San Lucas 2 - Qheshwa Biblia DC

Jesuspa nacisqanmanta

¹ Jaqay tiempopi, kamachej Augusto kamacherqa tukuy mundontimpi runasta yupanankuta.

² Kay ñaupaj runa yupay ruwakorqa Quirinio Siriapi kamachishajtin.

³ Tukuyninkutaj rinanku karqa sapa uj llajtankukama yupachikunankupaj.

⁴ Josepis, Davidpa ayllunmanta kasqanrayku, Galileapi Nazaret llajtamanta wicharerqa, Judeapi, Davidpa llajtan Belenkama.

⁵ Chayman rerqa María warminwan, yupachikunankupaj; Mariataj onqoj kasharqa.

⁶ Belempi kashajtinkutaj, Maríaj nacichikunan junt'akaporqa.

⁷ Nacichikorqataj kuraj qhari wawanta; janantaswan k'iruykuspataj, uywa qaranaman siriykucherqa, tambopi paykunapaj mana campo kasqanrayku.

Ángeles michejkunaman willanku

⁸ Chaynejpi michejkuna kasharqanku, ovejasninkuta tutantin qhawaspa.

⁹ Jinallapi Señorpa angelnin rikhurerqa, k'anchaynintaj paykunata muyuykorqa, anchatataj mancharikorqanku.

¹⁰ Angeltaj paykunaman nerqa: Ama manchachikuychejchu. Willasqaykichej tukuy runaspaj may kusiyniyoj willanasta.

¹¹ Kunan qankunapaj nacikun Davidpa llajtampi uj Salvador. Chayqa Cristo Señor.

¹² Qankunapaj señal kanqa: Wawata tarinkichej janantaspi k'irusqa, uywa qaranapi sirikushajta.

^13-14 Jinallaman rikhurimorqanku angelpa qayllanman, ashkha ángeles Diosta yupaychaspa, nispataj: Gloria kachun Diosman janaj pachapi, kay pachapitaj sonqo tiyaykuy Diospa munakuynimpi kajkunapaj!

¹⁵ Ángeles janaj pachaman ripusqankutawantaj, michejkunaqa ninakorqanku: Jaku rina Belenman, yachamuna imachus kasqanta, Señor willawasqanchejman jina.

¹⁶ Usqhay usqhayta rispataj, tariparqanku Mariata Josetawan, wawatataj uywa qaranapi sirisqata.

¹⁷ Jinata rikuspataj willarqanku angelpa nisqanta wawamanta.

¹⁸ Tukuynin uyarejkunataj t'ukorqanku michejkunaj willasqankumanta.

¹⁹ Kay tukuy imastataj Mariaqa unanchaspa sonqompi waqaycharqa.

²⁰ Michejkunataj kutiporqanku Diosta yupaychaspa alabaspataj, imastachus uyarisqankumanta rikusqankumanta ima, angelpa willasqanman jina.

Wawata temploman apanku

²¹ Pusaj p'unchayninmantaj wawata circuncidarqanku, suticharqankutaj Jesusta, manaraj María wijsayoj kashajtin, angelpa nisqanman jina.

²² Moisespa leyninman jina llimphuchakunanku tiempo junt'akojtintaj, aparqanku wawata Señorman dedicanankupaj.

²³ Chayta ruwarqanku Señorpa escribisqaman jina: Tukuynin kuraj qhari wawa nacej, Señorpaj t'aqasqa kanqa.

²⁴ Chayrayku aparqanku Señorpa leyninman jina wañuchinankupaj: Iskay palomasta chayrí iskay irpitasta.

²⁵ Chaypacha tiyakorqa Jerusalempi, uj runa Simeón sutiyoj. Payqa k'acha karqa, Diostataj manchachikoj. Allin runa kaspa suyasharqa Israel sonqochasqa kananta. Santo Espiritupis paypi kasharqa.

²⁶ Chay Santa Espiritutaj willarqa manaraj wañupushaspa Diospa kachamusqan Cristota rikunanta.

²⁷ Simeonqa Espíritoj munayninman jina temploman jamorqa. Chantá Jesuspa tatasnin wawata temploman apamorqanku leyman jina.

^28-29 Simeonqa wawata ichurikuspa, Diosta yupaycharqa, nispa: Kunanqa Señor, sonqo tiyasqata kamachiykita kachapuway, imaraykuchus palabrayki niwasqaykiman jina junt'akun.

^30-31 Ñawisniywan rikunitaj kachamusqayki Salvadorta, wakichisqaykita tukuy runaspa ñaupaqempi.

³² Pay k'anchanqa gentilesman, israel aylluyki jatunyasqa kanampaj.

³³ Jesuspa tatan mamanwan t'ukorqanku, Simeonqa wawamanta nisqanmanta.

³⁴ Chantá Simeón paykunata bendicerqa. Wawaj maman Mariamantaj nerqa: Kay wawataqa Dios churan Israelpi ashkhas urmanankupaj jatarinankupajtaj. Señal churasqa payta ashkhas qhesachanankupaj.

³⁵ Kaytaj qampa almaykita espada jina pasachenqa, jinapi ashkha sonqospa yuyaynin yachakunampaj.

³⁶ Chaypi kashallarqataj Diosmanta profetizaj Ana sutiyoj Fanuelpa wawan Aserpa ayllunmanta. Payqa payaña karqa. Sipas kashaspa casarakusqanmantataj qanchis watallata qosanwan tiyakorqa.

³⁷ Pusaj chunka tawayoj wata viudaña karqa. Templomantaqa mana llojsejchu, tuta p'unchay sirvispa, ayunaspa, Diosmantataj mañakuspa.

³⁸ Chay kikimpacha jamuspataj Diosta yupaycharqa; wawa Jesusmantataj willarqa Jerusalempa salvacionninta tukuy suyajkunaman.

Nazaretman kutipunku

³⁹ Tukuy imasta Señorpa leyninman jina junt'aspataj, kutiporqanku Galileapi Nazaret llajtankuman.

⁴⁰ Wawataj wiñasharqa, kallpachakusharqataj, yachaywan junt'asqa. Diospa khuyakuynintaj paywan karqa.

Wawa Jesús templopi

⁴¹ Jesuspa tatasnintaj Pascuapaj sapa wata Jerusalenman rej kanku.

⁴² Chunka iskayniyoj watayoj kashajtintaj, kinsantinku Jerusalenman rerqanku, Pascuaman rina yachasqa kasqanman jina.

⁴³ Pascua pasayta kutipushajtinkutaj, wawa Jesusqa Jerusalempi qhepakusqa, tatasnimpa mana yachasqallan.

⁴⁴ Wajkunawan rishasqanta yuyaspa paykunaqa, uj día puriypiña watukorqanku ayllusninku ukhupi, rejsisqas ukhupi ima.

⁴⁵ Mana tarispataj, Jerusalenkama mask'aspa kutirerqanku.

⁴⁶ Kinsa diamanta tarerqanku templopi doctoreswan tiyashajta, parlasqankuta uyarispataj tapushajta.

⁴⁷ Uyarejkunataj chhikata t'ukusharqanku yachayninmanta, kutichisqasninmanta ima.

⁴⁸ Ajinata rikuspa tatasnimpis t'ukullarqankutaj, mamantaj payman nerqa: Wawáy, imaraykutaj kay jinata ruwawaykuri? Noqawan tataykiwanqa, may phutisqas mask'asuyku.

⁴⁹ Chantá Jesús nerqa: Imaraykutaj mask'awankichejri? Manachu yachankichej Tataypa ruwanasnimpi kanayta?

⁵⁰ Paykunataj mana entienderqankuchu chay nisqanta.

⁵¹ Chantá kutiporqa tatasninwan Nazaretman; chaypitaj paykunata kasuspa karqa. Kay tukuy imastataj mamanqa sonqompi waqaycharqa.

⁵² Jesustaj wiñasharqa yachaypi, cuerpompipis; Diospaj allin qhawasqa, chantá tukuy runaspajpis.