San Mateo 25 - Qheshwa Biblia DC

Chunka sipaskunamanta rijch'anachina

¹ Chantá, janaj pacha reinoqa rijch'akun chunka sipaskunaman; paykunaqa k'anchanasninkuta oqharikuspa casarakojta taripaj rerqanku.

² Phishqa sipaskuna wampus karqanku, phishqataj yuyayniyoj.

³ Chay wampu sipaskunaqa k'anchanasninkuta oqharispa, mana aceiteta apakorqankuchu.

⁴ Yuyayniyojkunarí, yurusninkupi k'anchanasninkupi ima, aceiteta apakorqanku.

⁵ Casarakoj mana usqhayta chayamojtintaj, tukuyninku puñuywan atichikuspa puñurparerqanku.

⁶ Chaupi tutatataj uj qhapariy uyarikorqa: Casarakoj runa chayamushanña; taripamuychej ari!

⁷ Tukuynin sipaskunataj, jatariytawan, k'anchanasninkuta wakicherqanku.

⁸ Wampustaj nerqanku yuyayniyojkunaman: Qoriwayku uj chhika aceiteta, imaraykuchus k'anchanasniyku wañupushankuña.

⁹ Paykunataj nerqanku: Mana qoriykumanchu imaraykuchus noqaykupaj, qankunapajpis pisinman. Astawanqa, rispa qhatojkunamanta rantikamuychej.

¹⁰ Paykuna aceiteta rantej rinankukamataj, casarakoj runa chayamorqa, wakichikoj sipaskunataj, paywan khuska casamiento wasiman yaykorqanku, punkutaj wisq'akaporqa.

¹¹ Qhepata chayamoj sipaskunataj wajyakorqanku: Wiraqochi, wiraqochi, kicharimuwayku!, nispa.

¹² Paytaj nimorqa: Cheqamanta niykichej, qankunataqa mana rejsiykichejchu.

¹³ Allinta qhawakuychej. Mana yachankichejchu ari ima diatachus, chayrí ima horatachus Runaj Churin jamunanta.

Qolqe talentosmanta

¹⁴ Janaj pacha reinoqa rijch'akun uj runa karuman puririshaspa, kamachisninman kapuyninta saqejman.

¹⁵ Ujman phishqa talento qolqeta qorqa, ujmantaj iskayta, ujninmantaj uj talentollata. Ajinata sapa ujman qorqa atisqankuman jina. Chay kikimpachataj karuman ch'usarqa.

¹⁶ Phishqa talentosta jap'ej kamacheqa chay qolqeta, uj jinatawan miracherqa.

¹⁷ Jinallatataj iskay talentosta jap'ejpis, iskaytawan miracherqa.

¹⁸ Uj talentota jap'ejrí, rispa, pampata jusk'uspa chayman pakaykorqa patronnimpa qolqenta.

¹⁹ Kamachispa patronnintaj, unaymanta kutimuspa, paykunamanta cuentata mañarqa.

²⁰ Phishqa talentosta jap'ej kamachitaj, chimpaykuspa jaywarqa uj phishqatawan, nispa: Wiraqochi, phishqa talentosta qowasqaykiwan, kay phishqatawan miracherqani.

²¹ Patronnintaj nerqa: Walejpacha junt'aj kamachi; pisi kajpi qanqa allinta ruwaspa junt'arqanki, kunantaj astawan ashkhata qosqayki, patronniykej kusikuyninmantaj yaykuy.

²² Chaymantaqa iskay talentosta jap'ejñataj chimparqa, nispa: Wiraqochi, kay iskay talentosta qowarqanki, chaywantaj kay iskaytawan miracherqani.

²³ Patronnintaj payman nerqa: Walejpacha junt'aj kamachi, pisipi allinta junt'arqanki, kunanqa astawan ashkhata qosqayki; patronniykej kusikuyninmantaj yaykuy.

²⁴ Uj talentota jap'ejtaj chimpaykuspa nerqa: Wiraqochi, rejserqayki phiña runa kasqaykita, mana tarpuspalla cosechasqaykita, jinallataj mana t'akaspalla oqharisqaykita.

²⁵ Chayrayku, manchachikuspa jallp'aman p'ampaykamorqani qolqeykita. Kayqa, jap'ikapuy qolqeykita.

²⁶ Patronnintaj payman nerqa: Sajra, qhella kamachi, yacharqankichu mana tarpuspalla cosechasqayta jinallataj mana t'akaspalla oqharisqayta?

²⁷ Jina kajteyqa, bancoman churanayki karqa, kutimuspataj qolqeyta miraynintawan orqhokapunaypaj.

²⁸ Qhechuychej chay qolqe talentota, chunka talentosniyojmantaj qoychej.

²⁹ Kapuyniyojmanqa qosqa kanqa, astawan kapuyniyoj kanampaj; pisi kapuyniyojmantataj, pisi kapusqampis qhechusqa kanqa.

³⁰ Chay qhella kamachitaqa, jawa laqhaman wijch'uychej; chaypitaj waqay, kiru k'arukuytaj kanqa.

Qhepa kaj juiciomanta

³¹ Maypachachus Runaj Churenqa, Rey jina k'anchaynimpi, tukuy angelesninwan jamonqa, chaypacha lliphipej tronompi tiyaykukonqa.

³² Tukuynejmantataj tukuy laya runas ñaupaqenman tantakamonqanku. Paytaj ujkunata ujkunamanta t'aqanqa; imaynatachus michejpis, ovejasta cabrasmanta wajman t'aqan, ajinata.

³³ Ovejasta pañanman churanqa, cabrastataj lloq'enman.

³⁴ Chaymantataj Reyqa, pañampi kajkunaman nenqa: Jamuychej Tataypa ajllasqasnin, jap'ikapuychej qankunapaj qallariymantapacha wakichisqa reinota.

³⁵ Yarqhasqa kashajtiy, mikhuchiwarqankichej; ch'akiyniyoj, ujyachiwarqankichej; forastero kashajtiy, wajyariwarqankichej.

³⁶ P'achamanta usushajtiy, p'achallichiwarqankichej; onqosqa kashajtiy, watukuwarqankichej; carcelpi kashajtiypis, jamuwarqankichej.

³⁷ Cheqa kajta ruwajkunataj nenqanku: Señor, mayk'ajtaj yarqhasqata rikususpa mikhuchisorqayku; chayrí ch'akiyniyoj kashajtiyki ujyachisorqayku?

³⁸ Mayk'ajtaj, forasterota rikuspa wajyarerqayku; chayrí p'achamanta usushajtiyki p'achallicherqayku?

³⁹ Mayk'ajtaj onqosqata, chayrí carcelpi kashajtiykipis watukorqayku?

⁴⁰ Reytaj paykunaman kutichenqa: Cheqamanta niykichej, imallatapis chay juch'uy ujnin kaj wauqeypaj ruwarqankichej chayqa; noqa kikiypaj ruwarqankichej.

⁴¹ Chantá lloq'empi kajkunamantaj nenqa: Riychej kaymanta, sajra runas, wiñay nina larwayman; mayqenchus wakichisqa kashan supaypaj, chantá angelesnimpaj ima.

⁴² Yarqhasqa kashajtiy, mana mikhunata qoriwarqankichejchu; ch'akichikojtiytaj, yakuta mana jaywariwarqankichejchu.

⁴³ Forastero kashajtiy, mana wajyariwarqankichejchu; p'achamanta usushajtiy, mana p'achata qowarqankichejchu; onqosqa, carcelpitaj kashajtiypis, mana watukuwarqankichejchu.

⁴⁴ Paykunapis nillanqankutaj: Señor, mayk'ajtaj rikusorqayku yarqhasqata, ch'akichikojta, forasterota, p'achamanta pisichikojta, onqosqata, carcelpi wisq'asqata ima, manataj yanapasorqaykuchu?

⁴⁵ Señortaj paykunaman nenqa: Cheqamanta niykichej, kay juch'uy ujnin kaj wauqeypaj, mana imata ruwaporqankichejchu chayqa; nillataj noqapajpis ruwapuwarqankichejchu.

⁴⁶ Kaykunataj, wiñay ñak'ariyman renqanku; cheqan kajta ruwajkunataj, wiñay kausayman renqanku.