San Lucas 22 - Qheshwa Biblia DC

Jesusta wañuchiyta munanku

¹ Qayllaña karqa mana levadurayoj t'anta mikhuna Pascuaman.

² Jatun sacerdotes, leymanta yachachejkuna ima, Jesusta mask'asharqanku imaynamantachus wañuchinankuta, imaraykuchus runasta manchachikorqanku.

³ Satanastaj yaykorqa Judas Iscariote sutiyojman. Payqa Jesuspa chunka iskayniyoj yachachisqasninmanta ujnin kaj karqa.

⁴ Judasqa, riytawan parlamorqa jatun sacerdoteswan, templota qhawajkunawan ima. Tukuyninkuwan parlarqa imaynatachus Jesusta jap'ichinanmanta.

⁵ Paykunataj kusikorqanku, parlarqankutaj qolqeta Judasman qonankupaj.

⁶ Paytaj, arí nispa, mask'ayta qallarerqa, imaynamantachus mana runaj rikusqanta Jesusta jap'ichinampaj.

Señorpa Cenan

⁷ Chayamorqa chay mana levadurayoj t'anta mikhuna p'unchay. Chaypacha Pascua corderota wañuchinanku karqa.

⁸ Jesustaj kacharqa Pedrota, Juantawan, nispa: Riychej wakichej Pascua mikhuyta mikhunanchejpaj.

⁹ Paykunataj taporqanku: Maypitaj munanki wakichinaykuta?

¹⁰ Jesustaj kuticherqa: Llajtaman yaykoj jina tinkunkichej yaku p'uyñuta apashaj runawan. Paywantaj riychej may wasinmanchá yaykonqa chaykama.

¹¹ Wasiyojmantaj niychej: Maestro nichimusunki: Maypitaj kashan chay wasi yachachisqasniywan Pascua cenata mikhunaypaj?

¹² Chantataj pay rikuchisonqachej k'uchunchasqata uj jatun cuartota alto patapi; chaypitaj wakichinkichej.

¹³ Rispataj paykunaqa, imaynatachus Jesús nisqanman jina tariparqanku; chaypitaj wakicherqanku Pascua mikhuyta.

¹⁴ Mikhuna horaña kajtintaj, Jesús mesaman tiyaykukorqa yachachisqasninwan.

¹⁵ Chaypitaj nerqa: Maytapuni munarqani kay Pascuata qankunawan mikhuyta, manaraj ñak'arishaspa.

¹⁶ Noqaqa niykichej, manaña ujtawan Pascuata qankunawan mikhusajñachu, kay mundopi Diospa reinon junt'akunankama.

¹⁷ Chantá copata oqharispataj, graciasta qospa nerqa: Jap'iychej, sapa ujniykichejtaj kaymanta ujyaychej.

¹⁸ Nillaykichejtaj manaña ujtawan ujyasajchu uvas poqoymanta, Diospa reinon chayamunankama.

¹⁹ Chaymantaqa, t'antata oqharispañataj graciasta qorqa, partispataj paykunaman jaywarqa, nispa: Kayqa cuerpoymin, qankunarayku qosqa. Kayta ruwaychej noqamanta yuyarikuspa.

²⁰ Jinallatataj, cenaytawankama copata oqharispa nerqa: Kay copaqa yawarniypi mosoj tratomin, qankunarayku jich'asqa kanqa.

²¹ Chay tukuywampis, kunanqa jap'ichiwajniypa makin noqawan mesapi kashan.

²² Cheqamanta Runaj Churenqa rishan, ñaupajmantapacha kamachisqa kasqanman jina; chaywampis, ay, chay runamanta, piraykuchus jap'ichisqa kanqa!

²³ Chaymanta paykunapura tapunakuyta qallarerqanku, mayqenchus paykunamanta chayta ruwaj kanman chayta yachanankupaj.

Pitaj aswan jatun kanman?

²⁴ Jesuspa yachachisqasnintaj churanakusharqanku mayqenninkuchus aswan kuraj kananmanta.

²⁵ Paytaj nerqa: Reyesqa nacionesta kamachinku; chay nacionesta kamachejkunatataj, sumaj ruwajkuna nispa sutichanku.

²⁶ Qankuna ukhupitaj mana ajinachu kanqa; qankunamanta kuraj kajqa, sullk'a jina kachun, kamachejtaj kamachi jina kachun.

²⁷ Ajina kajtenqa, mayqentaj aswan kuraj: Pichus mesaman tiyaykojchu, chayrí kamachi kajchu? Manachu mesaman tiyaykoj? Noqarí qankuna ukhupi kamachi jina kashani.

²⁸ Qankunataj ñak'ariykunasniypi noqawan karqankichej.

^29-30 Chaynejta qoykichej uj reinota, imaynatachus Tatay qowarqa ajinata; reinoypi mesapi mikhunaykichejpaj, ujyanaykichejpaj ima. Ajinallatataj tronospi tiyaykunkichej Israelpa chunka iskayniyoj ayllusninta juzganaykichejpaj.

Jesús willan Pedro qhesachananta

³¹ Nillarqataj Señorqa: Simón, Simón, Supayqa mañan trigota jina thalanasuykichejta.

³² Noqataj mañakuni feniyki ama pisiyanampaj. Qantaj noqaman kutirimuspa kallpachay wauqesniykita.

³³ Simontaj kuticherqa: Señor, qanwanqa mana carcelllamanchu rinaypaj wakichisqa kani, astawanqa wañuykama.

³⁴ Paytaj kuticherqa: Pedro kunan niyki, manaraj gallo waqashajtin, kinsa kutita qanqa mana rejsinichu niwanki.

Ñak'ariy horamanta

³⁵ Jesús taporqa paykunata: Maypachachus kacharqaykichej, mana ch'uspayojta, mana wayaqayojta, nitaj ujut'asniyojta chaypacha, pisisorqachejchu imallapis? Paykunataj, mana imapis pisiwarqaykuchu, nerqanku.

³⁶ Jesustaj nerqa: Kunanqa, ch'uspan kajtenqa apachun, jinallatataj wayaqatapis. Mana espadayojtaj rantikuchun p'achanta vendespa.

³⁷ Noqaqa niykichej: Chay escribisqaqa noqapiraj junt'akunan tiyan: Juchasapaswan yupasqa karqa; noqamanta escribisqaqa junt'akushanña.

³⁸ Chaypacha paykuna nerqanku: Señor, kaypi tiyan iskay espadas. Paytaj kuticherqa: Jinallaña kachun, nispa.

Jesús Getsemanipi

³⁹ Jesusqa, usunman jina Olivos orqoman llojserqa, yachachisqasnimpis qhepanta rillarqankutaj.

⁴⁰ Jaqayman chayaspataj, paykunaman nerqa: Mañaykuychej ama juchaman urmanaykichejpaj.

^41-42 Paykunamantataj karunchakorqa, uj rumi choqayman jina; qonqoriykukuspataj mañakorqa: Tatáy, munanki chayqa, kay ñak'arinaymanta jark'away; chaywampis, ama noqaj munasqaychu ruwakuchun, manachayqa qampallata. [

⁴³ Uj angeltaj janaj pachamanta rikhurerqa Jesusman, kallpachanampaj.

⁴⁴ Anchatañapuni ñak'arishaspataj, aswan sinch'ita mañakorqa, jump'iynintaj jatuchaj yawar sut'iykuna jina pampaman sut'orqa.]

^45-46 Diosmanta mañakusqanmanta sayarispataj, qayllaykorqa yachachisqasninman, tariparqataj llakiy jawa puñurashajta; nerqataj: Imaraykutaj puñushankichej? Jatariychej, mañakuychej ama juchaman urmanaykichejpaj.

Jesusta presochanku

⁴⁷ Jesús parlashajtillanraj, ashkha runas chayamorqanku; Judas sutiyojtaj, ujnin kaj, chunka iskayniyoj yachachisqasninmanta, risharqa paykunaj ñaupaqenkuta; qayllaykuspataj Jesusta much'aykorqa.

⁴⁸ Chaypi Jesús nerqa: Judas, ujta much'aykuspachu Runaj Churintaqa jap'ichinki?

⁴⁹ Paywan kajkuna imachus kananta yachaspa, nerqanku: Señor, espadawanchu wajtasqayku?

⁵⁰ Paykunamanta ujnin kajtaj, ujta wajtaspa, jatun sacerdotej kamachimpa paña ningrinta qholurparerqa.

⁵¹ Jesustaj nerqa: Amaña, saqeychej, nispa. Ningrinta llankhaykuspataj k'askaykuchiporqa.

⁵² Kuraj sacerdotesman, templota qhawajkunaman, kurajkunaman ima, pikunachus jamorqanku apanankupaj chaykunaman Jesús nerqa: Espadaswan, k'aspiswan imachu llojsimorqankichej, suwapis noqa kayman jina?

⁵³ Sapa p'unchay qankunawan templopi kashajteyqa, mana jap'ichiwarqankichejchu. Kunanqa chayamun horaykichej, laqhayaypa atiynin ima.

Jesusta Pedro qhesachan

⁵⁴ Presochaspataj Jesustaqa pusarqanku jatun sacerdotej wasinman. Pedrotaj qhatisharqa karu qhepallata.

⁵⁵ Chaypi, chaupi patiopi ninata jap'icherqanku, muyuyninmantaj tiyaykorqanku. Pedropis tiyaykullarqataj paykunawan khuska.

⁵⁶ Uj imillataj, Pedrota nina qayllapi tiyashajta rikuspa, allinta qhawarispataj nerqa: Kay runapis Jesuswan kasharqa.

⁵⁷ Pedrotaj nerqa: Warmi, mana payta rejsinichu.

⁵⁸ Qhepatataj wajñataj rikuspa nerqa: Qampis paykunamanta kanki. Pedrotaj kuticherqa: Runa, mana paykunamantachu kani.

⁵⁹ Uj horanmantaj, wajñataj nisharqa: Cheqatapuni kaypis Jesuswan kasharqa; imaraykuchus Galileamanta paypis.

⁶⁰ Pedrotaj nerqa: Runa, mana yachanichu imatachus nisqaykita, nispa. Kikimpachataj, Pedro parlashajtillanraj gallo qhaparerqa.

⁶¹ Chantá, Señorqa kutirikuspa Pedrota qhawarerqa. Pedrotaj yuyarikorqa Señorpa nisqanmanta: Manaraj gallo waqashajtin, kinsa kutita mana rejsinichu niwanki, nisqanta.

⁶² Jawaman llojsispataj Pedroqa sonqo nanayta waqarqa.

Jesusta asipayanku

⁶³ Jesusta qhawajkunataj, asipayaspa maqarqanku.

⁶⁴ Ñawisninta qhataykuspa uyampi laq'arqanku, taporqankutaj: Diospa sutimpi parlay ari, pitaj maqasunki?, nispa.

⁶⁵ Chantá k'amispa ashkha imastawanraj nerqanku.

Jesús juntaj ñaupaqempi

^66-67 P'unchay tantakorqanku kurajkuna, kuraj sacerdotes, leymanta yachachejkuna ima. Jesustataj juntaman pusamorqanku, nispa: Niwayku, qanrí Cristochu kanki? Paytaj kuticherqa: Arí, nisqaykichej chayqa, mana creewankichejchu.

⁶⁸ Tapojteyqa mana kutichiwankichejmanchu.

⁶⁹ Chaywampis, kunanmantapacha Runaj Churenqa tiyaykukonqa, jatun atiyniyoj Diospa pañanman.

⁷⁰ Chantá tukuyninku taporqanku: Qanqa Diospa Churinchu kanki? Paytaj kuticherqa: Qankuna nishankichej noqa kasqayta, nispa.

⁷¹ Chaymanta paykuna nerqanku: Imapajña astawan testigosta munanchej? Noqanchej kikinchej uyarinchej paypa siminmanta.