Marcos 11 - Qheshwa Biblia DC

Jesús yaykun Jerusalenman

^1-2 Jesús yachachisqasninwan Jerusalenman qayllashaspa, Olivos orqoj chimpampi Betfagé llajtawan Betania llajtawan tinkuyman chayarqanku. Chaymanta Jesusqa iskay yachachisqasninta kacharqa, nispa: Riychej jaqay chimpa ranchoman, yaykuspataj uj uña burrota tarinkichej watasqata; chay burromanqa manaraj pipis montarqachu. Phaskaraspataj kayman aysamuychej.

³ Pipis tapusojtiykichej, imapajtaj chay burrota phaskarashankichej?, nispa chayqa, niychej: Señor munan kay burropi riyta. Kunampachataj kutichimpusonqa.

⁴ Paykunataj ranchoman rispa, uña burrota ñan patapi tarerqanku, wasi punkupi watasqata; phaskararqankutaj.

⁵ Chaypi kajkunamanta wakintaj taporqanku: Imapajtaj chay burrota phaskarashankichej?

⁶ Paykunataj kuticherqanku Jesuspa kamachisqanman jina; runastaj saqellarqankuña apajta.

⁷ Burrotataj Jesusman aysamorqanku; p'achasninkuta caronaykojtinkutaj, Jesusqa burroman montaykorqa.

⁸ Ashkha runastaj p'achasninkuta ñanman mast'asharqanku; wajkunataj, sach'asmanta ramasta p'akiramuspa, mast'allata ñanman churasharqanku.

⁹ Jesuspa ñaupaqenta rejkuna, qhepanta jamojkuna ima, qhaparisharqanku: Kausachun! Yupaychasqa kachun Diospa sutimpi jamojqa!

¹⁰ Yupaychasqa kachun tatanchej Davidpa jamoj reinon! Kausachun janaj pachapi!

¹¹ Jesustaj Jerusalenman chayaspa, temploman yaykorqa; muyuynimpi tukuy imata qhawaspataj, ch'isiyaykuyña kajtin, chunka iskayniyoj yachachisqasninwan Betaniaman rerqa.

Higos sach'ata maldicin

¹² Q'ayantin Betaniamanta kutirimushajtinku, Jesús yarqhachikorqa.

¹³ Karumantataj rikorqa uj higo sach'ata, q'omer laqhesniyojta. Higosta tariyta munaspataj, higo sach'aman qayllaykorqa, manataj poqoyta tarerqachu; manachayqa laqhesllata, imaraykuchus manaraj higos tiempochu karqa.

¹⁴ Chantá Jesús higo sach'aman nerqa: Ama jayk'aj, pipis poqoyniykita mikhuchunchu. Yachachisqasnintaj chay nisqanta uyarerqanku.

Jesús qharqon templomanta vendejkunata

¹⁵ Chaymantataj Jerusalenman chayamorqanku. Jesustaj temploman yaykuspa, rantejkunata, qhatojkunatawan jawaman qharqoyta qallarerqa. Qolqe chhalajkunaj mesasninkutataj tijrararqa; paloma qhatojkunaj tiyanasninkutapis tijrarallarqataj.

¹⁶ Manataj pitapis saqerqachu, templonejta imatapis apaykachananta.

¹⁷ Chay qhepantataj Jesusqa yachachiyta qallarerqa runasman, nispa: Manachu Escriturapi nin: Waseyqa Diosmanta mañakuna wasi, nisqa kanqa tukuy runaspaj, nispa? Qankunarí suwa jusk'uman tukuchisqankichej.

¹⁸ Jesuspa nisqanta uyarispataj, leymanta yachachejkuna, kuraj sacerdotes ima, mask'asharqanku imaynatachus Jesusta wañuchinankuta; imaraykuchus payta manchachikoj kanku tukuy runas. Jesuspa yachachisqantataj t'ukuspa uyarisharqanku.

¹⁹ Ch'isiyaykuytataj Jesús, yachachisqasnin ima llajtamanta riporqanku.

Higo sach'a ch'akisqa

²⁰ Q'ayantintaj, tutamanta ñanta rishaspa, higo sach'ata rikorqanku saphisninmantapacha ch'akisqata.

²¹ Pedrotaj Jesuspa nisqanta yuyarikuspa nerqa: Maestro, qhawariy, maldicisqayki higo sach'a ch'akipusqa.

²² Jesustaj kuticherqa: Diospi feniyoj kaychej.

²³ Cheqamanta niykichej, pillapis kay orqota ninman: Jatariy, jatun qochaman wijch'uykuykuy, sonqompitaj mana iskayrayaspa creenman chayqa, paypa nisqan ruwakunman.

²⁴ Chayrayku noqa niykichej: Diosmanta imatapis mañakuspaqa, creeychej jap'inaykichejta, jamusonqachejtaj.

²⁵ Diosmanta mañakushaspa, piwampis phiñanasqa kaspaqa, allinyakapuy; ajinamanta, janaj pachapi kaj Tataykichejpis juchasniykichejta pampachanqa. [

²⁶ Manachus runa masiykichejwan allinyakuwajchej chayqa; nillataj janaj pachapi kaj Tataykichejpis juchasniykichejta pampachanqachu.]

Jesuspa atiynin

²⁷ Ajinamanta, Jesús yachachisqasninwan kutirimorqa, templopi puriykachashajtintaj, payman chimpamorqanku kuraj sacerdotes, leymanta yachachejkuna, kurajkuna ima.

²⁸ Paykunataj Jesusta taporqanku: Ima atiywantaj kay tukuy imata ruwanki? Pitaj kay atiyta qosorqa chaykunata ruwanaykipaj?

²⁹ Jesustaj paykunaman kuticherqa: Noqapis ujta tapullasqaykichejtaj, chayman kutichiwankichej chayqa, noqapis willasqaykichej ima atiywanchus kay imasta ruwasqayta.

³⁰ Niwaychej, Juampa bautismonqa janaj pachamantachu, chayrí runakunamantachu?

³¹ Paykuna ukhutaj churanakusharqanku, nispa: Janaj pachamanta nisun chayqa, niwasunman. Imaraykutaj chantá mana creerqankichejchu?

³² Runasmanta jamorqa chay bautismo nisunchu? Paykunaqa runata manchachikorqanku, imaraykuchus tukuy yacharqanku Juanqa profetapuni kasqanta.

³³ Ajinamanta, Jesusman kuticherqanku: Mana yachaykuchu, nispa. Chaymantataj Jesús paykunaman nerqa: Noqapis mana niykichejmanchu ima atiywanchus kay imasta ruwasqayta.