San Mateo 28 - Qheshwa Biblia DC

Jesuspa kausarimuynin

¹ Samakuna p'unchay pasayta, semanaj ñaupaj p'unchaynin sut'iyamuyta, María Magdalena, waj Mariawan rerqanku, sepulturata qhawaj.

² Ujllata ikhakorqa jallp'a, imaraykuchus Señorpa uj angelnin janaj pachamanta uraykamuspa, qayllaykuspataj, rumita tijrarpayarqa, chay patapitaj tiyaykukorqa.

³ Rijch'aynenqa lliuj lliujpa k'anchaynin jina karqa, p'achantaj rit'i jina yuraj.

⁴ Soldadostaj chayta rikuspa, manchariywan kharkatiterqanku, wañusqa jinataj wijch'ukorqanku.

⁵ Angeltaj warmisman nerqa: Ama manchachikuychejchu. Noqa yachani Jesusta mask'ashasqaykichejta, pichus chakatasqa karqa, chayta.

⁶ Mana kaypiñachu. Nisqanman jina kausarimunña. Jamuychej, qhawaykuychej maypichus Señor churasqa karqa, chayta.

⁷ Usqhayta rispataj yachachisqasninman willamuychej: Wañusqakunamanta kausarimun. Ñaupaqeykichejtataj Galileaman rishan, chaypi paywan tinkukunkichej. Kaytaqa niykichejña.

⁸ Paykunataj sepulturamanta llojsiytawan, mancha manchalla jatun kusiywantaj, usqhayta rerqanku yachachisqasninman willamoj.

⁹ Jinata rishajtillanku, Jesús paykunaman rikhurerqa, napaykorqataj: Kusikuychej, nispa. Paykunataj qayllaykuytawan chakisninta ojllaykorqanku yupaycharqankutaj.

¹⁰ Jesustaj paykunaman nerqa: Ama manchachikuychejchu, rispa wauqesniyman willamuychej Galileaman rinankuta. Chaypitaj rikuwanqanku.

Soldadosman lluk'iykunku

¹¹ Warmis rinankukamataj, wakin soldados llajtaman rispa, jatun sacerdotesman willamorqanku tukuy imamanta.

^12-13 Jatun sacerdotestaj, kuraj runaswan tantaykukuspa, yachachinakorqanku. Soldadosmantaj ashkha qolqeta lluk'iykorqanku, nispa: Qankunaqa niychej: Yachachisqasnin tuta jamuspa Jesuspa ayanta suwasqanku puñunaykukama.

¹⁴ Kamachej kayta yachajtenqa, noqayku paywan parlasqayku, ama imanasunaykichejpaj.

¹⁵ Soldadostaj qolqeta jap'iytawan kikinta ruwarqanku, yachachisqa kasqankuman jina. Kay ruwasqankutaj kunan p'unchaykama willakun judíos ukhupi.

Jesuspa jatun kamachiynin

¹⁶ Chunka ujniyoj yachachisqastaj Galileaman rerqanku, maymanchus Jesús kamacherqa rinankuta, chay orqoman.

¹⁷ Jesusta rikuytawantaj yupaycharqanku, wakinrí iskayrayarqanku.

¹⁸ Jesustaj qayllaykuspa, paykunata parlapayarqa: Noqa tukuy atiyniyoj kani, janaj pachapi, kay pachapipis.

^19-20 Chayrayku riychej, tukuy laya runasta yachachisqasniyman tukuchimuychej, bautizaspa Dios Tataj sutimpi, Churej sutimpi, Santo Espíritoj sutimpiwan, yachachispataj qankunaman kamacherqaykichej chayta, paykunapis waqaychanankupaj. Chantá yachaychej, noqa qankunawan tuta p'unchay kasqayta, kay pacha tukukunankama. Amén.