku jaqay khuchisman.

³² Paytaj nerqa: Riychej, nispa. Supaykunataj chay iskay runasmanta llojsispa, khuchisman rerqanku. Tukuynin khuchistaj qaqata urmaykorqanku qochaman, chaypitaj jeq'eqaspa wañurarqanku.

³³ Khuchista michejkunataj ayqerqanku. Llajtaman chayaspataj, tukuy imata willarqanku, chay supayniyoj runasmanta ima.

³⁴ Chay llajtamantataj, tukuy runas llojserqanku Jesusta taripaj. Paywan tinkuspataj, mañakorqanku chay jallp'ankumanta ripunanta.