Malaquías 4 - Qheshwa Biblia DC

Señorpa jamunan p'unchay

¹ Tukuy Atiyniyoj Señorqa nin: Horno jina lauraj p'unchay qayllamushan, mayqempichus tukuy jatunchakojkuna, tukuynin sajra runastaj ichhu jina ruphanqanku. Chay jamoj p'unchaypi paykunata tukuyninkuta q'olanqa, nitaj imapis chaypacha paykunamanta puchonqachu.

² Qankuna sutiyta honrankichej chaykunapajqa, cheqan kayniy inti jina lliphipirenqa, k'anchaynimpi salvacionta apamuspa. Qankunataj kusiywan phinkirinkichej imaynatachus uña wakas corralmanta llojsispa phinkiykacharinku ajinata.

³ Chay p'unchaypi mayqentachus wakichishani, chaypacha qankuna chakisniykichejwan sajra runasta sarunkichej ñut'u jallp'ata jina.

⁴ Horeb nisqa orqopi, kamachiy Moisés kamachiyniykunata qorqani, chaykunamanta yuyarikuychej. Chay kamachisqasniytaqa tukuynin Israel runas junt'ananku karqa.

⁵ Elías profetata kachamusqaykichej, Señorpa p'unchaynin manaraj chayamushajtin, mayqenchus uj jatun p'unchay kanqa, ancha manchachikunataj.

⁶ Paytaj tataspa sonqonta wawasninwan allinyachenqa, wawaspa sonqontapis tatasninkuwan. Mana jinata ruwajtinkoqa, noqa jamusaj, llajtantinta jasut'isaj, tukuyninta t'unaykuspa.