San Lucas 24 - Qheshwa Biblia DC

Jesuspa kausarimpuynin

¹ Semanaj ñaupaj p'unchaynimpi, chhapu chhapullataraj, paykuna sepulturaman jamorqanku, q'apaj jampista wakichisqankuta apamuspa, waj warmiswan khuska.

² Sepulturaj rumintataj tijrasqata tariparqanku.

³ Yaykuspataj, mana tarerqankuchu Señor Jesuspa ayanta.

⁴ Chayrayku, manchachikuspa mana ni imanakuyta atishajtinku, paykunaj qayllankupi iskay qharis rikhurerqanku, lliphipishaj p'achasniyoj.

⁵ Mancharikuspa k'umuykojtinkutaj, chay qharis paykunaman nerqanku: Imaraykutaj kausashaj runata wañusqas ukhupi mask'ashankichej?

^6-7 Manaña kaypichu, kausarimpunña. Yuyarikuychej Galileallapiraj kashaspa qankunaman nerqa: Runaj Churenqa entregasqa kanqa juchasapaspa makinman chakatanankupaj; kinsa p'unchaymantataj wañusqa ukhumanta kausarimunanta.

⁸ Chaypacharaj paykuna yuyarikorqanku Jesuspa nisqasninmanta.

⁹ Aya p'ampanamanta kutimuspataj, kay tukuyta willarqanku chunka ujniyoj yachachisqasman, wajkunaman ima.

¹⁰ Kay imasta yachachisqasman willajkunaqa karqanku: María Magdalena, Juanawan, Santiagoj maman Mariawan, waj warmiswan ima.

¹¹ Warmispa nisqankutataj yachachisqasqa mana creerqankuchu.

¹² Jatarispataj Pedroqa usqhayta sepulturaman rerqa. Ukhunejta qhawaykuspataj, uj cheqapi sabanasllata rikorqa; chantá riporqa t'ukuspa chay ruwasqanmanta.

Emaús ñampi

¹³ Kikin p'unchayllataj, paykunamanta iskay risharqanku Emaús sutiyoj ranchoman. Chaytaj Jerusalenmanta iskay leguapi jina karqa.

¹⁴ Rej jinataj paykunapura parlasharqanku kay tukuy ima kasqanmanta.

¹⁵ Churanakuspa parlanankukamataj, kikin Jesús qayllaykorqa. Paykunawan khuskataj rerqa.

¹⁶ Paykunaj ñawisninkutaj chharpuyasqa jina kasharqanku, payta mana rejsinankupaj.

¹⁷ Chantá Jesús taporqa: Imamantapunitaj chay jinata churanakushankichej purej jinari? Imaraykutaj llakisqas kashankichej?

¹⁸ Paykunamanta ujnin kajtaj, Cleofas sutiyoj kuticherqa: Qanllachu k'ata forastero kanki Jerusalempi mana yachaj imachus kasqanta kay p'unchaykunapi?

^19-20 Chantataj pay kuticherqa: Imata?, nispa. Paykunataj nerqanku: Nazareno Jesusmanta pichus profeta karqa, ruwasqasnimpi atiyniyoj, nisqasnimpi ima, Diospa ñaupaqempi runakunajpipis; imaynatachus kuraj sacerdotes, kurajkunasninchej ima payta jap'ichispa juchacharqanku wañunampaj, chakatachinankupajtaj.

²¹ Noqaykutaj suyasharqayku pay Israel nacionta kacharichinanta. Kunantaj kinsa p'unchayña kashan chay tukuy ima ruwakusqanqa.

²² Chay tukuywampis, noqayku ukhumanta wakin warmis mancharichiwarqayku, chhapu chhaputa sepulturaman rispa.

²³ Ayanta mana tarispataj, willaj kutimorqanku, iskay ángeles rikhurisqanta ima. Chay angelesqa paykunaman nisqanku Jesús kausakushasqanta.

²⁴ Noqaykumanta wakintaj sepulturaman rillasqankutaj, ch'usajllatataj taripasqanku warmispa nisqankuman jina; Jesustataj mana rikusqankuchu.

²⁵ Chantá pay nerqa: Ay, mana yuyayniyojkuna rumi sonqos, chay jinatapunichu mana creenkichej profetaspa tukuy nisqanta!

²⁶ Manachu Cristoqa chay tukuyta ñak'arinampuni karqa, manaraj janaj pachaman yaykushaspa?

²⁷ Chaypitaj sut'inchayta qallarerqa, paymanta chay tukuy imata Diospa palabran nisqanta; Moisesmantapacha qallarispa, tukuy profetaspa escribisqankumantawan.

²⁸ Mayqen llajtamanchus risharqanku chayman chayaspataj, Jesusqa aswan karuman rej tukorqa.

²⁹ Paykunataj jark'arqanku Jesusta: Qhepakuy ari noqaykuwan, intipis yaykushanña, ch'isiyamonqaña, nispa. Jesustaj yaykuspa paykunawan qhepakorqa.

³⁰ Ajinataj karqa, Jesusqa paykunawan mesapi kashaspa t'antata oqharispa, graciasta qospataj, partiytawan paykunaman jaywarqa.

³¹ Chay kikimpachataj ñawisninku kicharikorqa, Jesustataj rejsikaporqanku. Paytaj ñaupaqenkumanta chinkarerqa.

³² Paykunataj ninakorqanku: Manachu sonqonchej k'ajarerqa ñampi parlawashajtinchej; Diospa palabrantataj sut'inchashawajtinchej?, nispa.

³³ Kikimpacha jatarispataj Jerusalenman kutirerqanku, chaypitaj Jesuspa chunka ujniyoj apostolesninta tariparqanku, paykunawan kajkunatawan tantasqata.

³⁴ Paykunataj nisharqanku: Cheqamanta Señorqa kausarimpun, Simonmampis rikhurisqa, nispa.

³⁵ Chantá paykunataj willarqanku imaynachus ñampi kasqanta, imaynatatajchus rejsikapusqankuta t'antata partishajtin.

Jesús rikhurin yachachisqasninman

³⁶ Paykuna kay imasmanta parlakunankukamataj, Jesusqa chaupinkupi sayaykuspa napaykorqa: Diospa sonqo tiyasqa kaynin qankunawan kachun, nispa.

³⁷ Chantá paykunaqa, manchariywan musphasqas, creerqanku uj espirituta rikusqankuta.

³⁸ Jesustaj paykunaman nerqa: Imaraykutaj mancharikunkichej, sonqoykichejpitaj iskayrayashankichejri?

³⁹ Qhawariychej makisniyta, chakisniyta ima. Noqa kikiy kani. Llujchiychej, qhawaychejtaj; imaraykuchus uj espiritoqa mana aychayojchu, nitaj tulluyojchu, noqajta rikushankichej jina.

⁴⁰ Kayta nispataj, rikucherqa makisninta, chakisninta ima.

⁴¹ Paykunataj kusikuywan t'ukuspa manaraj creerqankuchu. Jesustaj paykunaman nerqa: Tiyapusunkichejchu ima mikhunallapis?, nispa.

⁴² Paykunataj jaywarqanku uj chhikan challwa kankasqata, [Lachiwana misk'itawan.]

⁴³ Jap'ikuspataj Jesusqa mikhorqa paykunaj ñaupaqenkupi.

⁴⁴ Chaymantataj nerqa: Kayta nerqaykichejña qankunallawanraj kashaspa, junt'akunampuni kasqanta chay tukuy, noqamanta escribisqa kajkuna Moisespa leynimpi, profetaspapi, salmospi ima.

^45-46 Chaymantataj sut'incharqa, allinta unanchanankupaj Diospa palabranta; nispa: Ajina escribisqa kashan, jinatapuni Cristoqa ñak'arinan karqa; chantataj wañusqakuna ukhumanta kausarimunan karqa kinsa p'unchayninman.

⁴⁷ Sutimpitaj willakunan tiyan Diosman kutirinamanta; juchas pampachasqas kanankuta tukuynejpi, Jerusalenmanta qallarispa.

⁴⁸ Qankunataj testigos kankichej kay tukuy imasmanta.

⁴⁹ Qhawaychej noqa kachamusqaykichej, Dios Tatay qosunaykichej karqa chayta; chaykamarí, qhepakuychej Jerusalén llajtapi; patamanta atiywan kallpachasqas kanaykichejkama.

Jesús ripun janaj pachaman

⁵⁰ Chaymantataj Jesusqa, yachachisqasninta jawaman pusarqa Betaniakama. Chaypitaj makisninta oqharispa paykunata bendicerqa.

⁵¹ Bendicishaspataj paykunamanta karunchakorqa, janaj pachamantaj oqharisqa karqa.

⁵² Paykunataj Jesusta yupaychaytawan, may kusisqas kutiporqanku Jerusalenman.

⁵³ Chaypitaj templopipuni karqanku Diosta alabaspa. Amén.