San Mateo 14 - Qheshwa Biblia DC

Juan Bautistaj wañuynin

¹ Jaqay p'unchaypi, Galileapi kamachej Herodes, Jesuspa milagrosninmanta uyarerqa.

² Kamachisqasninmantaj nerqa: Chayqa Juan Bautista, wañusqasmanta kausarimun. Chayrayku payqa milagrosta ruwan.

³ Herodesqa Juanta jap'icherqa, watachispataj carcelman wisq'aykucherqa Felipej wauqempa warmin Herodiasrayku.

⁴ Juanqa Herodesman nerqa: Mana atinkichu warmiykipaj jap'ikapuyta.

⁵ Chayrayku Herodesqa Juanta wañuchiyta munarqa. Runasta manchachikuspataj mana imanayta aterqachu, imaraykuchus tukuy runas yacharqanku payqa profeta kasqanta.

⁶ Herodespa diachakumpi, Herodiaspa ususin tukorqa tukuy runaspa ñaupaqenkupi. Paytaj Herodesta mayta kusicherqa.

⁷ Chayrayku Herodesqa juramentota ruwaspa nerqa: Imatachus mañakuwasqaykita qosqayki, nispa.

⁸ Sipastaj mamampa yuyaychasqan kaspa, Herodesman nerqa: Juan Bautistaj umanta qoway kay pampa chuwapi.

⁹ Rey Herodestaj chayta nejtinkama, jurasqanrayku llakikorqa. Chaypi kajkuna rikusqankuraykutaj, kamacherqa Juampa umanta qonankuta.

¹⁰ Kamacherqataj carcelman rispa Juampa umanta qholumunankuta.

¹¹ Chaymantataj, Juampa umanta pampa chuwapi apamuspa sipasman jaywarqanku, paytaj mamanman jaywallarqataj.

¹² Chay qhepatataj, Juampa yachachisqasnin jamuspa ayata oqharikaporqanku; p'ampaykuspataj Jesusman willamorqanku.

Jesús phishqa waranqa runasman mikhuchin

¹³ Jesustaj chayta uyarispa, jaqaymanta sapallan botepi ch'innejman rerqa. Runastaj risqanta yachaytawan, tukuy llajtasmanta chakipi rerqanku payta taripaj.

¹⁴ Jesusqa botemanta llojsishaspa ashkha runata rikorqa. Paykunata khuyaspataj, onqosqasninkuta thañicherqa.

¹⁵ Ch'isiyaykuytataj, yachachisqasnin payman qayllaykuspa nerqanku: Ch'impacha kaynejqa, astawantaj ch'isiyaykushanña. Chayrayku kachapullayña runasta, ranchosman rispa mikhunata rantikamunankupaj.

¹⁶ Jesustaj paykunaman nerqa: Mana riponqankuchu, qankuna mikhunata qoychej.

¹⁷ Paykunataj kuticherqanku: Kaypeqa phishqa t'antas, iskay challwasllawan kapuwayku.

¹⁸ Jesustaj nerqa: Chaykunata kayman apamuychej.

¹⁹ Runastataj kamacherqa ch'iki pasto pataman tiyarakunankuta. Chaymantataj phishqa t'antasta, iskay challwastawan oqharispa, janaj pachata qhawarispataj graciasta qorqa. T'antasta partispataj yachachisqasninman jaywarqa, paykunataj runasman jaywarqanku.

²⁰ Tukuyninkutaj mikhorqanku sajsakunankukama. T'anta puchojtaqa chunka iskayniyoj canastas junt'astaraj oqharerqanku.

²¹ Mikhojkunaqa phishqa waranqa qharis karqanku, mana yupaspa warmista, nitaj wawasta.

Jesús yaku patata purin

²² Chaypacha Jesús yachachisqasninta kamacherqa boteman wicharinankuta, ñaupashanankupaj qocha chimpaman runasta pay kacharpayanankama.

²³ Runasta kacharpayaspataj, sapallan orqoman wicharerqa Diosmanta mañakoj. Tutayaykuytataj pay sapan jaqaypi kasharqa.

²⁴ chaykamataj boteqa qocha chaupitaña risharqa. Yakutaj qhollchoqeyaspa, kayman jaqayman boteta apaykachasharqa, contrankupi sinch'ita wayramusqanrayku.

²⁵ Jesustaj sut'iyamuytaña, yaku patata purispa paykunaman jamorqa.

²⁶ Yachachisqasnintaj yaku patata purejta rikuspa mancharikorqanku, qhaparerqankutaj: Almaqa!, nispa.

²⁷ Kikimpachataj Jesús parlapayamuspa nerqa: Kallpachakuychej. Noqa kani, ama mancharikuychejchu!

²⁸ Pedrotaj kutichispa nerqa: Señor, qan kanki chayqa, niway kay yaku patata qanman jamunayta.

²⁹ Paytaj nerqa: Jamuy. Pedrotaj, botemanta uraykuytawan, yaku patanta Jesusman risharqa.

³⁰ Sinch'i wayrata reparaspataj manchachikorqa; yakuman chinkaykoj jina kaspataj, qhaparispa nerqa: Señor, salvaway!

³¹ Jesustaj usqhayta makinta aysarispa, payta jap'iykorqa nerqataj: Pisi feniyoj runa, imaraykutaj iskayrayankiri?

³² Boteman wicharejtinkukamataj, wayraqa thañikaporqa.

³³ Botepi kajkunataj, Jesusman qayllaykuspa k'umuykukorqanku: Cheqamanta qanqa Diospa Churin kanki, nispa.

Genesaretpi Jesús onqosqasta thañichin

³⁴ Qocha chimpaman rispataj, Genesaret jallp'aman jamorqanku.

³⁵ Chay llajtayoj runastaj, Jesusta rejsiytawan tukuynejman willaracherqanku. Tukuy onqosqastataj payman apamorqanku.

³⁶ Paykuna Jesusmanta mañakorqanku, p'achampa cantollantapis onqosqas llankharinankuta. Tukuy llankharejkunataj thañikaporqanku.