San Mateo 23 - Qheshwa Biblia DC

Fariseoswan leymanta yachachejkunawan

^1-2 Chaymantaqa Jesús parlarqa runasman, yachachisqasninman ima, nispa: Fariseosqa leymanta yachachejkunawan, Moisespa yachachisqanta yachachinku.

³ Imatachá nisunkichej, chayta kasuychej, ruwaychejtaj; amataj sajra ruwasqankuta ruwaychejchu. Paykunaqa parlallanku, manataj ruwankuchu.

⁴ Llasa q'epista, mana oqhariy atinasta, runasman q'epirichinku; paykunataj mana dedollankuwampis chay q'epista kuyurichinkuchu.

⁵ Paykunaqa tukuy imasta ruwanku, runaswan rikuchikunankupaj. Escriturasmanta pisi palabras escribisqata frentesninkuman, makisninkuman ima mayt'uykunku. Jatuchaj flecosniyoj p'achastataj churakunku.

⁶ Jatun mikhuykuna pipis ñaupajpipuni tiyayta munanku; jinallatataj sinagogaspipis.

⁷ Plazaspi runaswan napaykuchikuyta, maestro nichikuyta ima munanku.

⁸ Qankunarí, ama maestro nichikunkichejchu, imaraykuchus ujlla Maestroykichejqa, chayqa Cristo. Qankunaqa, tukuyniykichej hermanos kankichej.

⁹ Ama pitapis tatáy ninkichejchu kay pachapeqa; imaraykuchus ujlla Tataykichejqa, paytaj janaj pachapi kashan.

¹⁰ Ama maestros nichikuychejchu, imaraykuchus Maestroykichejqa ujlla, chayqa Cristo.

¹¹ Qankunamanta kuraj kajqa, kamachiykichej kachun.

¹² Jatunchakojqa, k'umuykachachisqa kanqa; k'umuykukojtaj, jatunchasqa kanqa.

¹³ Ay qankunamanta leymanta yachachejkuna, fariseos puraj uyas! Qankunaqa, janaj pacha reinota wisq'ankichej runakunamanta; manataj qankuna yaykunkichejchu, nitaj yaykuyta munajkunatapis saqenkichejchu yaykunankuta. [

¹⁴ Ay qankunamanta leymanta yachachejkuna, fariseos puraj uyas! Viudaspa wasisninkuta ch'inyachinkichej, ch'aukiyankichejtaj unay unayta rezaspa; chayrayku qankunaqa astawan ñak'arinkichej.]

¹⁵ Ay qankunamanta leymanta yachachejkuna, fariseos puraj uyas! Qankunaqa mar qochanta, tukuy jallp'asnejta ima purinkichej, uj runallatapis t'aqaykichejman pusaykunaykichejpaj; payta jap'ispataj, infiernoj wawanman tukuchinkichej qankunamanta astawan, iskay kutikama.

¹⁶ Ay qankunamanta, ciegos kashaspa pusaykachajkuna! Qankuna yachachinkichej: Pillapis templorayku jurajqa, mana juchayojchu; temploj qorinrayku jurajmá juchayojqa.

¹⁷ Wampus, ciego runas! Mayqentaj aswan kurajrí: Temploj qorinchu, chayrí qorita llimphuchaj templochu?

¹⁸ Chaymanta yachachillankichejtaj: Pillapis altar jawa jurajqa, mana juchayojchu; chantá pichá, altar patapi kashaj rikuchikurayku jurajmá juchayojqa, nispa.

¹⁹ Wampus, ciego runas! Mayqentaj aswan allinri: Rikuchikuchu, chayrí rikuchikuta llimphuchaj altarchu?

²⁰ Pipis altar jawa jurajqa, altar patapi kajkunapajwan juran.

²¹ Templorayku jurajpis, mana temploraykullachu juran; astawanqa, chaypi tiyakoj Diosrayku.

²² Janaj pacharayku jurajpis, Diospa trononrayku juran, pichá chaypi tiyashan chayrayku ima.

²³ Ay qankunamanta, leymanta yachachejkuna, fariseos puraj uyas! Qankunaqa diezmota qonkichej mentamanta, anismanta, cominomanta ima. Leypi aswan allin kajtataj mana kasunkichejchu: Cheqan kajta, khuyakuyta, creeyta ima. Kaykunata ruwanaykichej karqa, ama chay ujkunata saqespa.

²⁴ Pusaykachajkuna, ciego runas, ch'uspita ch'umankichej, camellotataj oqoykunkichej.

²⁵ Ay qankunamanta, leymanta yachachejkuna, fariseos puraj uyas! Qankunaqa vasota, chuwatapis jawallanta mayllankichej; ukhuykichejrí suwanawan, millay kausaywan ima, junt'a kashan.

²⁶ Ciego fariseo, ñaupajta mayllay vasoj ukhunta, chuwaj ukhuntawan; ajinamanta jawampis llimphu kanampaj.

²⁷ Ay qankunamanta, leymanta yachachejkuna, fariseos puraj uyas! Qankunaqa yurajchasqas sepulturasman rijch'akunkichej. Chay sepulturasqa jawamanta k'achitus rikukunku. Ukhunkurí aya tullus, tukuy millay asnawan ima, junt'a kashanku.

²⁸ Ajinallatataj qankunapis, jawamantaqa cheqan kaj runasman rijch'akunkichej; ukhuykichejpirí, puraj uya kaywan, juchawan ima junt'a kashankichej.

²⁹ Ay qankunamanta, leymanta yachachejkuna, fariseos puraj uyas! Qankunaqa profetaspa sepulturasninta sayarichinkichej; ajinallatataj, cheqan kaj runaspa sepulturasnintapis k'achanchankichej.

³⁰ Ninkichejtaj: Sichus ñaupa tatasninchejpa p'unchaynimpi kausasunman karqa chayqa, profetasta wañuchiyta mana yanapasunmanchu karqa.

³¹ Chay nisqaykichejwanqa qankunallataj willakunkichej, profetasta wañuchejkunaj wawasnin kasqaykichejta.

³² Qankunapis tatasniykichejpa tupunta junt'achillaychejña!

³³ Sierpes, katarikunaj miraynin! Imaynatataj infiernopaj juchachasqa kanaykichejmanta ayqenkichejri?

³⁴ Chayrayku kachamusaj profetasta, yachayniyojkunata, escribejkunata ima. Qankunataj wakinta wañuchinkichej, wakinta chakatankichej, wakinta wañuchinkichej, wakintataj sinagogasniykichejpi jasut'inkichej, wakintarí llajtamanta llajta qhatiykachankichej.

³⁵ Mana juchayojkunaj yawarnin, kay jallp'a patapi jich'akusqan qankunaj pataykichejman jamonqa, cheqan kaj Abelpa yawarninmantapacha, Zacariaspa yawarninkama, pichus Berequiaspa wawan karqa. Paytaqa templopi, altar qayllapi wañucherqankichej.

³⁶ Cheqamanta niykichej, kay tukuy imasqa jamonqa kay tiempo runaspa patanman.

Jesús llakikun Jerusalenmanta

³⁷ Jerusalén, Jerusalén, profetasta wañuchej, qanman kachamusqastapis rumiswan ch'anqaj! Mashkha kutitachus wawasniykita tantayta munarqani, imaynatachus wallpa chillwisninta lijrasnin uraman tantaykun ajinata, qantaj mana munarqankichu.

³⁸ Qhawankichej, wasiykichejqa ch'usajpacha qhepakonqa.

³⁹ Chayrayku niykichej, kunanmantaqa manaña rikuwankichejchu: Yupaychasqa kachun, Señorpa sutimpi jamojqa!, ninaykichejkama.