San Mateo 4 - Qheshwa Biblia DC

Supay tientan Jesusta

¹ Chaymanta, Santo Espíritu Jesusta pusarqa ch'innejman, payta supay probanampaj.

² Jesustaj tawa chunka p'unchayta, tawa chunka tutatawan, mana mikhusqa karqa, yarqhachikorqataj.

³ Chaypacha, supay qayllaykorqa Jesusman tentayta munaspa, nerqataj: Diospa Churinchus kanki chayqa, niy kay rumista t'antaman tukunankuta.

⁴ Jesustaj kutichispa nerqa: Escribisqa kashan: Mana t'antallawanchu runaqa kausanqa; astawanqa, Diospa siminmanta tukuy llojsimoj palabraswan kausanqa.

⁵ Chaymanta, supayqa Jerusalén llajtamanñataj Jesusta pusarqa, temploj torrempitaj rikhuricherqa.

⁶ Nerqataj: Diospa Churin kanki chayqa, uraman wijch'uykukuy, imaraykuchus escribisqa kashan: Dios angelesninta kachamusonqa makisninkuwan jap'isunankupaj, chakisniykita ama rumiman takakunaykipaj.

⁷ Jesús nillarqataj: Escribisqallataj kashan: Señor Diosniykita ama tentankichu.

⁸ Ujtawan supay pusarqa Jesusta jatun orqo pataman. Chaymantataj tukuy mundontimpi kaj llajtasta rikucherqa, paykunaj qhapaj kapuyninkutawan.

⁹ Nerqataj Jesusman: Noqa kay tukuy imata qosqayki, qonqorikuspachus k'umuykukuwanki chayqa.

¹⁰ Chaypacha Jesús kuticherqa: Riy kaymanta Satanás! Escribisqa kashan: Señor Diosniykita yupaychanki, pay sapallantataj sirvinki.

¹¹ Chantá supay saqeporqa Jesusta, angelestaj jamuspa mikhuyta jaywarqanku.

Jesús Galileapi predicayta qallarin

¹² Jesustaj, Juan Bautista preso kasqanta uyarispa, Galileaman rerqa.

¹³ Nazaretta saqespa, Capernaum llajtaman tiyakoj riporqa. Chay llajtataj Galilea qocha cantopi karqa, Zabulón jallp'asnejpi.

¹⁴ Kaytaj karqa, profeta Isaiaspa nisqan junt'akunampaj.

¹⁵ Zabulompa, Neftalimpa jallp'asnin, mar qochaman rej ñan, Jordán mayoj chimpan; Galilea jallp'a, maypichus gentiles tiyakunku.

¹⁶ Laqhapi tiyakoj runas rikorqanku uj jatun k'anchayta. Wañuy llanthu cheqapi tiyakojkunamampis uj k'anchay paqarimorqa.

¹⁷ Chaymantapacha, Jesús qallarerqa predicayta: Diosman kutirikuychej, imaraykuchus janaj pacha reinoqa qayllaykamunña.

Jesús wajyan tawa challwirista

¹⁸ Jesús Galilea qocha cantonta rishaspa, iskay wauqesta rikorqa. Ujnin karqa Simón, Pedro sutiyoj; ujnintaj Andrés. Paykuna challwiris karqanku; chayrayku challwa jap'ina ch'ipata jatun qochaman wijch'uykusharqanku.

¹⁹ Nerqataj Jesús paykunaman: Jamuychej qhepayta, noqataj runa jap'ej challwirista ruwasqaykichej.

²⁰ Paykunataj chay kikimpacha ch'ipasta saqerpayaspa, Jesuspa qhepanta rerqanku.

²¹ Astawan ñaupajman rispataj, iskay wauqestawan rikullarqataj: Santiagota, Juantawan. Paykunaqa karqanku Zebedeoj churisnin. Botepi kasharqanku Zebedeo tatankuwan, challwa jap'ina ch'ipasninkuta t'irispa. Paykunatapis Jesusqa wajyallarqataj.

²² Chay kikimpacha, boteta, tatankutawan saqerpayaspa, Jesuspa qhepanta rillarqankutaj.

Jesús yachachin ashkha runaman

²³ Jesús muyumorqa tukuynin Galileata; yachachispa sinagogasninkupi, predicaspa reinoj evangelionta. Llajtapitaj runasta thañichej, tukuy laya onqoykunamanta, nanaykunamantawan.

²⁴ Chantá tukuy Siria jallp'apitaj Jesús atiyniyoj kasqanta uyarerqanku, pusamorqankutaj tukuy laya onqoykunawan, ñak'ariykunawan, nanaykunawan ima llakejkunata; supayniyojkunata, t'uku onqoyniyojkunata, suchusta ima. Paykunatataj Jesús thañicherqa.

²⁵ Ashkha runastaj Jesusta qhaterqanku: Galileamanta, Decapolismanta, Jerusalenmanta, Judeamanta, Jordán mayoj chimpanmanta ima.