Marcos 4 - Qheshwa Biblia DC

Tarpoj runa

¹ Ujtawan Jesús yachachiyta qallarerqa, Galilea qocha cantopi. Chaymantaj ashkha runa tantakamorqa. Chayraykutaj, Jesús boteman yaykuspa tiyaykukorqa; runastaj qocha cantopi kasharqanku.

² Jesustaj tukuy imata rijch'anachinaswan yachacherqa. Yachachiynimpitaj paykunaman nisharqa:

³ Kayta uyariychej. Uj runa tarpoj llojserqa.

⁴ Jallp'aman mujuta qhallashajtintaj, wakin muju ñanman urmarqa; p'isqostaj jamuspa mikhukaporqanku.

⁵ Wakin mujutaj urmarqa rumirara pisi jallp'ayojman; mana ukhu jallp'ayoj kasqanrayku, mujoqa usqhayllata p'utumorqa.

⁶ Intitaj llojsimuspa putumoj mujuta qawirparicherqa; mana ukhupi saphiyoj kaspataj ch'akiporqa.

⁷ Wakin mujutaj khishkas chaupiman urmarqa; khishkas wiñaykamuspataj wiñashajta k'irincharqanku; chayrayku mana poqorqachu.

⁸ Wakin mujutajrí, sumaj jallp'aman urmarqa; p'utumuspataj sumajta wiñarqa poqonankama. Poqoynintaj kay jina karqa: Wakin muju kinsa chunkata poqorqa, uj mujullamanta; wakintaj sojta chunkata; wakintajrí pachajta poqorqa.

⁹ Chantá nerqa: Pillapis ningriyojqa uyarichun.

Imapajtaj rijch'anachinasri?

¹⁰ Jesús sapallan kashajtin, chay qayllapi kajkuna, chunka iskayniyoj yachachisqasnin ima payman chimpaykuspa, taporqanku chay rijch'anachinamanta, imatachus niyta munasqanta.

¹¹ Jesustaj kuticherqa: Qankunaqa rejsinkichejña chay Diospa pakasqa reinonmanta. Jawapi kaj runasmanrí, rijch'anachinaswan yachachina tiyan.

¹² Chayrayku qhawashaspapis mana rikunkuchu; uyarishaspapis nillataj entiendeyta atinkuchu, chay jawa, ama Diosman kutirinankupaj, nitaj juchasninkupis pampachasqa kanampaj.

Jesús sut'inchan tarpoj runamanta

¹³ Chaymantataj Jesús paykunata taporqa: Manachu yachankichej kay rijch'anachinamanta? Imaynamantataj chantá yachawajchej chay waj rijch'anachinasmantari?

¹⁴ Mujuta tarpojqa, Diospa palabranta tarpojmin.

¹⁵ Wakin runasqa kanku ñannejman muju tarpusqa jina. Paykunaqa uyarinku evangeliota, Satanastaj jamuytawan, sonqompi imachus tarpusqa kajta qhechun.

¹⁶ Ajinallataj wakenqa kanku rumirara jallp'aman urmaj muju jina. Paykunaqa evangeliota uyariytawankama, kikimpacha kusiywan jap'inku.

¹⁷ Paykunaqa, mana allin saphichasqa kaspa, mana unayta kayta atinkuchu; Diospa palabranraykutaj llakiy, chayrí chejniy jamojtin paykunaqa urmanku.

¹⁸ Wakin runastaj, khishkas chaupiman t'akakoj muju jina kanku. Paykunaqa Diospa palabranta uyarinku.

¹⁹ Chantá kay mundoj imasnimpi yuyaykuna, qhapajyayta munapayay, tukuy laya sajra imaspi yuyaykuna ima, runaj sonqonman yaykuspa Diospa palabranta k'irinchanku, manataj poqojta saqenkuchu.

²⁰ Wakin runastajrí kanku, sumaj jallp'api tarpusqa muju jina. Paykunaqa Diospa palabranta uyarispa sonqonkupi jallch'anku; chaymantataj sumaj poqoykunata qonku. Ujkuna uj mujullamanta kinsa chunkata poqonku; wajkunataj sojta chunkata; wajkunatajrí pachajta poqonku uj mujullamanta.

K'anchanamanta

²¹ Chaymanta Jesús nillarqataj: Pillapis k'anchanata jap'ichispaqa, mana wich'i ukhumanchu pakaykun; nitaj cama uramampis churaykunchu. K'anchanataqa patamampuni churana k'anchanampaj.

²² Imallapis pakaypi kajqa, sut'inchakonqa; jinallataj mana ima pakasqapis kanmanchu mana sut'inchakojqa.

²³ Chayrayku ningriyoj kajqa uyarichun.

²⁴ Jesús nillarqataj: Imatachus uyarisqaykichejta allinta uyariychej. Imaynatachá runa masiykichejta juzgankichej, kikillantataj Diospis juzgasonqachej. Qankuna uyarejkunataqa, aswan sinch'itaraj juzgasonqachej.

²⁵ Kapuyniyojmanqa astawanraj qosqa kanqa; mana kapuyniyojmantataj pisi kapuynimpis qhechusqa kanqa.

Wiñaj muju

²⁶ Jesús nillarqataj: Diospa reinonqa rijch'akun jallp'aman mujuta t'akaj runaman.

²⁷ Payqa puñun, sayarintaj; chaykamataj mujoqa tuta p'unchay p'utumuspa wiñan, mana paypa yachasqallan.

²⁸ Jallp'aqa kikinllamanta ñaupajta p'utumoj yurata wiñachin, qhepanta espigachin, chantá sumaj granota espigapi poqochin.

²⁹ Trigo sumaj poqosqaña kajtintaj, runaqa ruthuyta qallarin, imaraykuchus ruthuna p'unchay chayamunña.

Mostaza mujumanta

³⁰ Chaymanta Jesús nillarqataj: Diospa reinonta, imamantaj rijch'achisunmanri? Ima sut'inchanawantaj yachachisunmanri?

³¹ Diospa reinonqa rijch'akun mostaza mujuman. Chay mujoqa jallp'api tarpukoj mujusmanta nisqaqa aswan juch'uymin.

³² Tarpusqaña kaspa wiñamun tukuy qhorasta atipanankama. Palqasnintaj jatuchajta wiñanku; llanthusninkupitaj p'isqospis thapachakunku.

Jesusqa rijch'anachinaswan yachachej

³³ Kay jina rijch'anachinaswan paykunaman Jesusqa willaj evangeliomanta, maychus uyariyta atisqankuman jina.

³⁴ Runasman Jesús yachachej rijch'anachinaswampuni; yachachisqasninmantaj sapankupi sut'inchaj tukuy imamanta.

Jesús thañichin wayrata phiña qochatawan

³⁵ Chay día ch'isiyashajtinña, Jesús paykunaman nerqa: Jaku rinachej qocha chimpaman.

³⁶ Runasta kachapuspataj, Jesusta boteman pusaykorqanku; chaypitaj waj botes kallarqataj.

³⁷ Chantá, manchay jatun wayra oqharikorqa, yakupis qhollchoqeyaspa boteman wajtakamorqa. Chayrayku boteqa chinkaykusharqaña.

³⁸ Botepitaj qhepanejpi Jesús puñusharqa, umanta saunapi atiykukuspa. Yachachisqasnintaj payta rijch'arichispa nerqanku: Maestro! Manachu noqaykumanta dakunki? Yakuman chinkaykushanchejña!

³⁹ Jesustaj jatarimuytawan wayrata k'amerqa; qochatapis nerqa: Ch'in kay! Sayay! Wayrataj thañerqa, jatun samaytaj karqa.

⁴⁰ Paykunamantaj nerqa: Imaraykutaj kay jinatapuni mancharinkichejri? Manachu feniykichej tiyan?

⁴¹ Paykunaqa manchariywan t'ukusharqanku, ninakusharqankutaj: Pitaj kay runari? Wayrapis, qochapis, payta kasunku!