San Mateo 17 - Qheshwa Biblia DC

Jesús waj jinaman tukun

¹ Sojta p'unchay qhepatataj Jesús wajyarqa Pedrota, Santiagota wauqen Juantawan. Paykunata pusariykukuspataj, uj jatun orqoman wicharerqa.

² Paykunaj ñaupaqenkupitaj Jesusqa uj jinaman tukorqa. Uyanqa inti jina k'ancharerqa; p'achantaj yurajman tukorqa, k'anchay jina.

³ Chay kikimpachataj Moisés, Elías ima, paykunaman rikhurimuspa Jesuswan parlasharqanku.

⁴ Pedrotaj Jesusman nerqa: Señor, walej kanman kaypi qhepakapunanchej! Munajtiykeqa kinsa ch'ujllasta kaypi ruwasqayku: Ujta qampaj, ujta Moisespaj, ujtataj Eliaspaj.

⁵ Ajinata Pedro parlashajtillanraj, ujllata k'ancharishaj phuyu paykunata pakaykorqa. Chay phuyu ukhumantataj uj voz nimorqa: Kaymin munasqa Chureyqa, paywan ancha kusisqa kani. Payta uyariychej.

⁶ Yachachisqasnintaj kayta uyarispa, pampakama k'umuykukorqanku; imaraykuchus sinch'itapuni mancharikorqanku.

⁷ Jesustaj qayllaykuspa paykunata llankharerqa, nerqataj: Sayariychej, ama mancharikuychejchu.

⁸ Qhawarispataj Jesusllata rikorqanku, manataj pitapis.

⁹ Orqomanta uraykamuspataj, Jesús kamacherqa: Kay rikusqaykichejta ama pimampis willankichejchu, Runaj Churin wañusqasmanta kausarimunankama, nispa.

¹⁰ Yachachisqasnintaj Jesusta taporqanku: Imaraykutaj leymanta yachachejkuna ninku, Eliasraj ñaupajta jamunantari?

¹¹ Paytaj kuticherqa: Arí, cheqatapuni Eliasraj ñaupajta jamonqa; tukuy imatapis maychus kajman churanqa.

¹² Noqa niykichej, Eliasqa jamorqaña. Mana rejsispataj, munayninkuman jina payta ñak'aricherqanku. Ajinallatataj Runaj Churintapis ñak'arichenqanku.

¹³ Chaypacha yachachisqasnenqa entienderqanku Jesusqa Juan Bautistamanta parlasqanta.

Jesús thañichin t'ukuyojta

^14-15 Ashkha runa kasharqa, chayman chayajtinkutaj, ujnin Jesusman qayllaykorqa, ñaupaqenman qonqoriykukuspataj, nerqa: Señor, wawayta khuyaripuway ari; imaraykuchus t'ukuyoj, anchatataj ñak'arichishan. Ashkha kutita ninaman urmaykun, yakumampis.

¹⁶ Yachachisqasniykiman pusamorqani, manataj thañichiyta aterqankuchu.

¹⁷ Jesustaj kutichispa, nerqa: Mana feniyoj sajra runaj miraynin! Mayk'ajkamataj qankunawan kasajri? Mayk'ajkamataj qankunawan pacienciakusajri? Pusamuychej kayman.

¹⁸ Jesús payta k'amejtinkamataj, supayqa llojserqa paymanta. Chaymantapacha chay wawaqa thañikaporqa.

¹⁹ Chaymantataj, yachachisqas Jesusman qayllaykuspa, sapallampi taporqanku: Imaraykutaj noqayku, supayta mana qharqoyta aterqaykuchu?

²⁰ Paytaj kuticherqa: Pisi feniykichejrayku. Cheqamanta niykichej, sichus mostaza muju chhikallampis feniykichej kanman chayqa, kay orqota niwajchej: Kaymanta jaqayman ithiriy, nispa; rinmantaj. Mana imapis qankunapaj kanmanchu mana atikojqa. [

²¹ Kay laya supaytaqa, Diosmanta mañakuspa, ayunaspataj qharqoyta atinchej.]

Jesús ujtawan willan wañunanmanta

^22-23 Jesúsqa Galileapi kashaspa, yachachisqasninman nerqa: Runaj Churinta enemigosnin runaswan jap'ichenqanku, wañuchenqankutaj. Kinsa p'unchaymantataj kausarimonqa. Yachachisqasnintaj chayta uyarispa mayta llakikorqanku.

Impuestota qonamanta

²⁴ Capernaumman chayasqankutawantaj, Pedroman qayllaykorqanku iskay dracmasta cobrajkuna, nispa: Manachu Maestroykichejqa iskay dracma qolqeta paganqa?

²⁵ Pedrotaj kuticherqa: Arí, nispa. Wasiman yaykushajtintaj, Jesús payman nerqapacha: Imaynataj rijch'asunki Simón? Kay mundopi reyesqa, pimantataj yanapata, chayrí impuestota mañanku, wawasninkumantachu, chayrí waj runasmantachu?

²⁶ Pedrotaj kuticherqa: Waj runasmanta cobranku. Jesustaj nerqa: Arí, jina kajtenqa wawasninku mana impuestota pagankuchu.

²⁷ Chaywampis, ama rimanankupaj; qochaman rispa anzuelota choqamuy. Ñaupajta chhallmamoj challwatataj orqhoy, siminta kicharispataj tarinki uj estatero qolqeta; chaytataj qanmanta noqamantawan qomuy.