San Lucas 14 - Qheshwa Biblia DC

Punkisqa runata Jesús thañichin

¹ Samakuna p'unchaypi Jesús mikhoj yaykorqa uj kamachej fariseojman, wakin fariseostaj wateqasharqanku.

² Chaypitaj uj runa kasharqa Jesuspa ñaupaqempi, yaku punkiywan.

³ Chantá Jesús parlarqa leymanta yachachejkunaman, fariseosman ima, nispa: Atikunmanchu thañichina samakuna p'unchaypi?

⁴ Paykunataj ch'inlla karqanku. Onqosqatataj thañicherqa makinmanta jap'irispa; chaymantataj kachaporqa.

⁵ Paykunamantaj nerqa: Mayqenniykichejtaj qankunamanta, wawan, chayrí wakan pujyuman urmaykojtin, manachu kikimpacha orqhonman, samakuna p'unchay kajtimpis?

⁶ Manataj kutichiyta aterqankuchu chay nisqanman.

Casamientoman wajyasqas

⁷ Jesustaj qhawasharqa imaynatachus wajyasqas ñaupajpi kaj tiyanasta ajllarakusqankuta; paykunamantaj yachacherqa kay rijch'anachinata:

⁸ Casamientoman wajyasqa kaspaqa, ama ñaupajpi tiyaykuychu, pajtataj wajpis qanmanta aswan kuraj wajyasqallataj kanman.

⁹ Chantá iskayniykichejta wajyajtaj nisunkichejman: Chay tiyanata payman qoy. Qantaj p'enqayta qhepanejman tiyaj riwaj.

¹⁰ Chayrayku wajyasqa kaspaqa, qhepanejpi tiyakuy; wajyasojniyki jamuspa nisunampaj: Kausaqéy, aswan ñaupajpi tiyakamuy. Ajinapeqa allimpi rikhurinki, tukuy qanwan khuska wajyasqaspa ñaupaqempi.

¹¹ Pillapis jatunchakojqa p'enqachisqa kanqa, k'umuykojtaj jatunchasqa kanqa.

¹² Wajyajmampis Jesús nillarqataj: Jayk'ajllapis almuerzota chayrí cenata wakichispaqa, ama wajyakunkichu kausaqesniykita, nitaj wauqesniykita, nitaj ayllusniykita, nitaj qhapaj llajta masisniykitapis; pajtataj paykuna kikillantataj kutichisunkuman.

¹³ Jatun mikhuyta wakichispaqa, wajyakuy wajchasta, ñuk'usta, cojosta, ciegosta ima.

¹⁴ Chaywanqa aswan kusikuyniyoj kanki; imaraykuchus paykunaqa mana kutichipusuyta atenqankuchu; cheqan runaspa kausarimuynillampiña t'inkaykita jap'ikapunki.

Jatun mikhunamanta rijch'anachina

¹⁵ Kayta uyarispa mesaman tiyaykojkunamanta ujnin kaj nerqa Jesusman: Kusikuyniyoj kanqa Diospa reinompi mikhojqa.

¹⁶ Chaymantataj Jesús kuticherqa: Uj wiraqochi wakicherqa manchay jatun mikhuyta, ashkha runastataj wajyarqa.

¹⁷ Mikhunankuña kashajtintaj, ujnin kamachinta kacharqa wajyasqasninman willamojta: Jamullaychejña usqhayta, imaraykuchus tukuy ima sumaj wakisqaña, nispa.

¹⁸ Tukuyninku, ujmanta uj, mana riyta munaspa nerqanku payman: Ñaupaj kajqa qallarerqa nispa: Noqaqa kunallan jallp'ata rantikuni, rinay tiyan watukoj; ama jinachu kay, saqerillaway rejta.

¹⁹ Qhepan kajtaj nerqa: Phishqa yunta rantisqayta llank'arichimunayraj tiyan; manaraj riyta aterqoymanchu.

²⁰ Chay ujnintaj nillarqataj: Kunallanraj casarakuni, chaynejta mana atinichu noqaqa, nispa.

²¹ Kamachitaj kutimuspa willarqa kay tukuyta patronninman. Phiñakuspataj payqa nerqa kamachinman: Riy usqhayta kay llajtaj plazasninta, callesninta ima; pusaramuytaj tukuy wajchasta, ñuk'usta, ciegosta, cojosta ima.

²² Kamachitaj kutimuytawan nerqa: Señor, nisqaykiman jina ruwani; chaywampis mesapi tiyanas kanraj.

²³ Chantataj patrón nerqa: Jina kajtenqa, riy tukuy chaki ñankunasman, jatun ñankunaman ima, usqhay usqhaytataj pusaramuy wajkunata, wasiy junt'a kanampaj.

²⁴ Noqaqa niykichej, wajyasqasmantaqa mana pipis llamenqachu mikhunaymanta.

Cristowan purinaqa ñak'arinamin

^25-26 Ashkha runas qhatisharqanku Jesusta, paykunaman kutirispataj nerqa: Mana pipis yachachisqay kayta atinmanchu manachus ñaupajta pay tatanta, mamanta, warminta, wawasninta, wauqesninta, panasninta, kausaynintapis chejnenqa chayqa.

²⁷ Mana cruzninta oqharispa qhepayta jamonqa chayqa, mana yachachisqay kayta atinchu.

²⁸ Mayqennillaykichejpis uj torreta ruwayta munanman chayqa, manachu payqa tiyaykukuspa ñaupajta qhawarinman, qolqen kapunchus manachus chayta, torreta tukuychanankama?

^29-30 Manachayqa asipayachikunman tukuy runa rikojkunawan, cimientota churaspaña mana tukuychayta atinman chayqa; nispa: Kay runaqa, torreta qallariyta yachasqa, tukuychaytarí manataj atinchu.

³¹ Jinallatataj, pi reypis guerraman waj reywan yaykunampajqa, manachu qhawarikunraj, atenqachus manachus tinkuyta chunka waranqallawan kaspa; chay ujnintaj iskay chunka waranqawan jamushajtin?

³² Mana tinkuyta atispataj, karullapiraj chay ujnin kashajtin, kachaswan parlapayachin, allinyakapunampaj.

³³ Jinata ari, pillapis qankunamanta, tukuy tiyapusqanta mana saqejqa, mana yachachisqay kayta atinmanchu.

Kachi q'aymayajtin

³⁴ Kacheqa sumaj; q'aymayanmantajchus chayqa, imawantaj kachinchakonqa?

³⁵ Mana allinñachu jallp'apajqa, nitaj wanupajpis, manachayqa wijch'unallapajña. Uyariychej kayta, ningrisniyoj kaspaqa.