Marcos 5 - Qheshwa Biblia DCGerasamanta supayniyoj runa ( Mt 8.28-34 ; Lc 8.26-39 ) 1 Ajinamanta Jesús yachachisqasninwan chayarqa qochaj chimpanman, Gerasa jallp'aman. 2 Botemanta uraykusqantawantaj, payta taripaj jamorqa uj supayniyoj runa, sepulturasmanta llojsimuspa. 3 Kay runaqa tiyakoj sepulturaspi, manataj pipis watayta atejchu, ni cadenaswampis. 4 Ashkha kutitaña chakisninta, makisnintapis cadenaswan watarqanku, sapa kutitataj cadenasta p'itiraj; manataj pipis aterqañachu atipayta. 5 Tuta p'unchay qhaparispallapuni puriykachaj, sepulturaspi, orqo pataspi ima, rumiswan takakuspa. 6 Kay runaqa karumantapacha Jesusta rikuytawan, phinkirispa rerqa, ñaupaqenmantaj qonqoriykukorqa. 7 Sinch'ita qhaparispataj nerqa: Jesús, jatun Diospa Churin! Imá ruwanayki tiyan noqawan? Diospa sutimpi mañakuyki ama ñak'arichinawaykita. 8 Chayta nerqa, imaraykuchus Jesusqa kamachisharqa: Millay supay, llojsiy chay runamanta!, nispa. 9 Chaymantataj Jesús taporqa: Imá sutiykiri?, nispa. Paytaj kuticherqa: Suteyqa Tropa, imaraykuchus ashkha kayku. 10 Jesusmantataj mayta mañakusharqa, ama wijch'unanta chay jallp'amanta. 11 Chaypitaj orqo qayllapi ashkha khuchis mikhusharqanku. 12 Supaykunataj Jesusmanta mañakorqanku: Saqewayku khuchisman yaykojta, nispa. 13 Jesustaj saqerqa ajinata ruwanankuta. Millay supaykunataj runamanta llojsiytawan khuchisman yaykorqanku. Khuchistaj iskay waranqa jina karqanku. Qaqantataj manchay kallpawan wijch'uykukorqanku qochaman, jeq'eqaspataj wañurarqanku. 14 Chayta rikuspataj khuchi michejkunaqa ayqerqanku; llajtapi, campopi imataj willamorqanku. Runastaj jamorqanku imachus kasqanta yachanankupaj. 15 Jesusman jamuspataj, rikorqanku chay ashkha supayniyoj runata p'achallisqataña, tiyakushajta sumaj yuyaynimpi; paykunataj mancharerqanku. 16 Rikojkunataj jamojkunaman willarqanku, imaynatachus supayniyoj runa thañikapusqanta; khuchispis imaynatachus wañurasqankuta. 17 Runastaj maytapuni Jesusman nerqanku jallp'ankumanta ripunanta. 18 Boteman Jesús yaykushajtintaj, ashkha supayniyoj karqa chay runaqa, Jesusmanta mañakorqa: Qanwan khuska kakojta saqeway, nispa. 19 Jesustaj mana munarqachu paywan rinanta, astawanqa runaman nerqa: Ripuy wasiykiman, ayllusniykiman ima. Paykunamantaj willamuy may jina jatun imastachus khuyasuspa Señor qampaj ruwasqanta. 20 Ajinamanta runaqa riporqa. Chantá, chunka llajtas nisqa suyupi purerqa tukuyman willaspa imaynatachus Jesús paywan ruwasqanta, tukuytaj t'ukorqanku. Jesús thañichin Jairoj wawanta, onqosqa warmitawan ( Mt 9.18-26 ; Lc 8.40-56 ) 21 Jesús ujtawan kutirerqa botepi, jatun qochaj chimpanman. Qocha cantopi kashajtintaj, ashkha runas payman tantakamorqanku. 22-23 Chay jinallaman, sinagogamanta ujnin kuraj kamachej Jairo sutiyoj jamorqa. Jesusta rikuspataj, ñaupaqenman qonqoriykukuspa, maytapuni mañakusharqa: Warmi waway wañupushanña. Jamuriy ari. Makisniykita payman churaykuripuwanki thañikapunampaj kausanampajtaj, nispa. 24 Jesús Jairowan rishajtintaj, ashkha runa qhatisharqa; k'iskinakuspataj Jesusta ñit'imusharqanku. 25 Chaypitaj uj onqosqa warmi kasharqa, payqa chunka iskayniyoj watataña yawar apaywan onqosqa karqa. 26 Unaytaña ñak'arerqa medicoswan jampichikuspa, tukuy kapuyninta tukuchinankama; manataj imaynapi thañikuyta aterqañachu; astawanraj chullchusharqa. 27 Jesusmanta parlajta uyarispa qhepallata jamusharqa runaspa chaupinta; Jesuspa p'achantataj llankhaykorqa. 28 Sonqompi nisharqa: P'achallantapis llankhaykuyman chayqa thañikapuyman. 29 Jesuspa p'achanta llankhaykojtintaj, kikimpacha yawar onqoynin sayaykaporqa; paytaj yacharqa onqoyninmanta thañikapusqanta. 30 Jesustaj yacharqa atiynin llojsisqanta; runasman kutirispataj taporqa: Pitaj p'achayta llankhamuwan?, nispa. 31 Yachachisqasnintaj payman nerqanku: Rikushanki imaynatachus runas k'iskikamuspa ñit'imusqankuta; qantaj tapushanki, pitaj llankhamuwanri?, nispa. 32 Jesustaj muyuyninta qhawarerqa rikuyta munaspa pichus llankhaykusqanta. 33 Warmitajrí thañisqa kasqanta yachakuspa, Jesusman chimpaykorqa manchariywan kharkatitispa. Ñaupaqenman qonqoriykukuspataj, imachus paypi ruwakusqanmanta willarqa, maychus kasqanta. 34 Jesustaj payman nerqa: Wawáy, creesqaykirayku salvasqa kanki. Kunanqa sonqo tiyasqa ripuy, onqoyniykimanta thañisqaña kanki. 35 Chayta warmiman nishajtintaj, Jairoj wasinmanta kamachis chayamorqanku, paymantaj nerqanku: Wawayki wañupunña, imapajñá pusayta munashanki Maestrota? 36 Jesustaj, kamachispa willasqankuta uyarispa, Jairoman nerqa: Ama mancharikuychu, creellay. 37 Jesustaj mana munarqachu paywan waj runas rinankuta; chayrayku ajllarqa Pedrota, Santiagota, wauqen Juanllatawan. 38 Sinagogapi kamachejpa wasinman chayaspataj, Jesusqa uyarerqa ch'ajwata, waqajkunata, qhaparejkunatawan. 39 Yaykuspataj runasman nerqa: Imamantá ch'ajwashankichej, waqashankichejtaj? Mana wawaqa wañusqachu kashan, puñushallan. 40 Chayta nisqantawantaj asikorqanku; Jesustaj runasta jawaman llojsichispa, pusaykorqa wawaj tatanta, mamanta, paywan kajkunatawan; yaykorqataj maypichus wawa kasharqa chayman. 41 Wawaj makinmanta jap'iykuspataj Jesús nerqa: Talita kumi; chayqa niyta munan: Imillita, qanta niyki jatarikuy. 42 Chay kikimpachataj wawaqa sayarerqa, puriykacharqataj; payqa chunka iskayniyoj watayojña karqa. Chayta rikuspataj runasqa maytapuni t'ukorqanku. 43 Jesustaj runasta sinch'ita kamacherqa, ama pipis chay ruwasqanta yachananta, nerqataj: Wawaman mikhuyta qoychej. |
Qheshwa Biblia DC © Sociedades Bíblicas Unidas, 1986.
United Bible Societies