Marcos 2 - Qheshwa Biblia DC

Jesús puriricherqa uj suchu runata

¹ Ujtawan, pisi p'unchaykuna qhepata, Jesús kutiporqa Capernaumman; yachakorqataj wasinman chayampusqan.

² Chay kikimpacha, ashkha runas tantakamorqanku, manaña punkullamampis chimpaykuna jinachu karqa. Chaypitaj Jesusqa evangeliomanta willasharqa.

³ Ajinallamantaj waj runas jamorqanku, uj tunuyasqa runata apamuspa. Paykunaqa chay runata tawamanta wantumorqanku.

⁴ Chaypi, runa k'iskilla kajtintaj, mana ni imaynamanta aterqankuchu Jesusman qayllaykuchiyta. Chayrayku wasej patanta jusk'orqanku, maypichus Jesús kasharqa chaynejman. Chay jusk'u ruwasqankunejtataj, runata uraykucherqanku phullumpi sirisqata.

⁵ Chay runaspa feninkuta rikuspataj, tunuyasqa runaman Jesús nerqa: Wawáy, juchasniykeqa pampachasqaña.

^6-7 Chaypi tiyasharqanku wakin leymanta yachachejkuna. Paykunaqa sonqkonku ukhupi yuyasharqanku kay jinata: Imaraykutaj kay runa, chay jinata parlanri? Diospaj sajrata rimashan. Ni pi atinmanchu juchasta pampachaytaqa. Dioslla juchastaqa pampachayta atin.

⁸ Chay kikimpachataj, espiritumpi Jesús yacharqa imatachus sonqonkupi yuyasqankuta. Chayrayku paykunaman nerqa: Imaraykutaj chay jinata sonqoykichejpi yuyankichejri?

⁹ Ima ninaytaj aswan allin kanman onqosqaman; juchasniyki pampachasqasña ninaychu; chayrí, jatariy, phulluykita oqharispa ripuy ninaychu?

^10-11 Yachanaykichejpaj, Runaj Churenqa kay mundopi atiyniyoj, juchasta pampachanampaj; tunuyasqa runamantaj nerqa: Qanta niyki, sayariy, phulluykita oqharispa ripuy wasiykiman.

¹² Tukuy qhawashajtinkutaj, onqosqa runaqa ujllata jatarerqa, phullunta oqharispataj riporqa. Chayta rikuspataj tukuy runas manchayta t'ukorqanku, Diosta yupaychaspataj nisharqanku: Mana jayk'ajpis jinataqa rikojchu kanchej, nispa.

Jesús wajyan Levita

¹³ Jesusqa ujtawan kuterqa Galilea qocha cantoman. Ashkha runastaj Jesusman jamorqanku, paykunamantaj yachachiyta qallarerqa.

¹⁴ Jesús chaynejta rishaspa, rikorqa Alfeoj wawanta, Leví sutiyojta, tiyashajta impuesto cobrana wasipi. Jesustaj payman nerqa: Jamuy, noqata qhatiway, nispa. Levitaj sayarispa Jesuswan rerqa.

¹⁵ Qhepanejtataj, Jesús mikhusharqa Levejpa wasimpi. Chaypi kashallarqankutaj ashkha runas impuestota cobrajkuna, juchasapaswan. Jesustaj yachachisqasninwan khuska mikhusharqa. Jesustaqa ashkha runas qhaterqanku.

¹⁶ Wakin leymanta yachachejkuna, fariseos ima, Jesusta chay juchasapaswan, impuestota cobrajkunawan ima, mikhushajta rikuspa, yachachisqasninman nerqanku: Imataj kayri? Maestroykichejqa impuestota cobrajkunawan, juchasapaswan khuska mikhushan, [ujyashantaj.]

¹⁷ Jesustaj, chayta uyarispa, nerqa: Walej kajkunaqa mana jampejta mask'ankuchu; manachayqa onqosqas kajkunalla. Mana cheqan runastachu wajyaj jamuni, astawanqa juchasapasllata.

Ayunomanta tapukunku

¹⁸ Uj kuti, Juan Bautistaj yachachisqasnin, fariseospa yachachisqasnin ima ayunasharqanku; Jesusman jamuspataj taporqanku: Imaraykutaj Juampa yachachisqasnin, fariseospa yachachisqasnin ima ayunanku, qampa yachachisqasniykitaj mana ayunankuchu?

¹⁹ Jesustaj paykunaman kuticherqa: Yuyankichejchu casarakuman wajyasqas, chaypi casarakoj kashajtin ayunanankuta? Casarakojwan kashaspaqa, mana ayunankumanchu.

²⁰ Uj p'unchay jamonqa, maypachachus casarakoj paykunamanta qhechusqa kanqa, chaypacharajmá ayunanqanku.

²¹ Jesús nillarqataj: Mana pipis t'irinmanchu mauk'a p'achaman mosoj trapotaqa, imaraykuchus mosoj trapoqa q'entispa aswan jatunta llik'irparinman mauk'a p'achataqa.

²² Manallataj pipis mosoj vinota jich'anmanchu mauk'a qara botasman. Mosoj vinoqa, poqoykuspa qara botasta phatachinman; jinapitaj vinoqa jich'akunman, qara botaspis usunkuman. Chayrayku, mosoj vinotaqa, mosoj qara botasmampuni jich'ana tiyan.

Yachachisqas trigo umasta pallanku

²³ Uj samakuna diapi, Jesús risharqa trigo chajraspa chaupinta; yachachisqasnintaj paywan khuska rishaspa, qallarerqanku trigo umasta p'itirayta.

²⁴ Chayta rikuspa fariseosqa Jesusman nerqanku: Qhaway, imaraykutaj yachachisqasniyki samakuna diapi mana ruwanata ruwanku?

²⁵ Jesustaj paykunaman nerqa: Manachu jayk'ajpis leerqankichej, David, paywan kajkunawan yarqhachikuspa imatachus ruwasqanta?

²⁶ Chaypacha, David yaykorqa Diospa wasinman, Abiatar jatun sacerdote kashajtin. Chaypi, Diosman qosqa t'antasta mikhorqa; paywan kajkunamampis mikhuchillarqataj. Chay t'antasmantaqa mana pipis mikhuyta atejchu, manachayqa sacerdoteslla mikhoj kanku.

²⁷ Jesús nillarqataj: Samakuna diaqa, runarayku ruwasqa karqa; manataj runaqa samakuna diaraykuchu.

²⁸ Chayrayku Runaj Churenqa, samakuna diajtapis Señornin.