Marcos 10 - Qheshwa Biblia DC

Mana t'aqanakunamanta

¹ Sayarispataj Jesusqa riporqa Judea jallp'aman, Jordán mayu chimpaman. Watejmanta ashkha runas Jesusman jamullarqankutaj; paykunatapis ujtawan yachachillarqataj imaynatachus yachachej, ajinata.

² Chantá fariseos Jesusman chimpaykorqanku; payta pantachiyta munaspa taporqanku: Niwayku, atikunchu qhareqa warminmanta t'aqakunan?

³ Jesustaj paykunaman kutichispa tapullarqataj: Imatataj Moisés kamachisorqachej?

⁴ Paykunataj kuticherqanku: Moisesqa nerqa, qhari, t'aqanaku papelta warminman qopunanta, chaymantataj saqerpayananta.

⁵ Jesustaj paykunaman nerqa: Moisesqa, chay kamachiyta escriberqa, qankuna rumi sonqos kasqaykichejrayku.

⁶ Kay pacha qallarikushajtin, Dios ruwarqa qharita, warmita ima.

⁷ Chayrayku qhareqa, tatanta, mamanta ima saqeponqa; warminwantaj ujlla kanqa.

⁸ Iskayninkutaj uj aychallaña kanqanku; chayrayku manaña iskaychu kanku, ujllaña.

⁹ Chayrayku Diospa tantasqantaqa, runa ama t'aqachunchu.

¹⁰ Wasipitaj yachachisqasnin chayllamantataj taporqanku.

¹¹ Jesustaj paykunaman nerqa: Pi qharillapis, warminmanta t'aqakuspa, waj warmiwan casarajqa, qhenchachakun ñaupaj warmimpa contrampi.

¹² Ajinallatataj warmipis, qosanmanta t'aqakuspa waj qhariwan casaran chayqa, paypis qhenchachakullantaj.

Jesusqa wawasman makisninta churan

¹³ Chaymantataj, runas Jesusman wawasta pusamorqanku llankhaykunampaj. Yachachisqasnintaj wawasta pusamojkunata k'amisharqanku.

¹⁴ Chayta rikuspataj, Jesusqa phiñakorqa yachachisqasnimpaj, nerqataj: Saqeychej wawas noqaman jamojta, ama jark'aychejchu; imaraykuchus paykunajta Diospa reinonqa.

¹⁵ Cheqamanta niykichej, pillapis mana wawa jina Diospa reinonta jap'enqa chayqa, mana jayk'aj yaykonqachu chayman.

¹⁶ Jesusqa wawasta marq'ariykukuspa, makisninta sapa ujman churaspataj, Diosmanta mañaporqa.

Uj qhapaj runa

¹⁷ Jesús, ñanman llojsishajtinña, uj runa usqhayllata jamorqa; Jesuspa ñaupaqenman qonqoriykukuspataj, payta taporqa: K'acha maestro, imata ruwaspataj wiñay kausayta tariyman?

¹⁸ Jesustaj payman nerqa: Imaraykutaj k'acha niwankiri? Mana pipis k'achaqa kanchu, Dios sapallan k'achaqa.

¹⁹ Diospa kamachisqanta yachanki: Ama qhenchachakuychu, ama runata wañuchiychu, ama suwaychu, ama llullakuspa tumpaychu, amam pitapis ch'aukiyaychu, respetaytaj tataykita, mamaykita ima.

²⁰ Runataj Jesusman kuticherqa: Maestro, kay tukuy imataqa wayna kasqaymantapacha junt'arqani.

²¹ Chantá Jesusqa qhawarispa munakuywan nerqa: Uj imataraj ruwanayki tiyan. Rispa tukuy imasniykita vendemuy, wajchasmantaj qopuy chay qolqeta, janaj pachapitaj ashkha kapuyniyki kanqa. Chantá jamuy, cruzniykita oqharispataj qhatiway.

²² Kayta uyarispataj chay runaqa, phutisqa, llakisqataj riporqa; imaraykuchus payqa ashkha kapuyniyoj karqa.

²³ Jesustaj muyuyninta qhawarispa, yachachisqasninta nerqa: May ñak'ayllata qhapajkunaqa Diospa reinonman yaykonqanku.

²⁴ Yachachisqasnintaj t'ukorqanku chay nisqanmanta; Jesustaj watejmanta paykunaman nillarqataj: Wawasníy, [qhapaj kayninkupi sonqonkuta churajkunapaj,] ñak'aylla Diospa reinonman yaykoyqa.

²⁵ Astawanqa, camelloraj atinman yarwej ningrinta yaykuyta, qhapaj runa Diospa reinonman yaykunanmantaqa.

²⁶ Chayta uyarispataj, yachachisqasnenqa astawanraj t'ukorqanku, ninakusharqankutaj: Chay jina kajtenqa, pitaj salvasqa kayta atinmanri?, nispa.

²⁷ Jesustaj paykunata qhawarispa nerqa: Runaspajqa, kayqa mana atikunchu, Diospajrí mana jinachu; imaraykuchus tukuy ima Diospajqa atikun.

²⁸ Chaymanta Pedro qallarerqa niyta: Noqaykoqa tukuy imaykuta saqerparispa qanta qhatimuyku.

^29-30 Jesustaj nerqa: Cheqamanta qankunaman niykichej. Pillapis noqarayku, evangelioraykutaj saqerparinman wasinta, wauqesninta, tatanta, mamanta, wawasninta, jallp'asninta ima chayqa, chay runaqa pachaj kutikama kunan p'unchaypi jap'inan tiyan: Wasista, wauqesta, panasta, mamasta, wawasta, jallp'asta ima, jinapis qhatiykachasqallataj kanqa. Qhepantataj jaqay p'unchay jamojtin, wiñay kausayta jap'enqa.

³¹ Ñaupajpi kajkunaqa qhepakonqanku; qhepapi kajkunataj ñaupajpi rikhurenqanku.

Wañunanmanta Jesús ujtawan willan

³² Jerusalenman wicharisharqanku, Jesustaj ñaupaqenkuta risharqa; paykunataj t'ukuspa, mancharisqastaj qhepanta risharqanku. Chantá chunka iskayniyoj yachachisqasninta wajnejman wajyaspa, willayta qallarerqa, imaschus paypaj kananmanta.

³³ Nerqataj: Kunanqa Jerusalén llajtaman wicharishanchej, chaypitaj Runaj Churin, kuraj sacerdotespa, leymanta yachachejkunaj makisninman ima urmanqa, paykunataj juchachanqanku wañuchinankupaj, gentilesmantaj jap'ichenqanku.

³⁴ Chay runasrí, payta asipayanqanku, jasut'enqanku, thoqaykonqanku, wañuchenqankutaj. Kinsa p'unchayninmantaj kausarimponqa.

Santiagowan Juanwan mañakunku

³⁵ Chaypacha Zebedeoj churisnin, Santiagowan Juanwan Jesusman qayllaykorqanku: Maestro, mañakusqaykuta munaykuman uyarinawaykuta, nispa.

³⁶ Paytaj nerqa: Imatataj munankichej ruwapunayta?

³⁷ Paykunataj kuticherqanku: Janaj pacha k'anchayniykipi kashajtiyki, munaykuman tiyachinawaykuta, ujniykuta pañaykiman, ujniykutataj lloq'eykiman.

³⁸ Jesustaj paykunaman nerqa: Mana yachankichejchu imatachus mañakusqaykichejta. Atiwajchejchu ujyayta noqaj ujyanay vasomanta? Bautizakuwajchejtajchu, mayqen bautismowanchus noqa bautizakuni chaywan?

³⁹ Paykunataj kuticherqanku: Arí atiyku chayta ruwaytaqa. Jesustaj paykunaman nillarqataj: Cheqamanta atinkichej ujyanaymanta ujyayta; mayqen bautismowanchus bautizakuni chaywan bautizakuytapis.

⁴⁰ Pañaypi, lloq'eypitaj qankunata tiyachinayqa, mana noqaj munayniychu. Dioslla chaytaqa qoyta atin, pikunapajchus wakichin chaykunaman.

⁴¹ Chunka yachachisqasnintaj, chay mañakusqankuta uyarispa phiñakorqanku Santiagopaj Juampajwan.

⁴² Jesustaj yachachisqasninta wajyaspa nerqa: Yachankichej jina, llajtasta kamachejkunaqa atiyninkuta rikuchispa runasta llakichinku. Ajinallatataj kamachisninkupis atiyninkuta rikuchinku runasman.

⁴³ Qankuna ukhupirí, mana jinachu kanqa; mayqenchari aswan atiyniyoj kayta munan chayqa, kamachiykichej kanan tiyan.

⁴⁴ Pillapis atiyniyoj kayta munajqa, tukuyniykichejpa kamachin kanan tiyan.

⁴⁵ Runaj Churenqa mana sirvichikojchu jamorqa, astawanqa runata sirvej jamorqa, kausaynintataj qoj, ashkha runa salvasqa kanampaj.

Ciego Bartimeota Jesús qhawarichin

⁴⁶ Chantá Jericoman jamorqanku; chaymanta Jesús yachachisqasninwan llojsishajtinkutaj, ashkha runaswan ima, ciego Bartimeo, Timeoj wawan, tiyakusharqa ñan patapi mañakuspa.

⁴⁷ Bartimeotaj, Jesús nazareno jamushasqanta uyarispa, qhapariyta qallarerqa: Jesús, Davidpa Churin, khuyariway ari!, nispa.

⁴⁸ Ashkhastaj k'amisharqanku, ch'inyananta munaspa. Paytaj astawan sinch'ita qhaparisharqa: Jesús, Davidpa Churin, khuyariway ari!, nispa.

⁴⁹ Jesustaj sayaykuspa wajyacherqa; paykunataj wajyarqanku ciegota: Sonqochakuy, jatariy. Jesús wajyasunki, nispa.

⁵⁰ Bartimeotaj ponchonta wijch'uspa, sayariytawan Jesusman chimparqa.

⁵¹ Jesustaj kutichispa nerqa: Imatataj munanki ruwapusunayta? Ciegotaj Jesusman nerqa: Maestro, qhawariyta munani.

⁵² Jesustaj payman nerqa: Ripuy, thañisqaña kanki creesqaykirayku. Kikimpachataj ciegoqa qhawarerqa, Jesuswantaj ñanta rerqa.