San Mateo 12 - Qheshwa Biblia DC

Yachachisqas trigo umasta pallanku

¹ Chaypacha Jesús, samakuna diapi trigo chajraspa chaupinta risharqa. Yachachisqasnintaj yarqhachikuspa qallarerqanku trigo umasta p'itiyta, mikhorqankutaj.

² Fariseostaj chayta rikuspa, Jesusman nerqanku: Qhaway yachachisqasniykita, samakuna diapi mana ruwanata ruwashanku.

³ Jesustaj paykunaman nerqa: Manachu leerqankichej, uj kuti David yarqhachikuspa, paywan kajkunawan imatachus ruwasqanta?

⁴ Diospa wasinman yaykuspa, Diosman jaywasqa t'antasta mikhorqa. Payqa mana mikhunanchu karqa, nitaj paywan kajkunapis; sacerdoteslla chaytaqa mikhunanku karqa.

⁵ Chayrí, manachu leypi leerqankichej, templopi sacerdotes samakuna diata mana junt'asqankuta? Chaywampis mana juchayojchu kanku.

⁶ Noqarí niykichej: Kaypi astawan kuraj kashan templomanta nisqaqa.

⁷ Yachawajchejchus imatachus niyta munan: Khuyakuyta munani, mana uywa wañuchisqatachu. Mana jayk'ajpis juchachawajchejchu mana juchayojkunataqa.

⁸ Runaj Churenqa samakuna diajta Señornin.

Ch'akisqa makiyoj runa

⁹ Chaymanta llojsispataj Jesusqa sinagogankuman rerqa.

¹⁰ Chaypitaj uj makin ch'akisqa runa kasharqa. Runastaj, ch'ataykuyta munaspa Jesusta taporqanku. Atikunchu samakuna diapi onqosqata thañichina?

¹¹ Jesustaj paykunaman nerqa: Pitaj qankunamanta uj ovejayoj kaspa, samakuna diapi ovejan t'oqoman urmaykojtin, mana orqhokapunmanchu?

¹² Chantá manachu runaqa aswan sumajraj ovejamanta nisqaqa? Chayrayku, allin kajtaqa samakuna diapipis ruwana.

¹³ Chantá chay runaman nerqa: Aysariy makiykita. Paytaj makinta aysarerqa, ujnin makin jinataj thañikaporqa.

¹⁴ Fariseostaj llojsiytawan, paykunapura parlarqanku, imaynamantachus Jesusta wañuchinankupaj.

Isaías Jesusmanta profetizarqa

¹⁵ Jesustaj kayta yachaspa riporqa; paywantaj ashkha runas rerqanku. Tukuy onqosqastataj thañicherqa.

¹⁶ Paykunatataj sinch'ita kamacherqa, ama pimampis willanankuta pichus pay kasqanta.

¹⁷ Chayta ruwarqa profeta Isaiaspa nisqan junt'akunampaj:

¹⁸ Kaymin ajllasqa kamacheyqa, munakusqay; paypi almayqa kusikun. Payman qosaj Espirituyta, juiciomantataj tukuy laya runasman willanqa.

¹⁹ Mana churanakonqachu, nitaj qhaparqachanqachu; nillataj pipis callespi vozninta uyarenqachu.

²⁰ Lajrasqa soqosollatapis mana p'akenqachu, nitaj q'osñishaj mechatapis wañuchenqachu, juiciota atipanankama.

²¹ Paypa sutimpitaj gentiles suyayninkuta churanqanku.

Santo Espiritupaj rimajkuna

²² Chaymantataj, pusarqanku Jesusman supayniyoj ciego opa runata, Jesustaj thañicherqa. Ajinamanta payqa parlarerqa, rikorqataj.

²³ Tukuy runastaj t'ukorqanku, nerqankutaj: Manachu kayqa Davidpa Churin kanman?

²⁴ Fariseostaj kayta uyarispa nerqanku: Kay runaqa mana paypa atiyninwanchu supaykunata qharqon; Beelzebú supaykunaj kurajnimpa atiyninwan qharqon.

²⁵ Jesustaj imatachus yuyasqankuta yachaspa, nerqa: Mayqen reinollapis t'aqanaku kajtenqa chinkapun. Jinallatataj uj llajtapi, chayrí familiapipis t'aqanaku kanman chayqa, chinkapullantaj.

²⁶ Ajinallatataj, Satanaschus qharqonman Satanasllatataj chayqa, pay kikin t'aqanasqa kanman. Imaynatataj reinoqa kallanqapunirí?

²⁷ Beelzebujpa atiyninwanchus, supaykunata qharqoni chayqa; qankunaj wawasniykichejrí, pejpa atiyninwantaj paykunata qharqonku? Chayrayku, paykuna kikin juecesniykichej kanqanku.

²⁸ Diospa Espiritumpa atiyninwanchus supaykunata qharqoni chayqa, cheqamanta Diospa reinonqa qankunaman chayamunña.

²⁹ Chayrí imaynatataj pipis, uj kallpasapa runaj wasinman yaykunman, tukuy imasninta qhechoj, manaraj wasiyojta ñaupajta wataykuspari? Chaymantaraj wasintaqa ch'inyachinman.

³⁰ Mana noqawan kajqa, contraypi. Mana noqawan pallajpis, t'akan.

³¹ Chayrayku niykichej: Ima juchallapis, Diospa contranta rimasqapis, pampachasqa kanqa runaspajqa. Santo Espiritupaj sajrata rimasqarí, mana pampachasqachu kanqa.

³² Pillapis Runaj Churimpa contranta rimanman chayqa, juchan pampachasqa kanqa. Pitajchus, Santo Espíritoj contranta rimanman chayqa, mana chay jucha pampachasqachu kanqa kay mundopi, nitaj jamoj mundopipis.

Sach'ataqa poqoynimpi rejsinchej

³³ Allin sach'aqa, allin poqoyta qon. Mana allin sach'arí, mana allin poqoytaqa qon. Chayrayku, sach'ataqa poqoyninnejta rejsinchej.

³⁴ Katarikunaj miraynin! Imaynatataj allinta parlawajchej sajras kashaspari? Sonqopi imachus junt'a kashan, chaymanta simeqa parlan.

³⁵ Allin runaqa, allin waqaychanamanta allin imasta orqhomun. Sajra runatajrí, sajra imasta orqhomun sajra waqaychananmanta.

³⁶ Chayrayku niykichej: Juicio p'unchaypeqa, runas cuentata qonqanku tukuy qhasi mana kajta parlasqankumanta.

³⁷ Allinta parlasqaykirayku salvasqa kanki, sajrata parlasqaykiraykutaj juchachasqa kanki.

Sajra runas señalta mañanku

³⁸ Chaymantataj, Jesusman leymanta wakin yachachejkuna, fariseoswan kuticherqanku: Maestro, munayku uj milagrota rikuchinawaykuta.

³⁹ Jesustaj paykunaman nerqa: Kay sajra, qhenchachakoj runaj miraynenqa, mañan uj señalta. Manataj waj señal qosqachu kanqa paykunaman, profeta Jonaspa señalnillan qosqa kanqa.

⁴⁰ Imaynatachus Jonás, jatun challwaj wijsampi karqa kinsa p'unchayta, kinsa tutatawan; ajinallatataj, Runaj Churimpis kinsa p'unchayta, kinsa tutatawan jallp'aj sonqompi kanqa.

⁴¹ Nínive llajtayojkuna juiciopi jatarimonqanku; kunan p'unchay runastataj juchachanqanku. Ninivemanta kajkunaqa, Jonás predicajtinkama Diosman kutirikorqanku. Kaypitaj kashan Jonasmanta aswan kuraj.

⁴² Ura ladomanta reinapis juiciopi jatarimuspa, kunan p'unchay runasta juchachanqa. Payqa, karu llajtamanta jamorqa Salomompa yachayninta uyarej. Kaypi kajtajrí, Salomonmanta nisqaqa aswan kuraj.

Supay kutiykun

⁴³ Millay supay uj runamanta llojsispaqa, ch'aki jallp'asnejta purin, samakuyta mask'aspa, manataj tarinchu.

⁴⁴ Chaypacha nin: Kutipusaj, maymantachus llojsimorqani chay wasiman. Rispataj taripan ch'usaj wasita, pichasqata, sumaj k'achanchasqatataj.

⁴⁵ Chaymantataj pusamoj rin paymanta aswan millay qanchis supaykunata. Yaykuspataj chaypi tiyakunku; chay runaqa astawan mana allinman tukupun ñaupaj kasqanmanta nisqaqa. Ajinallataj kanqa kay sajra runaj miraynimpajpis.

Jesuspa maman, wauqesnin ima

⁴⁶ Jesús runasman parlashajtillanraj, maman, wauqesnin ima jawapi suyasharqanku paywan parlayta munaspa.

⁴⁷ Uj runataj Jesusman willarqa: Mamayki, wauqesniyki ima jawapi kashanku qanwan parlayta munaspa.

⁴⁸ Jesustaj runaman kuticherqa: Pitaj mamayri? Pikunataj wauqesniy kasqankuri?

⁴⁹ Makinwan yachachisqasninta rikuchispataj, nerqa: Qhawariychej, kaykun kanku mamay, wauqesniypis.

⁵⁰ Pichus janaj pachapi kashaj Tataypa munayninta ruwajmari, wauqeytaj, panaytaj, mamaytaj.