Marcos 1 - Qheshwa Biblia DC

Juan Bautista evangeliota willaspa purej

¹ Kayqa Diospa Churin Jesucristoj evangeliompa qallariynin.

² Profeta Isaiaspa escribisqanman jina, nin: Willajniyta ñaupaqeykita kachamushani, qampaj ñanta wakichinampaj.

³ Ch'impi, uj runaj qhapariynin uyarikun: Señorpaj ñanta pichaychej, cheqanyachiychejtaj purinasninta.

⁴ Juanqa bautizasharqa ch'innejpi, willasharqataj Diosman kutirikuy bautismomanta, runaspa juchasninku pampachasqas kanampaj.

⁵ Juanta uyarej jamorqanku, tukuy Judea jallp'amanta; Jerusalén llajtapi kajkuna ima. Bautizachikorqankutaj paywan Jordán mayupi juchasninkuta willakuspa.

⁶ Juantaj p'achallisqa karqa camelloj millmanmanta ruwasqa p'achawan; chumpikojtaj qara chumpiwan; mikhojtaj langostasta, monte misk'ita ima.

⁷ Runasmantaj willasharqa kay jinata: Uj qhari qhepayta jamushan, noqamanta aswan atiyniyoj; manataj k'umuykuspa ujut'asnimpa watusnillantapis phaskanaypaj jinachu kani.

⁸ Noqaqa, yakuwan bautizaykichej; paytaj Santo Espirituwan bautizasonqachej.

Jesús bautizachikorqa Juanwan

⁹ Chaypachallataj Jesús jamorqa Galileapi kaj Nazaret llajtamanta, bautizachikorqataj Juanwan Jordán mayupi.

¹⁰ Jesús yakumanta llojsimushaspa, rikorqa cielo kicharikushajta; Espiritutataj, paloma jina, paypa patanman uraykamushajta.

¹¹ Cielomantataj Dios nimorqa: Qanmin munasqa Churiy kanki, qannejta sonqo junt'asqa kani.

Supay tientan Jesusta

¹² Chay kikimpachataj, Santo Espíritu Jesusta ch'innejman pusarqa.

¹³ Jesustaj chaypi karqa, tawa chunka p'unchayta; supaytaj probarqa. Chay ch'impi pay karqa, phiña animaleswan khuska. Angelestaj jamuspa mikhunata jaywarqanku.

Jesús Galileapi predicayta qallarin

^14-15 Chay qhepata, Juanta carcelman wisq'achisqankumantaña, Jesús rerqa Galileaman, willaspa Diospa evangelionmanta, nispa: Tiempo junt'akapunña, Diospa reinontaj kayllapiña kashan. Juchasniykichejta saqerpayaspa Diosman kutiriychej, evangeliopitaj creeychej.

Jesús wajyan tawa challwirista

¹⁶ Chaypacha, Jesusqa Galilea qocha cantonta rishaspa, rikorqa Simonta, wauqen Andrestawan. Paykunaqa qochaman ch'ipata wijch'uykusharqanku challwata jap'inankupaj, imaraykuchus challwiris karqanku.

¹⁷ Jesustaj paykunaman nerqa: Qhepayta jamuychej, noqataj runa jap'ej challwirista ruwasqaykichej.

¹⁸ Chay kikimpi challwa jap'inasninkuta saqerparispataj, Jesuspa qhepanta rerqanku.

¹⁹ Tumpatawan karuncharispataj, Jesús rikullarqataj Zebedeoj churisninta. Bote ukhupi kasharqanku Santiago, wauqen Juan ima. Paykunaqa wakichisharqanku challwa jap'inasninkuta t'irispa.

²⁰ Rikuytawankamataj, paykunatapis Jesús wajyallarqataj. Paykunataj tatanku Zebedeota, llank'ajkunatawan botepi saqespa, Jesuspa qhepanta rerqanku.

Supayniyoj runa

²¹ Chaymantá, Capernaum llajtaman chayarqanku; samakuna diapitaj sinagogaman yaykuspa, Jesusqa yachacherqa.

²² Runakunataj, yachachisqanta uyarispa t'ukorqanku; imaraykuchus Jesusqa atiyniyoj jina yachachisharqa, mana leymanta yachachejkuna jinachu.

^23-24 Chay sinagogapitaj, uj runa kasharqa millay supayniyoj, qhaparerqataj, nispa: Nazaretmanta Jesús! Ima nispataj noqaykuwan jap'inakoj jamunkiri? Noqaykuta tukuchejchu jamunki? Noqa yachani pichus kasqaykita. Diospa ajllasqan kanki!

²⁵ Jesustaj supayta k'amerqa, nispa: Ch'in kay, llojsiy chay runamanta!

²⁶ Millay supaytaj, runata sinch'ita thalaspa, jatunta qhaparispataj, chay runamanta llojserqa.

²⁷ Runastaj t'ukuspa, purajmanta tapunakusharqanku: Imataj kayri? Ima mosoj yachachiytajri? Kay jina atiyniyojpuni kananri! Millay supaykunasnintinta kamachin, kasunkutaj, nispa.

²⁸ Ajinamanta, chay kikimpacha tukuynejpi Jesusmanta yacharqanku, tukuy Galileaj muyuynintimpi.

Jesús thañichin Pedroj suegranta

²⁹ Sinagogamanta llojsispa Jesusqa, Santiagowan Juanwan ima rerqanku Simompa Andrespatawan wasinkuman.

³⁰ Simompa suegranqa k'ajaj onqoywan sirisharqa; chaypi kajkunataj warmej onqoykusqanta Jesusman willarqanku.

³¹ Jesustaj payman qayllaykuspa, makinmanta aysarispa jataricherqa. Chay kikimpachataj k'ajaj onqoyninmanta thañikaporqa; paykunamantaj mikhunata jaywarqa.

Jesús thañichin ashkha onqosqasta

³² Inti yaykuyta, ña ch'isiyaykuytaña, Jesusman pusamorqanku tukuy onqosqasta, supayniyoj runastawan.

³³ Tukuy llajtamanta runastaj, wasi punkuman tantakamorqanku.

³⁴ Jesustaj ashkhasta thañicherqa, tukuy laya onqoymanta. Runasmantapis ashkha supaykunata qharqorqa; manataj supaykunata parlajta saqejchu. Paykunaqa Jesusta rejserqanku pichus kasqanta.

Jesús evangeliota willan Galileapi

³⁵ Jesusqa tutamanta jatarispa, allin chhajchuta wasimanta llojsispa, ch'innejman rerqa; chaypitaj Diosmanta mañakusharqa.

³⁶ Simontaj, paywan kajkuna ima, Jesusta mask'amorqanku.

³⁷ Tarispataj nerqanku: Tukuy watukushasunku, nispa.

³⁸ Jesustaj paykunaman kuticherqa: Jakuchej wajkunaman; kay qayllaspipis runasman willanallataj tiyan, imaraykuchus chaypajmin noqaqa jamorqani.

³⁹ Ajinata Jesús purerqa, tukuy Galileata, sinagogasninkupi evangeliota willaspa; supaykunatapis runasmanta qharqospa.

Jesús thañichin lepra onqoyniyoj runata

⁴⁰ Uj kuti Jesusman jamorqa uj runa lepra onqoyniyoj. Qonqoriykukuspataj Jesusmanta mañakorqa: Sichus munanki chayqa, thañichiway, nispa.

⁴¹ Jesustaj payta khuyaspa, makinwan llankhaykorqa, nerqataj: Arí munani, thañikapuy, nispa.

⁴² Jesús chayta nisqantawan, runaqa lepra onqoyninmanta llimphuchasqa karqa.

^43-44 Chaymantataj kachaporqa mayta kamachispa: Allinta uyariway. Ama pimampis willankichu kay ruwasqayta. Riy cheqanta, sacerdoteman rikuchikamuy; ofrendaykita qomuy Moisespa kamachisqanman jina; chaywantaj runas yachanqanku thañisqaña kasqaykita.

⁴⁵ Runataj riytawan tukuyman willamorqa imaynatachus Jesús chay onqoyninmanta thañichisqanta; chay jawataj Jesusqa pakayllamantaña llajtasmampis yaykoj; ch'inkunallapiñataj kamoj; chaywampis Jesusmanqa tukuynejmanta jamullajpuni kanku.