San Lucas 21 - Qheshwa Biblia DC

Wajcha viudaj ofrendan

¹ Templopitaj Jesusqa qhawarispa rikorqa qhapajkuna qolqeta churajta ofrenda churanasman.

² Rikullarqataj uj wajcha viudatapis, iskay phisusninta churaykojta.

³ Nerqataj: Cheqamanta niykichej kay wajcha viudaqa, tukuymanta astawan churan.

⁴ Tukuy chaykunaqa puchoj qolqellankumanta qonku Diospaj ofrendata; kay viudataj wajcha kayninwan, kausanampaj chay k'ata kapusqanta churaykun.

Temploj urmananmanta

^5-6 Wakinkuna parlarqanku, temploqa k'acha sumaj rumiswan k'achanchasqa kasqanta; ofrendas qosqamanta ima. Paykunamantaj Jesús nerqa: Chayamonqa uj p'unchay, maypachachus kay tukuy ima rikusqaykichej t'unasqa kanqa; manataj uj rumillapis waj rumi patapi qhepakonqachu.

Manaraj mundo tukukushajtin señales kanqa

⁷ Paykunataj taporqanku: Maestro, jayk'ajtaj kay tukuy imas kanqa? Ima señaltaj kanqa kay tukuy ima kanampajri?

⁸ Jesustaj nerqa: Allinta qhawakuychej, amataj ch'aukiyachikuychejchu, imaraykuchus ashkhas sutiypi jamonqanku, noqa Cristo kani, nispa. Kunanqa tiempoman qayllaña. Ama ari, qhepankuta riychejchu.

⁹ Guerrasmanta, oqharikuykunamantawan parlajta uyarispa, ama mancharikunkichejchu; kay tukuy imas ñaupajta kanampuni tiyan; chaywampis manaraj tukukuychu.

¹⁰ Chantá nillarqataj: Uj nación waj naciompa contranta oqharikonqa; uj reinopis waj reinoj contranta.

¹¹ Kallanqataj manchay jallp'a kuyuykuna, yarqhaykuna, imaymana onqoykuna ima tukuynejpi; cielomanta jatuchaj señales, mancharikuykuna ima kanqanku.

¹² Kay tukuy imaspa ñaupaqentataj, qankunata jap'isonqachej, qhatiykachasonqachejtaj. Chantá pusasonqachej sinagogasman; carcelmantaj wisq'asonqachej; chaymantataj reyesman, kamachejkunaman ima pusasqas kankichej noqaj sutiyrayku.

¹³ Kay tukuytaj allin kanqa noqamanta runasman willanaykichejpaj.

¹⁴ Ñaupajtaqa sonqoykichejpi ama yuyaychejchu, imatachus kutichikunaykichejmanta.

¹⁵ Noqa yachayta qosqaykichej parlanaykichejpaj; chay parlasqaykichejtataj enemigosniykichejqa, mana atipayta, nitaj kutichikuytapis atenqankuchu.

¹⁶ Chaywampis pusasonqachej tatasniykichejwan, wauqesniykichejwan, allusniykichejwan, kausaqesniykichejwan ima. Qankunamanta wakintataj wañuchenqanku.

¹⁷ Tukuypa chejninantaj kankichej noqaj sutiyrayku.

¹⁸ Umaykichejmantapis mana uj chujchallapis chinkanqachu.

¹⁹ Pacienciaykichejwan almasniykichejta salvankichej.

²⁰ Jerusalén llajtata soldadoswan muyurisqata rikuspa, loqhekuynin chayamusqanta yachankichej.

^21-22 Chaypacha Judeapi kajkuna orqosman ayqechunku; Jerusalempi kajkuna llajtamanta llojsichunku; chajraspi kajkunataj ama llajtaman kutirimuchunkuchu, imaraykuchus ñak'ariy p'unchaykuna, kanqa tukuy escribisqa junt'akunampaj.

²³ Ay, chaypacha wijsayoj warmispaj, ñuñoj wawayojkunapajpis, imaraykuchus jatun ñak'ariy kay mundopi kanqa; jinallataj Diospa phiñakuynimpis chay llajtapaj.

²⁴ Wakenqa guerrapi wañuranqanku; wakintataj presochasqasta apanqanku tukuy nacionesman. Gentilestaj Jerusalenta saruranqanku, paykunaj p'unchayninku junt'akunankama.

Runaj Churimpa kutimuynin

²⁵ Chaypacha intipi, killapi, qoyllorkunapi ima, señales kanqa. Jallp'a patapitaj kanqa runakuna ukhupi manchay llakiy, ñak'ariy ima; musphaykachanqankutaj mancharisqas, mar qhollchoqeyaspa yaku moqos oqharikusqanmanta.

²⁶ Runakuna uj jinayanqanku manchariywan, imachus kay mundopi kasqanmanta, imaraykuchus janaj pacha atiykuna chaypacha kharkatirenqanku.

²⁷ Chaypacha rikonqanku Runaj Churinta phuyupi, manchay atiywan, jatun k'anchayninwantaj uraykamushajta.

²⁸ Kay tukuy ima ruwakuyta qallarejtin, sayaykukuychej umaykichejta oqharispa. Qayllamushanña kacharisqa kanaykichej p'unchayqa.

²⁹ Nillarqataj kay rijch'anachinata: Qhawariychej higo sach'ata, chayrí mayqen sach'allatapis.

³⁰ Q'omeryajta rikuspa yachankichejña q'oñi tiempo qayllapiña kasqanta.

³¹ Jinallatataj qankunapis, kay tukuy imasta rikuspa, yachaychej Diospa reinon qayllapiña kasqanta.

³² Cheqamanta niykichej kay tukuy imas kananta, manaraj kunan tiempo runakuna wañushajtinku.

³³ Cielowan kay mundowanqa tukukonqanku; palabrasniyrí mana tukukonqankuchu.

³⁴ Qhawarikuychej, pajtataj sonqoykichej atipachikunman mikhunawan, machaykuywan, kay mundoj kusiyninwan ima. Jinallapitaj juicio p'unchay taripasunkichejman.

³⁵ Chay p'unchayqa uj tojlla jina jamonqa tukuy kay mundopi kausajkunaman.

³⁶ Qhawarikuychej ari, Diosmanta mañarikuspa tukuy tiempopi, kay tukuy ima jamojmanta ayqenaykichejpaj; allimpi rikhurinaykichejpajtaj Runaj Churimpa ñaupaqempi.

³⁷ Jesusqa templopi p'unchay yachachej, tutataj llojsispa Olivos sutiyoj orqopi kamoj.

³⁸ Tukuy runakunataj tutamantapacha jamorqanku, templopi payta uyarinankupaj.