San Mateo 26 - Qheshwa Biblia DC

Jesusta wañuchinankupaj wakichikunku

^1-2 Jesusqa kay tukuy imasta yachachiyta tukuytawan, yachachisqasninman nerqa: Qankunaqa yachankichej, iskay diamantawan Pascua kananta; Runaj Churintataj jap'enqanku cruzpi chakatanankupaj.

³ Chaymantataj, Caifás sutiyoj jatun sacerdotej patiompi, tantakorqanku kuraj sacerdotes, leymanta yachachejkuna, judiospa kuraj runasninku ima.

⁴ Chaypi yachachinakorqanku, imaynamantapis Jesusta pakayllamanta jap'ispa wañuchinankupaj.

⁵ Chantá, ninakorqanku: Ama Pascuapeqa jap'ichinachu, runas ama ch'ajwanankupaj.

Jesús Betaniapi

^6-7 Jesús Betaniapi, lepra onqoyniyoj Simompa wasimpi kashajtintaj uj warmi qayllaykorqa; valorniyoj perfume oqharisqa, rumi yuritupi. Jesuspa umanmantaj jich'aykorqa, mikhunampaj kashajtin.

⁸ Yachachisqasnintaj chayta rikuspa phiñakorqanku, nerqankutaj: Imapajtaj kay jinata usuchinri?

⁹ Kayqa, ashkha qolqepi vendekunman karqa, wajchasman qonapaj.

¹⁰ Jesustaj chayta yachaspa nerqa paykunaman: Imaraykutaj kay warmipaj rimashankichejri? Payqa allinta noqapaj ruwapuwan.

¹¹ Wajchasqa qankunawampuni kanqa, noqarí mana qankunallawampunichu kasaj.

¹² Payqa, kay perfumewan jawiwaspaqa, p'ampakunaypaj wakichishawan.

¹³ Cheqamanta niykichej, mayllapipis mundontimpi kay evangelio willakojtin, kay warmej ruwasqampis yachakonqa, paymanta yuyarinankupaj.

Judas nin Jesusta jap'ichinanta

¹⁴ Chaypacha chunka iskayniyojmanta ujnin, Judas Iscariote sutiyoj, kuraj sacerdotesman rerqa.

¹⁵ Nerqataj: Jesusta jap'ichiykichejman chayqa, imatataj qowankichej? Paykunataj, kinsa chunka qolqeta qosqayku, nerqanku.

¹⁶ Chaymantapacha Judas wateqasharqa, imaynamantachus Jesusta jap'ichinanta.

Pascua

¹⁷ Pascua, ñaupaj p'unchaypi, mana levadurayoj t'anta mikhuna kashajtin, Jesusman qayllaykuspa yachachisqasnin taporqanku: Maypitaj munanki Pascua mikhuyta wakichinaykuta?

¹⁸ Paytaj kuticherqa: Riychej llajtaman, uj runaj wasinman, niychejtaj: Maestroqa nichimun: Horay qayllapiña, wasiykipi Pascua mikhuyta yachachisqasniywan mikhusaj.

¹⁹ Yachachisqastaj Jesuspa kamachisqanman jina, Pascua mikhuyta wakicherqanku.

²⁰ Ch'isiyaykuytataj, Jesusqa chunka iskayniyoj yachachisqasninwan, mikhoj tiyaykorqanku.

²¹ Mikhushaspataj yachachisqasninman nerqa: Cheqamanta niykichej, qankunamanta ujniykichej jap'ichiwanqa.

²² Paykunataj ancha llakisqas, ujmanta uj, tapuyta qallarerqanku: Noqachu kani, Señor?, nispa.

²³ Jesustaj paykunaman kuticherqa: Pichus noqawan platoman makinta churashan, chay jap'ichiwanqa.

²⁴ Cheqamanta Runaj Churenqa rishan wañuyman, paymanta escribisqaman jina. Ay jaqay runamanta, piraykuchus Runaj Churin jap'ichisqa kanqa! Walej kanman karqa chay runapajqa, ama nacinan.

²⁵ Jap'ichej Judastaj Jesusta taporqa: Maestro, noqachu kani?, nispa. Jesustaj kuticherqa: Arí, qan kanki.

²⁶ Mikhushajtinkutaj, Jesús, t'antata oqharispa graciasta qorqa, partispataj yachachisqasninman jaywarqa, nispa: Mikhuychej, kaymin cuerpoyqa.

²⁷ Copata oqharispataj graciasta qollarqataj; paykunamantaj jaywarqa, nispa: Kaymanta tukuyniykichej ujyaychej.

²⁸ Kayqa [mosoj] tratomanta yawarniy, chaytaj jich'asqa kanqa, ashkha runaspa juchasnin pampachasqa kanampaj.

²⁹ Kayta niykichej: Kunanmantaqa manaña ujyasajchu kay uvas sach'aj poqoyninmanta vinota; Tataypa reinompi mosoj vinota qankunawan ujyanaykama.

Jesús willan Pedro qhesachananta

³⁰ Salmosta takiytawantaj, Olivos orqoman llojserqanku.

³¹ Chaypacha Jesús paykunaman nerqa: Kunan ch'isi noqamanta tukuyniykichej saqerpariwankichej. Escribisqa kashan: Michejta wajtasaj, ovejastaj ch'eqerakonqanku.

³² Wañusqamanta kausarimuspataj, ñaupaqeykichejta Galileaman risaj.

³³ Pedrotaj Jesusman nerqa: Tukuyninku saqesojtinkupis, noqaqa manapuni jayk'ajpis qanta saqesqaykichu.

³⁴ Jesustaj payman nerqa: Cheqamanta niyki, kunan ch'isipacha, manaraj gallo waqayta kinsa kutikama mana rejsinichu niwanki.

³⁵ Pedro nillarqataj: Qanwan wañunay kashajtimpis, manapuni, mana rejsinichu nisqaykichu. Tukuynin yachachisqaspis kikillantataj nerqanku.

Jesús Getsemanipi

³⁶ Jesús Getsemaní huertaman yachachisqasninwan chayarqa, paykunamantaj nerqa: Kaypi tiyarikushaychej, jaqayman rispa Diosmanta mañakamunaykama.

³⁷ Pusarqataj Pedrota, Zebedeoj iskay churisnintawan; llakiywantaj ñak'ariyta qallarerqa.

³⁸ Chaypacha paykunaman nerqa: Almayqa may llakisqa kashan wañuykama. Noqawan kaypi qhepakuychej, qhawaychejtaj ama puñuspa.

³⁹ Astawan ñaupajman rispa, pampaman k'umuykukuytawan, Diosmanta mañakorqa: Tatáy, atikojtenqa kay ñak'arinay pasachun; chaywampis, ama noqaj munayniychu, qampa munayniyki ruwasqa kachun.

⁴⁰ Chaymantataj, kutimuspa yachachisqasninta puñurashajta tariparqa. Pedromantaj nerqa: Manachu uj horallatapis, mana puñuspa noqawan qhawaspa kayta aterqankichej?

⁴¹ Ama puñuychejchu, qhawaychej, Diosmantataj mañakuychej, ama juchaman urmanaykichejpaj. Cheqamanta espiritoqa kallpayoj, aychataj mana kallpayojchu.

⁴² Ujtawan rispa mañakullarqataj: Tatáy, ñak'arinaypuni kajtenqa qampa munayniyki ruwasqa kachun.

⁴³ Kutimuspataj, puñurashajllatataj paykunata tariparqa; ñawisninkoqa puñuywan atisqas karqanku.

⁴⁴ Paykunata saqespa kutillarqataj; kinsa kaj mañakuynimpipis kikillantataj mañakorqa.

⁴⁵ Chaymanta kutimuspataj yachachisqasninman nerqa: Kunanqa puñukapuychej, samarikuychejtaj. Hora qayllamushanña, Runaj Churintaj juchasapaspa makisninman urmanqa.

⁴⁶ Sayariychej, jaku. Noqata jap'ichiwajqa qayllamushanña.

Jesusta presochanku

⁴⁷ Jesús parlashajtillanraj, Judas, chunka iskayniyoj yachachisqasninmanta ujnin, chayamorqa. Paywantaj ashkha runas jamorqanku, espadaswan, k'aspiswan ima. Paykunataqa kamacherqanku kuraj sacerdotes, llajtamanta kuraj runas ima.

⁴⁸ Jesusta jap'ichejtaj paykunaman yachacherqa: Pitachus much'aykusaj, chayta jap'inkichej, nispa.

⁴⁹ Chaymantaqa Jesusman qayllaykuspa nerqa: Imaynalla maestro! Much'aykorqataj.

⁵⁰ Jesustaj payman nerqa: Kausaqe, imamantaj jamunkiri? Judaswan jamojkunataj chimpaykuspa Jesusta presocharqanku.

⁵¹ Jesuswan kajkunamanta ujnintaj, espadanta sik'ispa, kuraj sacerdotej kamachimpa ningrinta wajtaspa qholurparerqa.

⁵² Chaypacha Jesús nerqa: Espadaykita waqaychay. Espadata oqharejkunaqa, espadallawantaj wañuchisqas kanqanku.

⁵³ Tataymantachus mañakuyman yanapanawanta chayqa, payqa kunampacha chunka iskayniyoj tropa angelesninmanta astawan kachamuwanman.

⁵⁴ Ajina kajtenqa, imaynamantataj chantá Escrituras junt'akunkumanri?

⁵⁵ Chaypacha Jesús nerqa runasman: Suwaman jinachu espadaswan, k'aspiswan ima, jap'ej jamuwarqankichej? Sapa día qankunawan templopi yachachispa kashajtiytaj, mana jap'iwarqankichejchu.

⁵⁶ Kay tukuy imaqa ruwakun profetaspa escribisqan junt'akunampaj. Chaymantataj tukuynin yachachisqasnin saqerpayaspa ayqerqanku.

Jesús juntaj ñaupaqempi

⁵⁷ Presochaspa Jesusta pusarqanku jatun sacerdotej Caifaspa wasinman, maypichus tantasqas kasharqanku, leymanta yachachejkuna, kuraj runas ima.

⁵⁸ Pedrotaj karu qhepallata qhaterqa, jatun sacerdotej pationkama. Chayman yaykuspataj, kamachiswan tiyaykukorqa, suyaspa imatachus pasananta.

⁵⁹ Chaykamataj, kuraj sacerdotes jatun juntapi kajkuna ima, mask'asharqanku llulla ch'ataykojkunata, Jesusta wañuchinankupaj.

⁶⁰ Ashkha llulla testigos jamorqanku, manataj Jesuspi ima juchatapis tarerqankuchu. Chaywampis, qhepataña, iskay llulla testigos jamullarqankutaj.

⁶¹ Paykunataj nerqanku: Kay runaqa nerqa: Diospa templonta urmachiyta atini; kinsa diapitaj sayarichiyta.

⁶² Jatun sacerdotetaj, sayarispa Jesusman nerqa: Manachu imata contraykipi rimajkunaman kutichikunki?

⁶³ Jesustaj ch'inlla kakorqa. Chaymantataj jatun sacerdoteqa, payman nerqa: Kausashaj Diospa sutimpi niwayku. Qanchu Cristo, Diospa Churin kanki?

⁶⁴ Jesustaj kuticherqa: Qan ninki. Astawanqa niykichej: Kunanmantapacha Runaj Churinta rikunkichej, atiyniyoj Diospa pañampi tiyashajta, cielo phuyuspitaj jamushajta.

⁶⁵ Jatun sacerdotetaj, p'achasninta llik'irakuspa, nerqa: Kay runaqa Diospa contranta riman. Imapajñataj testigosta munanchejri? Kunampacha uyarishankichej, Diospa contrampi rimasqanta.

⁶⁶ Imaynataj qankunaman rijch'asunkichejri? Paykunataj kuticherqanku: Juchayojpuni ari, wañunan tiyan, nispa.

^67-68 Niytawantaj, uyanman thoqaykorqanku, laq'arqanku; wakintaj sajmarqanku, nispa: Ya Cristo, niwayku pichus sajmasusqanta.

Pedro, Jesusta mana rejsejman tukun

⁶⁹ Pedro jawa patiopi tiyasharqa; uj sipas kamachitaj payman qayllaykuspa, nerqa: Qampis Galilea llajtayoj Jesuswan purej kanki.

⁷⁰ Payrí, tukuypa ñaupaqempi, nerqa: Mana rejsinichu, nitaj yachanichu imatachus nisqaykita, nispa.

⁷¹ Punkuta llojsishajtin, waj sipas kamachiñataj rikuspa, chaypi kajkunaman, nerqa: Kaypis, nazareno Jesuswan kasharqa.

⁷² Paytaj ujtawan, mana rejsinichu chay runata, nerqa juramentowan.

⁷³ Uj chhikanmantawan, chaypi kashajkunañataj, Pedroman qayllaykuspa nerqanku: Cheqamanta qampis paykunamanta kanki, parlaynillaykipi yachakushan.

⁷⁴ Pedrotaj phiñarikorqa, juraytataj qallarerqa: Manapuni rejsinichu chay runataqa, nispa. Chay kikimpachataj, gallo waqarqa.

⁷⁵ Chantá Pedro yuyarikorqa Jesús nisqanmanta: Manaraj gallo waqayta, kinsa kutita, mana rejsinichu niwanki. Jawaman llojsispataj sonqo nanayta waqarqa.