Marcos 9 - Qheshwa Biblia DC

¹ Chaymanta Jesús nillarqataj: Sut'inta niykichej. Wakin kaypi kajkunamanta mana wañuyta rikonqankuchu, Diospa reinonta manchay atiywan jamushajta rikunankukama.

Jesús waj jinaman tukorqa

² Sojta p'unchayninmantaj, Jesús pusarqa Pedrota, Santiagota, Juantawan uj jatun orqoman. Chaypitaj Jesús, ñaupaqenkupi waj jinaman tukorqa.

³ P'achasnintaj k'ancharispa yuraj rit'iman tukorqa; manataj pipis kay mundopi chay jina yurajta t'ajsayta atinmanchu.

⁴ Chaymantaj Elías, Moiseswan rikhurimorqanku, Jesuswantaj parlasharqanku.

⁵ Chaypacha Pedroqa Jesusman nerqa: Maestro walej kaypi kasqanchejqa. Kunanqa ruwasqayku kinsa ch'ujllasta; ujta qampaj, ujta Moisespaj, ujtataj Eliaspaj.

⁶ Pedroqa mana yacharqachu imatachus parlasqanta, imaraykuchus mancharisqas kasharqanku.

⁷ Chay jinallaman phuyu rikhurimuspa paykunata llanthuykorqa. Diostaj phuyu ukhumanta nimorqa: Kaymin munasqa Chureyqa, payta uyariychej.

⁸ Ujtawan muyuyninkuta qhawarispataj, manaña chay ujkunata rikorqankuchu, manachayqa Jesús sapallantaña.

⁹ Orqomanta uraykamushajtinku, Jesús yachachisqasninta kamacherqa, ama pimampis chay rikusqankuta willanankuta, Runaj Churin wañusqasmanta kausarimpunankama.

¹⁰ Yachachisqasnenqa, kay nisqanta sonqonkupi waqaycharqanku, tapunakorqankutaj imachus wañusqasmanta kausarimuy kasqanta.

¹¹ Chaymantataj Jesusta taporqanku: Imaraykutaj leymanta yachachejkuna ninku Eliasraj ñaupajta jamunan kasqanta?

¹² Jesustaj paykunaman kuticherqa: Cheqamanta, Eliasqa ñaupajta jamuspa, tukuy imata maychus kasqanman churanqa. Manachu Escriturapi nishan Runaj Churin mayta ñak'arinanta, qhesachasqataj kananta?

¹³ Noqa kayta niykichej, Eliasqa jamorqaña, runastaj imatachus munasqankuta payta ruwarqanku; paymanta Escriturapi nisqanman jina.

Jesús thañichin supayniyoj ch'itita

¹⁴ Jesustaj chayamorqa maypichus yachachisqasnin kasharqanku chayman, rikorqataj muyuynimpi ashkha runata, leymanta yachachejkunatataj yachachisqasninwan churanakushajta.

¹⁵ Chay kikimpacha, runasqa Jesusta rikuspa t'ukorqanku; usqhayta rispataj napaykorqanku.

¹⁶ Jesustaj yachachisqasninta taporqa: Imamanta paykunawan churanakushankichej?

¹⁷ Ujtaj runa chaupimanta nimorqa: Maestro, wawayta pusamorqayki, imaraykuchus payqa opaychej supayniyoj kashan.

¹⁸ Maynejllapipis ujta kay supay jap'in chayqa, pampaman wijch'un, wawataj kirusninta k'ararakuspa phosoqota ajtumun; chay jawataj tulluyapushan. Yachachisqasniykita nerqani chay supayta qharqonankuta, manataj aterqankuchu.

¹⁹ Jesustaj paykunaman kuticherqa: Ay, mana creey atej runas! Mayk'ajkamataj qankunawan kasaj? Mayk'ajkamataj aguantasqaykichejri? Chay ch'itita pusamuwaychej.

²⁰ Pusamorqankutaj ch'itita. Supaytaj, Jesusta rikuytawan, chay kikimpi sinch'ita thalarqa ch'itita; paytaj pampaman urmaspa, kayman jaqayman sunt'iykacharqa, phosoqota ajtumuspa.

²¹ Jesustaj ch'itej tatanta taporqa: Mashkha unaytañataj onqonri?, nispa. Paytaj kuticherqa: Wawamantapacha.

²² Sapa kuti wawayta supayqa, ninaman, yakumantaj wijch'uykun wañuchiyta munaspa. Qan imata ruwayta atiwaj chayqa, khuyariwayku, yanapariwaykutaj.

²³ Jesustaj nerqa: Arí, sichus creeyta atiwaj chayqa, tukuy ima atikun creejpajqa.

²⁴ Kikimpachataj, ch'itej tatanqa qhaparispa nerqa: Creeni. Yanapaway ari, astawan creenaypaj.

²⁵ Runas k'iskikamojta rikuspataj, Jesusqa k'amerqa millay supayta, nispa: Opa joq'ara supay. Noqa kamachiyki: Llojsiy ch'itimanta. Ama ujtawan payman kutiykuychu.

²⁶ Supaytaj, sinch'ita qhaparispa, ch'itita ujtawan manchayta thalaspa llojserqa; ch'ititaj wañusqa jina wijch'ukorqa. Chay jawataj ashkhas nisharqanku: Wañupunña.

²⁷ Jesustaj, ch'itita makinmanta jap'ispa aysarerqa, paytaj sayarerqa.

²⁸ Wasi ukhuman Jesús yaykojtintaj, yachachisqasnin sapallampi taporqanku: Imaraykutaj noqayku mana aterqaykuchu chay supayta qharqoyta?

²⁹ Jesustaj kuticherqa: Mana imawan atisunmanchu kay laya supayta qharqoyta, manachus Diosmanta mañakusunman [ayunaspa] chayqa.

Jesús ujtawan willan wañunanmanta

³⁰ Chaymanta llojsispataj, Galilea jallp'anejta rerqanku; Jesustaj mana pipis yachananta munarqachu.

³¹ Payqa yachachisqasninman yachachispa nisharqa: Runaj Churenqa, runaspa makisninman urmanqa, paykunataj wañuchenqanku; kinsa p'unchayninmantaj wañusqamanta kausarimponqa.

³² Paykunataj mana entienderqankuchu kay nisqanta; manchachikorqankutaj tapuyta.

Pitaj aswan kuraj runari?

³³ Chay qhepata Capernaumman Jesús chayamorqa; wasipitaj yachachisqasninta taporqa: Imamantataj ñampi churanakusharqankichej?

³⁴ Paykunataj ch'inlla karqanku; imaraykuchus ñampi churanakorqanku mayqenninkuchus kuraj kananmanta.

³⁵ Jesustaj tiyakushaspa, chunka iskayniyoj yachachisqasninta wajyaspa nerqa: Pillapis ñaupajpi kayta munajqa, tukuypa qhepampi kanan tiyan, tukuypa kamachintaj.

^36-37 Jesustaj uj wawata oqharispa, yachachisqasnimpa chaupinman sayaykucherqa, marq'ariykukuspataj paykunaman nerqa: Pillapis sutiypi kay wawata jina jap'ikojqa, noqata jap'ikuwan. Pichus noqata jap'ikuwajrí, mana noqallatachu jap'ikuwan, astawanqa pichus kachamuwajta.

Mana contranchejpi kajqa noqanchejman kutisqa

³⁸ Juantaj nerqa Jesusman: Maestro, uj runata rikuyku, sutiykipi supaykunata qharqoshajta. Paytaj mana noqanchejwanchu. Noqaykutaj kamacherqayku ama qharqonanta; imaraykuchus payqa, mana noqanchejwanchu kashan.

³⁹ Jesustaj nerqa: Ama jark'aychejchu. Pillapis sutiypi milagrota ruwajqa, mana noqapaj sajrata rimanmanchu.

⁴⁰ Mana contranchejpi kajqa, noqanchejwan.

⁴¹ Pillapis sutiypi uj vaso yakullatapis jaywarisunkichejman, Cristojta kasqaykichejrayku chayqa; cheqamanta niykichej, t'inkanta jap'ikaponqa.

Ama juchaman urmanamanta

⁴² Jesús nillarqataj: Pillapis noqapi creej wawasta juchaman urmachinman chayqa; allin kanman, chay urmachej runaj kunkanman molino rumita warkhuykuspa qochaman wijch'uykunaqa.

⁴³ Sichus makiyki juchaman urmachisunkiman chayqa, khuchurpayay; allin kanqa, uj makiyojlla kausayman yaykunaykeqa; manataj allinchu kanman, iskaynin makisniyoj infiernoman, mana thasnukoj ninaman yaykunaykeqa. [

⁴⁴ Chaypeqa khurusninku mana wañunkuchu, nitaj jayk'ajpis nina larway thasnukunchu.]

⁴⁵ Sichus chakiyki juchaman misk'achisunki chayqa, khuchurpariy; allin kanman, ch'ulla chakiyojlla kausayman yaykunaykeqa; manataj allinchu kanman, iskaynin chakisniykiwan infiernoman wijch'usqa kanaykeqa. [

⁴⁶ Chaypeqa khurusninku mana wañunkuchu, nitaj jayk'ajpis nina larway thasnukunchu.]

^47-48 Sichus ñawiyki juchaman urmachisunkiman chayqa, orqhorpariy; allin qampaj kanqa, uj ñawiyojlla Diospa reinonman yaykunaykeqa; manataj allinchu kanman iskaynin ñawisniyoj, infiernoman wijch'uykusqa kanaykeqa, maypichus khurusninku mana wañunkuchu, nitaj jayk'ajpis nina larway thasnukunchu.

⁴⁹ Sapa ujninku ninawan allinchasqas kanqanku; [imaynatachus wañuchisqa uywa Diosman jaywanapaj kachinchakun, ajinata.]

⁵⁰ Sumajmin kacheqa. Kachitajchus q'aymayanman chayqa, imawantaj kachinchawajchej? Qankunapis kachinchasqas jina kaychej; ujkuna ujkunawantaj allinta kausakuychej.