Malaquías 1 - Qheshwa Biblia DC

Israel aylluta Dios munakun

¹ Kay willayta Israel aylluman Señor parlamorqa Malaquías profetanejta.

^2-3 Señorqa nin: Noqa qankunata munakuykichej. Qankunataj niwankichej: Imaynapi yachayku qan munakuwasqaykuta?, nispa. Chanta Señor kutichin: Esaoqa Jacobpa wauqen karqa; noqa Jacobta munakorqani, Esautataj chejnerqani. Esaupata llajtan ashkha orqosniyoj karqa, chayta ch'in lomasman tukucherqani. Jallp'asnintarí, campo animalesllapaj allin kanampaj tukucherqani.

⁴ Esaojpa miraynin Edom llajtayojkunachus ninkuman: T'unasqas karqanchej, watejmanta llajtanchejta sayachinallataj nispa chayqa; Tukuy Atiyniyoj Señorqa paykunaman kutichinman: Watejmanta llajtankuta ruwakojtinkoqa, noqa ujtawan t'unallasajtaj. Jallp'ankumantataj nenqanku: Kay jallp'aqa sajra nisqa, runasninkumantataj nenqanku: Kay runaswanqa Señor wiñaypaj phiñasqa, nispa.

⁵ Qankunataj chayta ñawisniykichej rikunkichej. Chantá ninkichej: Israel llajtamantapis aswan jaqaynejkama Señorqa jatunchasqa kashan, nispa.

Señorqa k'amin sacerdotesta

⁶ Tukuy Atiyniyoj Señorqa sacerdotesta nin: Wawasqa tatasninkuta honranku, uywasqaspis patronesninkuta honrallankutaj. Sichus noqa Tataykichej kani chayqa, sacerdotes, qankunaqa imaraykutaj mana honrawankichejchu? Sitajchus qankunajta Señorniykichej kani chayqa, imaraykutaj mana respetakuwankichejchu? Astawampis qankuna noqata qhesachaspa ninkichejraj: Imapi qanta qhesachasuyku?, nispa.

⁷ Qankunaqa altarniyman ch'ichichasqa t'antata apamunkichej, chanta tapunkichejraj: Imapi qanta phiñachiyku?, nispa. Qankuna sonqoyta nanachiwankichej, altarniyta p'enqachiyta munaspa.

⁸ Yuyaspataj noqaman jaywayta onqosqa uywasta, ciegosta, chakin p'akisqasta ima. Riychej ari, qankunata kamachej runasman, jaywamuychejtaj chay onqosqa uywasta, chanta yachankichej, paykuna kusiywanchus chay jaywasqaykichej uywasta jap'ikonqanku chayta.

^9-10 Diosmanta mañakuychej khuyakunawanchejta. Chaywampis, sichus chay laya ofrendata jaywankichej chayqa, ama yuyaychejchu Dios kusiywan jap'ikunantaqa. Kayta Tukuy Atiyniyoj Señorqa nin: Noqa munayman mayqellampis qankunamanta templo punkuta wisq'aykapunanta, ama ujtawan qhasi mana kajpaj altarniypi nina jap'ichisqa kanampaj. Qankunawanqa mana kusiyniy kanchu, ofrendasniykichejtapis mana jap'isajñachu.

¹¹ Tukuynejpi kay pachapi sutiyta jatumpaj jap'inku; tukuynejpi inciensota noqapaj q'osñichinku, ofrendatataj qonku llimphu uywasta, imaraykuchus suteyqa may jatunmin tukuynin llajtas ukhupi, nin Tukuy Atiyniyoj Señorqa.

¹² Qankunataj sonqoyta nanachiwankichej, imaraykuchus ninkichej Señorpa mesan millay kasqanta, nillankichejtaj mikhuna kajtaqa qhesachana kasqanta.

¹³ Qankuna ninkichej: Kay yupaychanaswanqa sayk'usqas kanchej, nispa. Chay jinata qhesachawankichej. Chanta yuyankichejraj kusikunayta, maypachachus noqaman jaywaj jamunkichej suwasqa uywata, chakin p'akisqata, chayri onqosqatapis, nin Tukuy Atiyniyoj Señorqa.

¹⁴ Maldicisqa kachun nejqa mana onqosqa uywata jaywanawanta, nishaspa, chantá onqosqa kajtataj jaywawajqa. Noqaqa jatun Reymin kani, tukuy llajtaspa respetasqantaj kani. Ajinata Tukuy Atiyniyoj Señorqa nin.