San Mateo 18 - Qheshwa Biblia DC

Pitaj aswan kurajri?

¹ Chaypacha, yachachisqas Jesusman qayllaykuspa taporqanku: Pitaj aswan kuraj janaj pacha reinopiri?

^2-3 Jesustaj uj wawata wajyaspa, paykunaj chaupinkuman sayaykucherqa, nerqataj: Cheqamanta niykichej. Manachus kutirikuwajchej, nitaj wawaman jina tukuwajchej chayqa, mana janaj pacha reinoman yaykunkichejchu.

⁴ Pillapis kay wawa jina llamp'u sonqoyoj kanman chayqa, janaj pacha reinopi tukuymanta aswan kuraj kanqa.

⁵ Pichus noqaj sutiypi wajta kay wawata jina jap'ejqa, noqata jap'iwan.

Juchallichejkuna

⁶ Pillapis kay juch'uykunamanta, noqapi creejkunata ujninta misk'achinman chayqa, aswan allin kanman chay runapaj, burros muyuchinku chay molino rumiwan kunkanman warkhuykusqa, qocha ukhuman wijch'usqa kananqa.

⁷ Ay, kay mundopi misk'anasmanta! Misk'anas jamonqankupuni. Ay, jaqay runamanta, piraykuchus misk'ay jamonqa!

⁸ Chayrayku makiykichus, chayrí chakiykichus juchaman urmachisunkiman chayqa; khuchuytawan wijch'uy. Aswan allintaj kanqa, ch'ulla maki, chayrí ch'ulla chakilla kausayman yaykunaykeqa. Manataj walejchu kanman iskaynin makisniykiwan, chayrí iskaynin chakisniykiwan wiñay larwayman yaykunaykeqa.

⁹ Ñawiykitajchus juchaman urmachisunkiman chayqa, sik'iytawan wijch'uy. Aswan allin kanqa, uj ñawiyojlla kausayman yaykunayki. Manataj walejchu kanman iskaynin ñawisniyoj nina infiernoman wijch'usqa kanayki.

¹⁰ Ama mayqenta, kay juch'uykunamanta qhesachankichejchu. Noqaqa niykichej, paykunaj angelesninkoqa qhawashankupuni janaj pachapi kaj Tataypa uyanta. [

¹¹ Runaj Churenqa chinkasqasta salvaj jamorqa.]

Chinkasqa oveja

¹² Imaynataj rijch'asunkichej? Uj runachus pachaj ovejasniyoj kaspa, ujnin ovejan chinkanman chayqa, manachu isq'on chunka isq'onniyojta orqopi saqespa, chinkasqa kajta mask'aj rinman?

¹³ Cheqamanta niykichej, chinkasqa ovejanta tarikapuytawan maytapuni kusikun, isq'on chunka isq'onniyoj mana chinkajkunamanta nisqaqa.

¹⁴ Ajinallatataj, janaj pachapi kashaj Tataykichej mana munanchu ujllapis kay juch'uykunamanta chinkananta.

Wauqenchejta k'aminamanta

¹⁵ Chayrayku, wauqeyki contraykita juchallikojtenqa sapallampi payta k'amiy. Chay nisqaykita kasusonqa chayqa, wauqeykita allin kausayman churanki.

¹⁶ Mana uyarisojtinrí, ujta, chayrí iskay runata pusakuy; iskay, chayrí kinsa testigospa nisqanwan juchan sut'inchakunampaj.

¹⁷ Paykunatapis mana uyarejtenqa iglesiaman willay, iglesiatapis manallataj uyarejtinrí, gentil runata jina, chayrí impuesterota jinallaña qhaway.

¹⁸ Cheqamanta niykichej: Imatachus qankuna kay mundopi watankichej chayqa, janaj pachapipis watasqallataj kanqa. Ajinallatataj, imatachus kay mundopi phaskarankichej chayqa, janaj pachapipis phaskarasqallataj kanqa.

¹⁹ Cheqamanta niykichej, sichus qankunamanta iskay ukhu kay mundopi uj sonqolla kawajchej, Diosmanta mañakunaykichejpaj chayqa, janaj pachapi kashaj Tatay, tukuy mañakusqaykichejta qosonqachej.

²⁰ Maypichá iskay, chayrí kinsa, noqaj sutiypi tantakunku chayqa, chaypi paykunaj chaupinkupi kani.

^21-22 Pedrotaj Jesusman qayllaykuspa nerqa: Señor, wauqey noqapaj juchallikojtenqa, mashkha kutitataj juchasninta perdonasajri? Qanchis kutitachu? Jesustaj payman kuticherqa: Noqa niyki. Mana qanchis kutikamallachu; astawanqa, qanchis chunka kuti qanchiskamaraj.

Mana khuyakuyniyoj kamachi

²³ Chayrayku janaj pacha reinoqa rijch'akun, uj rey kamachisninmanta cuentata mañajman.

²⁴ Cuentata mañayta qallarejtintaj, chunka waranqa talento qolqe manuyoj kamachinta pusachimorqa.

²⁵ Mana imaynapi manunta junt'ayta atejtintaj, rey kamacherqa pay vendesqa kananta, chantá, warmin, wawasnin, tukuy imasninwan; ajinamanta manunta junt'anampaj.

²⁶ Chantá, kamacheqa reypa ñaupaqenman qonqoriykukuspa, maytapuni mañakorqa: Señor, suyarillawayraj ari, chantá tukuyninta qopullasqayki.

²⁷ Señornintaj khuyakoj sonqoyoj kaspa, qolqe manunta perdonaporqa, kachariporqataj.

²⁸ Chaymanta ripuspataj, uj kamachi masinwan tinkukorqa, chaytaj pachaj denario qolqe manun karqa. Kunkanmanta jap'ispataj yaqha sipirparerqa: Qolqeyta qopuway, nispa.

²⁹ Kamachi masintaj ñaupaqenman qonqoriykukuspa mañakorqa, nispa: Suyarillaway ari, tukuyninta qopullasqayki.

³⁰ Paytaj mana uyariyllatapis munarqachu, carcelmantaj wisq'aykucherqa, chay manunta junt'anankama.

³¹ Wakin kamachi masisnintaj chayta rikuspa maytapuni llakikorqanku, rispataj Señorninkuman willaykamorqanku maychus kasqanta.

³² Señorninkutaj wajyachispa nerqa: Sajra kamachi, noqaqa tukuy manuykita perdonarqayki, khuyay khuyayta mañakuwasqaykirayku.

³³ Manachu qampis kamachi masiykita khuyanayki karqa, imaynatachus noqapis qanta khuyarqayki, ajinata?

³⁴ Señornintaj, phiñakuspa ñak'arichej, runaswan jap'icherqa, tukuy manunta junt'anankama.

³⁵ Kikillantataj qankunatapis, janaj pachapi kashaj Tatayqa ruwasonqachej; manachus sapa ujniykichej wauqesniykichejta tukuy sonqo juchasninkumanta perdonawajchej chayqa.