San Mateo 3 - Qheshwa Biblia DC

Juan Bautista ch'inkunapi predican

¹ Jaqay p'unchaykunapi, Juan Bautista rikhurimorqa, predicaspa Judeaj ch'in pampasnimpi.

² Nerqataj: Diosman kutirikuychej, imaraykuchus janaj pacha reinoqa qayllapiña kashan.

³ Kay Juanmanta profeta Isaías nerqa: Uj runaj qhaparisqan ch'innejpi uyarikun: Señorpa ñanninta wakichiychej, purinasnintataj cheqanyachiychej.

⁴ Juantaj camello millmamanta ruwasqa p'achawan p'achallisqa karqa: qara chumpiwantaj chumpiykusqa. Mikhojtaj langostasta, lachiwana misk'ita ima.

⁵ Runakunataj uyarej jamorqanku Jerusalenmanta, Judeamanta, tukuy Jordán mayoj muyuyninmanta ima.

⁶ Juantaj juchasninkuta willakojtinku, Jordán mayupi bautizaj.

⁷ Juanqa ashkha fariseosta, saduceostawan bautismoman jamojta rikuspa, nerqa: Katarikunaj miraynin! Pitaj yachachisorqachej Diospa jamoj k'ajaj phiñakuyninmanta ayqeytari?

⁸ Allinta kausaychej ari, Diosman kutirikusqaykichejmanta poqoyta rikuchispa.

⁹ Ama niychejchu qankunaqa: Abrahampa wawasnin kayku, nispa. Noqa niykichej, Diosqa kay rumismantapis wawasta sayarichiyta atin Abrahampaj.

¹⁰ Ñapis hachaqa, sach'aspa saphinman churasqaña kashan. Tukuy mana allinta poqoj sach'ataj k'utusqa kanqa, ninamantaj kanasqa.

¹¹ Noqaqa cheqamanta bautizaykichej yakuwan, Diosman kutirinaykichejpaj; qhepayta jamojqa noqamanta aswan atiyniyoj; chayrayku, mana atej jinachu kani ujut'allantapis apanaypaj. Paytaj bautizasonqachej Santo Espirituwan, ninawan ima.

¹² Jorcapis makimpiña kashan, trigota erapi llimphuchanampaj. Chaymantataj trigota pirwaman waqaychanqa, pajantataj mana jayk'aj thasnukoj ninaman kanaykonqa.

Jesús bautizachikun

¹³ Chantá Jesús jamorqa Galileamanta Jordán mayuman, Juanwan bautizachikoj.

¹⁴ Juantaj ni imarayku Jesusta bautizayta munarqachu: Noqa qanwan bautizachikunay kashajtinchu, qan jamunki noqawan bautizachikoj?, nispa.

¹⁵ Jesustaj kuticherqa: Saqeway kunan bautizachikojta, imaraykuchus aswan walej Diospa kamachisqantaraj junt'ana. Chaymanta Juan saqellarqaña Jesús bautizachikunanta.

¹⁶ Jesús bautizachikuytawan yakumanta llojserqa. Cielotaj kicharikorqa, rikorqataj Diospa Espiritunta paypa patanman paloma jina uraykamushajta.

¹⁷ Chaymantataj, cielomanta Dios nimorqa: Kaymin ancha munasqa Chureyqa. Paywan kusisqa kani.