San Mateo 22 - Qheshwa Biblia DC

Rey banqueteta wakichin

^1-2 Jesús ujtawan parlarqa paykunaman rijch'anachinaswan, nispa: Janaj pacha reinoqa rijch'akun, uj rey, wawan casarakushajtin jatun mikhuyta wakichejman.

³ Kamachisninta kacharqa, jatun mikhuyman wajyasqasta pusamojta, paykunataj mana jamuyta munarqankuchu.

⁴ Ujtawan waj kamachisnintañataj kacharqa, nispa: Tukuy ima wakichisqaña, jamullachunkuña; wira uywasta, wira torosta ima ñak'achiniña. Chayrayku jamullachunkuña jatun mikhuyman.

⁵ Paykunataj mana kasuspa, ujnin chajranman riporqa, ujnintaj qhatoj.

⁶ Wakinkunataj, reypa kachasninta jap'ispa maqarqanku, wañucherqankutaj.

⁷ Reytaj chayta uyarispa phiñakorqa, uj tropa soldadosnintataj kacharqa, chay runa wañuchista tukuchinankupaj; llajtankutataj ruphaykuchinankupaj.

⁸ Chaymantataj wakin kamachisninman nerqa: Cheqamanta jatun mikhoyqa wakichisqa kashan, wajyachisqasniytaj mana jatun mikhuyniypaj jinachu kanku.

⁹ Kunanqa riychej, ñankunapi tarisqaykichejtakama banqueteman wajyamuychej.

¹⁰ Kamachistaj ñankunaman llojsispa tarisqankutakama wajyarqanku, allin mana allin kajkunata. Ajinamanta casamiento wasiman runasta junt'aykuchimorqanku mikhunankupaj.

¹¹ Reytaj wajyasqasta qhawaj yaykorqa; chaypitaj uj runata rikorqa, mana casamiento p'achayojta.

¹² Nerqataj: Kausaqéy, imajtintaj kayman yaykumorqanki mana casamiento p'achayojri? Paytaj ch'inlla karqa.

¹³ Reytaj kamachisninman nerqa: Chakin makin watasqata jawa laqhaman wijch'uychej; chaypitaj waqay, kiru k'arukuytaj kanqa.

¹⁴ Wajyasqasqa ashkhas, ajllasqastajrí pisis kanku.

Impuestota qonamanta

¹⁵ Fariseostaj riytawan tantakuspa yachachinakorqanku, ima parlasqallampipis Jesusta ch'ataykunankupaj.

¹⁶ Paykunataj kacharqanku partenkumanta kajkunata, herodianostawan; Jesusman nimunankupaj: Maestro, yachayku qan cheqan sonqo kasqaykita, Diospa ñanninta cheqanta yachachisqaykita; mana runaj parlasqanta kasuspa. Qanqa mana runaj rijch'aynillantachu qhawanki.

¹⁷ Ima ninkitaj: Allinchu kanman impuestota Cesarman qona, manachu?

¹⁸ Jesustaj, sajra yuyayninkuta yachaspa nerqa: Puraj uyas. Imaraykutaj pantachiwayta munankichej?

¹⁹ Rikuchiwaychej impuesto qolqeta. Paykunataj, uj denario qolqeta jaywarqanku.

²⁰ Jesustaj paykunata taporqa: Pejpa uyantaj kay, pejpa sutintaj kay churasqa?

²¹ Paykunataj kuticherqanku: Cesarpata, nispa. Chaypachataj paykunaman nerqa: Cesarpata kajtaqa, Cesarman qopuychej; Diospata kajtataj, Diosman qopuychej.

²² Kayta uyarispa t'ukorqanku; riporqankutaj Jesusta saqerparispa.

Wañusqas kausarimunankumanta

^23-24 Chay p'unchayllapitaj, saduceos Jesusman jamorqanku. Paykunaqa ninku, wañusqasmanta kausarimuy mana kasqanta. Jesustataj taporqanku, nispa: Maestro, Moisesqa nerqa: Pillapis, mana wawasniyoj wañunman chayqa, wauqen casarakuchun chay viudawan, wauqempa miraynin rikhurinampaj.

²⁵ Noqayku ukhupi qanchis wauqes karqanku. Ñaupaj kaj casarakorqa, warmimpi mana wawan karqachu, wañuporqataj, warmintaj cuñadonwan casarakaporqa.

²⁶ Ajinallataj karqa iskay kajwan, kinsa kajwampis. Ajinamanta qanchisnintin wañuporqanku.

²⁷ Tukuyninkoj qhepantataj, chay warmipis wañupullarqataj.

²⁸ Chantá, kausarimuypeqa, mayqenninkoj warmintaj kanqa, qanchisnintin kausarimojtinkuri? Qanchisnintinwan casarakorqaqa.

²⁹ Jesustaj paykunaman kuticherqa: Qankunaqa pantasqas kankichej, mana Escriturasta rejsisqaykichejrayku, nitaj Diospa atiynintapis.

³⁰ Wañusqasmanta kausarimuypeqa manaña casaranqankuchu; nitaj casarachenqankuchu. Janaj pachapeqa, Diospa angelesnin jina kanqanku.

^31-32 Wañusqakunaj kausarimuyninmantaqa, manachu leerqankichej, Dios imatachus nisorqachej, chayta? Ajinata nerqa: Noqa Abrahampata, Isaacpata, Jacobpata ima Diosnin kani. Mana Diosqa wañusqaspa Diosninchu, astawanqa kausajkunajta.

³³ Kay imasta uyarispataj runasqa, yachachiyninmanta t'ukorqanku.

Jatun kaj kamachiy

³⁴ Fariseostaj tantakorqanku, saduceosta Jesús ch'inyachisqanta yachaspa.

^35-36 Paykunamanta ujnin, leymanta yachachejtaj, pantachiyta munaspa taporqa: Maestro, leypa kamachiynimpi mayqentaj aswan jatunri?

³⁷ Jesustaj kuticherqa: Señor Diosniykita munakunki tukuy sonqoykiwan, tukuy almaykiwan, tukuy yuyayniykiwantaj.

³⁸ Kaymin leypa kamachiynimpi aswan jatun, ñaupaj kajtaj.

³⁹ Iskay kaj kamachisqaqa, ñaupaj kajman rijch'akun: Runa masiykita munakunki qan kikiykita jina.

⁴⁰ Kay iskay kamachiykunapi tukuy ley junt'akun, profetaspa nisqankupis.

Pejpa churintaj Cristori?

^41-42 Fariseos tantasqa kashajtinku, Jesús paykunata taporqa, nispa: Ima ninkichejtaj Cristomanta, pejpa Churintajri? Paykunataj kuticherqanku: Davidpa Churin, nispa.

^43-44 Jesustaj nerqa: Imaraykutaj Davidqa, Espiritupi payta Señor nerqari?, nispa: Señorqa Señorniyman nerqa: Tiyakuy pañaynejpi, enemigosniykita chakisniyki uraman churanaykama.

⁴⁵ David kikinchus payta Señor nin chayqa, imaynamantataj Cristoqa Davidpa churin kanmanri?

⁴⁶ Mana pipis kutichiyta aterqachu; manañataj astawan taporqankuchu.