San Mateo 1 - Qheshwa Biblia DC

Jesuspa ñaupa tatasnimpa sutisnin

¹ Jesucristoj ñaupa tatasnimpa mirayninmanta libro. Jesusqa karqa Davidpa ayllunmanta, Abrahampa ayllunmantawan.

² Abraham, Isaacpa tatan karqa, Isaactaj Jacobpata. Jacobtajrí Judajta, wauqesnimpatawan tatan karqa.

³ Judá, Farespata Zarajtawan tatanku karqa, mamankutaj Tamar karqa, Farestaj Esrompata tatan, Esromtaj Arampata.

⁴ Aramtaj Aminadadpa tatan karqa, Aminadabtaj Naasompata, Naasontaj Salmompata.

⁵ Salmontaj Boozpa tatan karqa, mamantaj Rahab karqa. Booztaj Obedpa tatan karqa, mamantaj Rut. Obedtaj Isaejpata tatan karqa.

⁶ Isaitaj rey Davidpa tatan karqa. Rey Davidtaj Salomompa tatan karqa, Uriaspa warmintaj Salomompa maman karqa.

⁷ Salomontaj Roboampa tatan karqa, Roboamtaj Abiaspata, Abiastaj Asajta.

⁸ Asataj Josafatpa tatan karqa, Josafattaj Jorampata, Joramtajrí Uziaspata.

⁹ Uziastaj Jotampa tatan karqa, Jotamtaj Ajaspata, Acaztaj Ezequiaspata tatan karqa.

¹⁰ Ezequiastaj Manasespa tatan karqa, Manasestajrí Amompata, Amontaj Josiaspata.

¹¹ Josiastaj Jeconiaspa tatan karqa, wauqesnimpatawan; israelitasta Babiloniaman apashajtinku.

¹² Babiloniaman risqankumantaña Jeconías Salatielpa tatan karqa, Salatieltaj Zorobabelpata.

¹³ Zorobabeltaj Abiudpa tatan karqa. Abiudtaj Eliaquimpata, paytaj Azorpa tatan karqa.

¹⁴ Azortaj Sadocpa tatan karqa, Sadoctaj Aquimpata, Aquimtajrí Eliudpata.

¹⁵ Eliudtaj Eleazarpa tatan karqa, Eleazartaj Matampata, Matantajrí Jacobpata.

¹⁶ Jacobtaj Joséj tatan karqa, Josetaj Maríaj qosan, Mariataj Jesuspa maman, Cristo sutichasqajta.

¹⁷ Ajinamanta, Abrahammanta Davidkama chunka tawayoj miraykuna karqa. Davidmantapacha, israelitas Babiloniaman pusachikusqankukama, chunka tawayoj miraykuna. Chay pachamantataj Cristokama, waj chunka tawayoj miraykuna kallarqataj.

Jesuspa nacisqan

¹⁸ Jesucristoj nacisqantaj kay jina karqa: María mamanqa mañaqasqa karqa Josewan casarakunampaj. Manaraj khuska tiyakushajtinkutaj, Mariaqa wijsallisqa rikhurerqa Santo Espiritunejta.

¹⁹ José qosantaj cheqan runa kaspa, María warminta ama p'enqaypi rikhurichinanrayku, pakayllamanta saqerpayayta munasharqa.

²⁰ Kay imapi José yuyashajtintaj, Señorpa angelnin payman rikhurerqa mosqoypi, nerqataj: José, Davidpa ayllunmanta kaj, ama manchachikuychu, María warmiykita jap'ikapullay; imaraykuchus paypi kaj wawaqa Santo Espiritumantamin.

²¹ Mariataj uj qhari wawata nacichikonqa, sutichankitaj Jesús sutiwan; imaraykuchus pay ayllunta salvanqa juchasninmanta.

²² Kay tukuy ima karqa Señorpa nisqan junt'akunampaj, profetanejta nisqanman jina:

²³ Uj sipas, manaraj qharita rejsej, wijsallikonqa, nacichikonqataj uj qhari wawata. Paytataj Emanuel sutiwan sutichanki. Kay sutitaj niyta munan: Dios noqanchejwan kashan.

²⁴ Josetaj puñusqanmanta rijch'arispa, Señorpa angelnin kamachisqanman jina ruwarqa, María warmintataj jap'ikaporqa.

²⁵ María warminwanqa, manaraj casado jinachu tiyakusharqa wawata nacichikunankama; paytaj wawataqa Jesús sutiwan suticharqa.