Marcos 8 - Qheshwa Biblia DC

Jesús mikhuchin tawa waranqa runasman

^1-2 Chay p'unchaykunapi ujtawan ashkha runas tantakamorqanku. Mana imapis mikhunankupaj kajtintaj, yachachisqasninta wajyaspa Jesús nerqa: Kay runasmanta sonqoy nanawan, imaraykuchus kinsa diataña noqawan kashanku, manataj imapis mikhunankupaj kanchu.

³ Mana mikhusqasta wasisninkuman kachapusaj chayqa, ñampi sayk'uspa llauchhuyankuman, imaraykuchus wakenqa karumanta jamunku.

⁴ Yachachisqasnintaj kuticherqanku: Maypitaj t'anta kanman, kay ch'impi, kay chhika runaman mikhuchinapajri?

⁵ Jesustaj paykunata taporqa: Mashkha t'antastaj kapusunkichej? Paykunataj kuticherqanku: Qanchis t'antalla tiyan, nispa.

⁶ Jesustaj runasta kamacherqa pampapi tiyarakunankuta. Chay qanchis t'antasta jap'ispataj, Diosman graciasta qorqa. T'antasta partiraspataj yachachisqasninman jaywarqa, runasman qomunankupaj. Paykunataj ajinata ruwarqanku.

⁷ Kallarqataj paykunajta pisi challwitasninku; chaykunamantapis graciasta qospa kamachillarqataj chaytapis runasman jaywamunankuta.

⁸ Tukuyninkutaj mikhorqanku sajsakunankukama; puchojtataj qanchis canastas junt'asta oqharerqanku.

⁹ Mikhojkunaqa tawa waranqa jina qharis karqanku; chaymantataj Jesús runasta kacharaporqa.

¹⁰ Chay kikimpachataj, yachachisqasninwan, boteman yaykuspa Dalmanuta jallp'aman riporqa.

Fariseos mañanku señalta

¹¹ Chaymantaqa, fariseos jamuspa Jesuswan churanakuyta qallarerqanku; pantachiyta munaspataj mañarqanku cielomanta señalta rikuchinanta.

¹² Jesustaj mayta ayqhospa, paykunaman nerqa: Imaraykutaj kunan tiempo runas señalta rikuyta munanku? Sut'inta niykichej: Mana ima señalpis ruwakonqachu kunan tiempo runaspajqa.

¹³ Paykunata saqerparispataj, yachachisqasninwan ujtawan boteman yaykuspa qocha chimpaman rerqa.

Fariseospa levaduran

¹⁴ Yachachisqasnintaj qonqapusqanku t'antata apakuyta. Botepiña kashaspataj uj k'ata t'antayojlla rikhurerqanku.

¹⁵ Jesustaj paykunata kamacherqa: Allintapuni qhawakuychej fariseospa levaduranmanta; ajinallatataj Herodespa levaduranmantapis.

¹⁶ Yachachisqasnintaj ninakusharqanku: Kaytaqa nishan mana t'antata apakamusqanchejrayku.

¹⁷ Jesustaj chay ninakusqankuta yachaspa, paykunaman nerqa: Imaraykutaj churanakushankichej, mana t'antaykichej kasqanraykuchu? Manarajchu yachankichej, nitajchu entiendeyta atinkichej? Rumi sonqosllarajchu kashankichej?

¹⁸ Ñawisniyoj kashaspa, manachu rikunkichej? Ningrisniyoj kashaspapis, manallatajchu uyarinkichej?

¹⁹ Yuyariychej imaynatachus phishqa t'antata partispa, phishqa waranqa runaman mikhuchisqayta. Mashkha canastas junt'astataj, t'anta puchojta oqharerqankichej? Paykunataj kuticherqanku: Chunka iskayniyoj canastaspi, nispa.

²⁰ Jesús nillarqataj: Qanchis t'antata tawa waranqa runasman mikhuchisqaymanta, mashkha canastaspi junt'astataj, t'anta puchojta oqharerqankichej? Paykunataj nerqanku: Qanchis canastaspi, nispa.

²¹ Chantá, manarajpunichu entiendeyta atinkichej?

Betsaidapi Jesús qhawarichin ciegota

²² Chay qhepata, Betsaida llajtaman chayamorqanku; Jesusmantaj pusamorqanku uj ciegota, mañarqankutaj llankhaykunanta.

²³ Jesustaj ciegoj makinmanta jap'iykuspa llajtamanta jawaman pusarqa. Thoqayninwan ñawisninta jawiykuspataj, makisninta payman churaykuspa taporqa: Rikunkichu imallatapis?, nispa.

²⁴ Paytaj qhawarispa nerqa: Rikushani runasta sach'asta jina, puriykachashajta.

²⁵ Jesustaj, ujtawan makisninta churaykorqa runaj ñawisninman. Kay kutipitaj allinta rikorqa; ñawisnintaj thañikaporqanku; tukuy imatataj sut'ita rikorqa karukama.

²⁶ Jesustaj wasinman kachaporqa, nispa: Ama llajtaman yaykuychu, [nitaj pimampis kayta willaychu.]

Pedro sut'inchan Jesusmanta

²⁷ Chaymanta Jesús yachachisqasninwan rerqa Cesarea Filipoj ranchosninman. Ñanta rishaspataj yachachisqasninta taporqa: Runasrí pi kasqaytataj ninku?

²⁸ Paykunataj kuticherqanku: Wakinkunaqa ninku Juan Bautista kasqaykita, wajkunataj Elías kasqaykita, wakinkunataj mayqen profetachá, ninku.

²⁹ Paykunatataj taporqa: Qankunarí pi kasqaytataj nishankichej? Pedrotaj kutichispa nerqa: Qanqa Cristo kanki.

³⁰ Jesustaj yachachisqasninta kamacherqa amapuni pimampis ni imata paymanta ninankuta.

Jesús willan wañunanmanta

³¹ Chaymantataj yachachisqasninman yachachiyta qallarerqa Runaj Churin maytapuni ñak'arinanta; kuraj runas, kuraj sacerdotes, leymanta yachachejkuna ima qhesachanankuta; chaymantataj payta wañuchinankuta, kinsa p'unchaymantataj kausarimpunanta.

³² Ajina sut'ita paykunaman willarqa; Pedrotajrí Jesusta wajnejman pusaspa k'amerqa.

³³ Jesustaj yachachisqasninman kutirispa, Pedrota k'amerqa: Riy kaymanta, Satanás! Qanqa mana Diospa munaynintachu yuyanki, manachayqa runaspa munaynillanta.

³⁴ Chaymantataj runasta, yachachisqasnintawan wajyaspa nerqa: Pillapis qhepayta jamuyta munaspaqa, pay kikinmanta qonqapuchun. Chaymantataj cruzninta oqharispa qhepayta jamuchun.

³⁵ Pillapis salvakuyta munajqa, kausayninta chinkachenqa. Noqarayku, evangelioraykutaj kausayninta chinkachejtaj, salvasqa kanqa.

³⁶ Ima allintaj runapaj kanman, sichus mundoj tukuy kapuyninta jap'ikapunman, almantataj chinkachinman chayqa?

³⁷ Imatataj runaqa qonman almanmanta?

³⁸ Pillapis kunan tiempo qhenchachakoj juchasapa runa, noqamanta, palabrasniymantawan p'enqakunman chayqa, paymantapis Runaj Churenqa p'enqakullanqataj, Dios tatampa jatun k'anchaynimpi, ajllasqa angelesninwan jamojtin.