San Mateo 10 - Qheshwa Biblia DC

Jesús atiyta qon apostolesninman

¹ Jesús wajyarqa chunka iskayniyoj yachachisqasninta. Paykunamantaj atiyta qorqa sajra supaykunata qharqonankupaj, thañichinankupajtaj tukuy laya onqoykunamanta, nanaykunamantawan.

^2-4 Chunka iskayniyoj apostolespa sutisnintaj kaykuna: Ñaupaj kaj, Simón, Pedro nisqa, wauqen Andreswan; Zebedeoj churisnin: Santiago, Juanwan; Felipe, Bartolomé, Tomás, impuestota cobraj Mateo; Alfeoj churin Santiago, Tadeo, Simón, cananeo nisqa; Judas Iscariote ima, pichus Jesusta jap'icherqa.

Jesús kachan apostolesninta

⁵ Jesús kacharqa chay chunka iskayniyojta, kay jinata kamachispa: Ama gentilespa ñanninkuta rinkichejchu, nitaj samaritanospa llajtankuman yaykunkichejchu.

⁶ Manachayqa riychej Israel wasimanta chinkasqa ovejasman.

⁷ Rispataj willaramuychej, Diospa janaj pacha reinon qayllamunña, nispa.

⁸ Onqosqasta thañichiychej, wañusqasta kausarichiychej, lepra onqoyniyojkunata llimphuchaychej, supaykunatapis qharqoychej. Qankuna qhasimanta jap'erqankichej; qhasillamantataj qoychej.

⁹ Ama apaychejchu qolqe wayaqapi qorita, qolqeta, nitaj cobre phatastapis.

¹⁰ Ñampajqa ama qoqawi wayaqata apaychejchu, nitaj iskay p'achasta, nitaj ujut'asta, nillataj tojnutapis. Llank'aj runaqa mikhuchisqapuni kanan tiyan.

¹¹ May llajtallamampis, chayrí ranchomampis chayaspaqa, mask'aychej pichus k'acha runata; chaypitaj qhepakuychej, wajman rinaykichejkama.

¹² Wasiman yaykuspataj napaykuychej.

¹³ Paykunatajchus k'achas kankuman chayqa, sonqo tiyasqa kay paykunawan kachun, nisqaykichejman jina. Sajras kankuman chayrí, sonqo tiyasqa kay qankunaman kutimpuchun.

¹⁴ Pillapis wasinkuman mana yaykuchisunkichejmanchu, nitaj parlasqaykichejtapis uyarisunkichejmanchu chayqa, chay wasimanta, chayrí chay llajtamanta llojsiychej, chakisniykichejmanta jallp'ata thalarakuspa.

¹⁵ Cheqamanta niykichej, juicio p'unchaypeqa aswan ñak'ariy kanqa chay llajtapaj, Sodomamanta, Gomorramantawan nisqaqa.

Qhatiykachaykuna

¹⁶ Kunanqa, noqa kachashaykichej, ovejasta jina atojkunaj chaupinman. Kataris jina sumaj yuyayniyoj kankichej; palomas jinataj llamp'u sonqosniyoj.

¹⁷ Allinta qhawakuychej runakunamanta. Paykunaqa jatun juntaman pusaspa sinagogasninkupi jasut'ichisonqachej.

¹⁸ Noqarayku pusasonqachej llajtapi kuraj kamachejkunaman, reyesman ima. Ñaupaqenkupitaj noqamanta willankichej paykunaman, gentilesmampis.

¹⁹ Kamachejkunaman pusasqas kaspaqa, ama llakikunkichejchu imaynatachus parlanaykichejta, chayrí imatachus ninaykichejta. Chay kikimpacha, Dios yuyaychasonqachej imamantachus parlanaykichejta.

²⁰ Mana qankunachu parlankichej; astawanqa Tataykichejpa Espíritun qankunanejta parlanqa.

²¹ Wauqeqa wauqenta wañuchichenqa; tatapis wawanta; wawaspis oqharikullanqankutaj tatasninkuta wañuchichinankupaj.

²² Noqarayku tukuy runas chejnisonqachej. Pichus tukukuykama, sumajta sayanqa, chay salvasqa kanqa.

²³ Mayqen llajtallapipis chejnisunkichejman chayqa, waj llajtamanñataj ayqeychej. Cheqamanta niykichej ari, manaraj tukuy israelitaspa llajtasnimpi willayta tukushajtiykichej, ñapis Runaj Churenqa jamonqaña.

²⁴ Yachakojqa, mana yachachejninmanta aswan kurajchu. Nitaj kamachipis patronninmanta kurajllatajchu.

²⁵ Yachakojpajqa walej, yachachejnin jina kanan. Kamachipajpis patronnin jina kanan. Wasiyojtachus Beelzebuta suticharqanku chayqa, imatarajchus sutichanqanku wasimpi kajkunataqa.

Pitataj manchachikusunri?

²⁶ Chayrayku, ama paykunata manchachikuychejchu. Mana imapis qhatasqaqa kanchu, mana sut'inchakojqa; nitaj pakaypi kajpis mana yachakojqa.

²⁷ Imatachus laqhayajpi niykichej, chayta k'anchaypi niychej. Pakaypi uyarisqaykichejtapis, wasi patamanta qhaparispa willaychej.

²⁸ Ama manchachikuychejchu cuerpota wañuchejkunata, imaraykuchus almataqa mana wañuchiyta atinkuchu. Astawanqa, pichus cuerpota, almatapis infiernoman wijch'uykuyta atin, chayta manchachikuychej.

²⁹ Manachu iskay p'isqetustapis vendenku phatarayku? Chaywampis, Dios Tataykichej mana nejtenqa, ni uj p'isqetullapis jallp'aman urmanmanchu.

³⁰ Ajinallatataj, umaykichejpi chujchasniykichejpis, tukuyninku yupasqas kashanku.

³¹ Chayrayku ama manchachikuychejchu. P'isqetusmanta nisqaqa aswan munasqaraj kankichej.

Cristota rejsejkuna

³² Pichus runaspa ñaupaqempi noqata rejsiwasqanta nenqa chayqa, noqapis payta rejsini nillasajtaj, janaj pachapi kashaj Tataypa ñaupaqempi.

³³ Chantá, pillapis runaspa ñaupaqempi mana rejsinichu niwanqa chayqa, noqapis payta mana rejsinichu nillasajtaj, janaj pachapi kashaj Tataypa ñaupaqempi.

Jesusrayku t'aqanaku

³⁴ Ama qankunaqa yuyaychejchu noqa kay mundoman sonqo tiyasqa kayta apamusqayta. Mana sonqo tiyasqa kaytachu; manachayqa phiñanakuyta apamuni.

³⁵ Noqaqa runakunata t'aqanachej jamuni: Churita tatanmanta, ususita mamanmanta, qhachunitapis suegranmanta.

³⁶ Ajinamanta runaj enemigosnenqa, kikin wasillanmantataj kanqanku.

³⁷ Pichus tatanta, chayrí mamanta, noqamanta astawan munakojqa, mana noqapaj jinachu. Ajinallatataj, pichus churinta, chayrí ususinta, noqamanta astawan munakun chayqa, nillataj noqapaj jinachu.

³⁸ Pichus, mana cruznin oqharisqa qhepayta qhatimuwanqachu chayqa, mana noqapaj jinachu.

³⁹ Pichus kausayninta tarejqa, chinkachenqa; pitajchus, noqarayku kausayninta chinkachejtaj, tarikaponqa.

T'inkasmanta

⁴⁰ Pichus qankunata wasinman wajyarisunkichej chayqa, noqata wajyariwan. Pichus noqata wasinman wajyariwajrí, kachamuwajniyta wajyarin.

⁴¹ Pichus profetata wajyarin, profeta kasqanrayku chayqa, profetaj t'inkanta jap'enqa. Jinallataj, allin runata wajyarejqa, allin runa kasqanrayku chayqa, paypis allin runaj t'inkanta jap'illanqataj.

⁴² Pillapis kay juch'uykunamanta ujninman, yachakoj kasqanrayku uj vaso chiri yakullatapis jaywarinman chayqa; cheqamanta niykichej, t'inkanta mana chinkachenqachu.