San Mateo 11 - Qheshwa Biblia DC

Juan Bautistaj kachasnin

¹ Jesús, chunka iskayniyoj yachachisqasninman yachachiyta tukuytawan, riporqa yachachej, predicajtaj chay llajtaspi.

^2-3 Juan Bautista carcelpi kashaspa, Cristoj ruwasqasninta uyarispa, iskay yachachisqasninta Jesusman kacharqa tapunankupaj: Qanchu kanki jamunan karqa chay, chayrí, wajtachu suyasqayku?, nispa.

⁴ Jesustaj paykunaman kuticherqa: Rispa Juanman willamuychej imatachus rikusqaykichejta, uyarisqaykichejtawan.

⁵ Ciegos rikunku, cojos puririnku, lepra onqoyniyojkuna llimphuchasqas kanku, lojt'us uyarinku, wañusqas kausarinku, wajchasmampis evangelio willakun.

⁶ Kusikuyniyojmin pichus noqapi mana misk'ajqa.

⁷ Paykuna ripushajtinkutaj, Jesusqa Juanmanta runasman willayta qallarerqa: Imata rikojtaj ch'in pampaman rerqankichej? Wayraj kuyuykachachisqan soqosotachu?

⁸ Chayrí, imatataj qhawaj llojserqankichej? Sumaj llamp'u p'achayoj runatachu? Sumaj p'achayojkunaqa, reyespa wasisnimpi kashanku.

⁹ Chantá, imata qhawajpunitaj llojserqankichejri? Uj profetatachu? Arí, niykichej, profetamantapis astawan kurajtaraj.

¹⁰ Kay Juanmanta escribisqa kashan: Noqa ñaupaqeykita kachamushani willajniyta, ñanta wakichipusunampaj.

¹¹ Cheqamanta niykichej: Tukuy nacikojkunamanta, mana ujpis Juan Bautistamanta nisqaqa aswan kuraj rikhurimorqachu. Janaj pacha Diospa reinompi, aswan juch'uy kajpis, kurajmin paymantaqa.

¹² Juan Bautistaj jamusqanmantapacha, janaj pacha Diospa reinompi kallpashanku, kallpayojkunataj chay reinotaqa jap'inku.

¹³ Tukuy profetas, leypis, Juan jamunankama chay reinomanta willarqanku.

¹⁴ Sichus qankuna Juampa nisqanta creeyta munankichej chayqa, paymin jamunan karqa chay Eliasqa.

¹⁵ Ningrisniyojqa uyarichun.

¹⁶ Pimantaj rijch'achisaj, kunan tiempo runastari? Paykuna rijch'akunku wawas plazaspi tiyakojkunaman, paykunataj wawa masisninkuta qhaparispa, ninku:

¹⁷ Qankunapaj qenata tocapuyku, manataj tusunkichejchu; llakiykunata takipuyku, nillataj waqankichejku.

¹⁸ Juan jamorqa. Payrí, mana mikhojchu, nitaj ujyajchu; ninkutaj supayniyoj kasqanta.

¹⁹ Runaj Churin jamorqa. Payqa mikhoj ujyajtaj; qankunataj ninkichej: Kay runaqa anchata mikhun, vinotataj ujyan; impuesteroswan, juchasapaswan imataj kausakun. Diospa yachaynenqa ruwasqasnimpi rejsichikun.

Mana kasukoj llajtas

²⁰ Chaypacha Jesús, k'amiyta qallarerqa, maypichus aswan milagrosta ruwarqa chaykunata. Runakuna manapuni juchasninkumanta Diosman kutirikorqankuchu.

²¹ Nerqataj: Ay qanmanta, Corazín llajta! Ay qanmantapis Betsaida llajta! Tiropi, Sidompi imatajchus milagros qankuna ukhupi jina, ruwakunman karqa chayqa; maypachaña paykunaqa Diosman kutirikunkuman karqa, ushpharara qhashqa p'achata churakuspa.

²² Cheqamanta ari niykichej: Juicio p'unchaypeqa, aswan ñak'ariy qankunapaj kanqa, Tiromanta, Sidonmantawan nisqaqa.

²³ Qantaj Capernaum llajta, janaj pachakama oqharikoj, uraykuchisqa kanki infiernokama. Sodomapichus qampi jina chay milagros ruwakunkuman karqa chayqa, kunan p'unchaykama kakushanman karqa chay llajtaqa.

²⁴ Chayrayku niykichej: Juicio p'unchaypeqa, qankuna astawan sinch'ita ñak'arinkichej Sodomapi tiyakojkunamanta nisqaqa.

Noqaman jamuychej

²⁵ Chaypacha Jesús kutichispa nerqa: Yupaychayki Tatáy, janaj pachajta, kay pachajtawan Señornin. Kay imasta pakaykorqanki yachaysapasmanta, yuyayniyojkunamantawan; wawasmantaj chaykunata rikucherqanki.

²⁶ Arí, Tatáy, ajinata munarqanki.

²⁷ Tatayqa, tukuy imata noqaman qowarqa. Mana pipis Churinta rejserqachu, Dios Tatalla rejserqa; Dios Tatatapis nillataj pipis rejserqachu, Churillan paytaqa rejserqa; pimantajchus Chureqa rejsichiyta munanman, chaylla.

²⁸ Noqaman jamuychej, tukuy sayk'usqa kajkuna, llasa q'epiyojkuna ima; noqataj samachisqaykichej.

²⁹ Yugoyta apaychej, yachakuychejtaj noqamanta. Noqaqa k'acha, llamp'u sonqotaj kani, almasniykichejpajtaj samakuyta tarinkichej.

³⁰ Yugoyqa llamp'ulla, q'epiypis chhallalla.