San Lucas 13 - Qheshwa Biblia DC

Diosman kutirikuychej

¹ Chaypachallataj wakin runas Jesusman qayllaykorqanku, willarqankutaj payman Galilea llajtayoj runasmanta, imaynatachus paykunaj yawarninta Pilato chajrusqanta sacrificio yawarwan.

² Kutichispataj Jesús nerqa: Yuyankichejchu chay galileos ajinata ñak'arisqankurayku, chay tukuynin galileosmanta astawan juchasapas kasqankuta?

³ Niykichej mana jinachu kasqanta; manachus qankuna Diosman kutirinkichej chayqa, qankunapis tukukullankichejtaj.

⁴ Chayrí, jaqay chunka pusajniyoj runas, pikunatachus Siloepi torre urmaykuspa wañuracherqa, yuyankichejchu paykuna aswan juchasapas kasqankuta Jerusalempi tiyakojkunamanta?

⁵ Nillaykichejtaj mana jinachu kasqanta; manachus Diosman kutirinkichej chayqa, ajinallatataj qankunapis tukukunkichej.

Mana poqoj higo sach'a

⁶ Nillarqataj uj rijch'anachinata: Uj runajta uj higo sach'an karqa uvas huertampi; poqoyninta pallaj rispataj, mana poqoyniyojta tariparqa.

⁷ Chantá huerta qhawajninman nerqa: Kinsa watataña jamuni kay sach'api higosta mask'aj, manataj poqoyta tarinichu; urmarparichiy ari; imapajtaj qhasi mana qajta jallp'ata usuchenqa?

⁸ Qhawajnintaj nerqa: Patrón, manachu kay watatawan kallanmanraj? Muyuyninta allayman, wanutataj churayman.

⁹ Poqonqa chayqa allin kanqa; manapuni poqojtinrí, k'utuchipunki, nispa.

Samakuna p'unchaypi uj warmita thañichin

¹⁰ Uj sinagogapi Jesús yachachisharqa samakuna p'unchaypi.

¹¹ Chaypitaj uj warmi kasharqa. Payqa k'umullamantaña purej. Nitaj imaynamanta cheqanyakuyta atejchu, chunka pusajniyoj watataña sajra espíritu onqochisqanrayku.

¹² Rikuytawantaj Jesusqa wajyaspa nerqa: Warmi, onqoyniykimanta kacharisqaña kanki.

¹³ Makisninta patanman churaykorqa; kikimpachataj warmeqa cheqanyakuspa Diosta yupaycharqa.

¹⁴ Sinagogapi kuraj runataj phiñakorqa, Jesús samakuna p'unchaypi chay warmita thañichisqanmanta; runakunamantaj nerqa: Sojta p'unchay tiyan imallatapis ruwanapaj; chaykunapi jamuychej jampichikoj, ama samakuna p'unchaypeqa.

¹⁵ Señortaj payman kuticherqa: Puraj uyas! Manachu sapa ujniykichej samakuna p'unchaypi, uywa kanchamanta wakaykichejta, chayrí burroykichejtapis phaskaraspa yakuta ujyachimunkichej?

¹⁶ Abrahampa kay warmi wawantaqa, manachu samakuna p'unchaypi phaskarana karqa, chunka pusajniyoj watataña onqoywan supay watasqanmanta?

¹⁷ Chay imasta Jesús nisqanraykutaj, tukuy payta chejnejkuna p'enqaypi rikhurerqanku; chaywampis, runasqa kusikorqanku tukuy jatuchaj imasta Jesús ruwasqanrayku.

Mostaza mujumanta

¹⁸ Jesustaj nerqa: Imamantaj rijch'akun Diospa reinonri, imamantaj rijch'achiymanri?

¹⁹ Rijch'akun ari uj mostaza mujuman, mayqentachus uj runa jallp'ampi tarporqa chayman, wiñarqataj sach'ayanankama; p'isqospis thansasnimpi thapachakorqanku.

Levaduramanta

²⁰ Ujtawan Jesús nillarqataj: Imamantaj rijch'achisaj Diospa reinontari?

²¹ Rijch'akun ari levaduraman, mayqentachus uj warmi, kinsa tupu jak'uman chajruykun, tukuynin masataj poqon, chayman.

K'ullku punku

²² Jesús llajtanejta, ranchosnejta ima yachachispa Jerusalenman risharqa.

²³ Uj runataj nerqa: Señor, pisischu kanku salvakojkunaqa?, nispa. Paytaj kuticherqa:

²⁴ K'ullku punkunejta yaykunaykichejpaj kallpakuychej; imaraykuchus ashkhas munanqanku yaykuyta, manataj atenqankuchu.

²⁵ Wasiyoj jatarikuspa punkuta wisq'ajtinña, qankunaqa jawapi rikhurispa punkuta takankichej: Señor, kichaririwayku!, nispa. Kutichispataj nisonqachej: Mana rejsiykichejchu maymantachus kasqaykichejta.

²⁶ Chaypacharaj qankunaqa qallarinkichej niyta: Qanwan khuska mikhorqayku, ujyarqaykutaj; plazasniykupipis yachacherqanki.

²⁷ Chantá nillasonqachejtaj: Mana yachanichu maymantachus kasqaykichejta. Riychej kaymanta tukuy sajrata ruwajkuna.

²⁸ Chaypimá waqayqa, kiru k'arukuypis kanqa. Chaypacha rikunkichej Abrahamta, Isaacta, Jacobta, tukuy profetastawan Diospa reinompi; qankunataj t'aqasqas qhepakunkichej.

²⁹ Runas jamonqanku inti llojsimuynejmanta, inti yaykuynejmanta, patanejmanta, uranejmanta ima. Mikhojtaj tiyaykonqanku Diospa reinompi.

³⁰ Qhawaychej, qhepapi kajkuna ñaupajpi rikhurenqanku; ñaupajpi kajkunataj qhepapi.

Jesús waqan Jerusalenmanta

³¹ Chay p'unchayllapitaj fariseos chayamorqanku, Jesusman nej: Llojsiy, ripuy kaymanta, Herodes wañuchiyta munashasunki, nispa.

³² Jesustaj kuticherqa: Rispa willamuychej jaqay atojman. Noqaqa supaykunata qharqoni, onqosqastataj thañichini kunan, q'ayapis; minchhataj tukusaj ruwanayta.

³³ Chaywampis purinayraj tiyan kunan, q'aya, minchhatawan. Profetaqa mana wañuyta atinmanchu Jerusalenmanta jawapeqa.

³⁴ Jerusalén, Jerusalén, profetasta wañuchej llajta; qanman kachamusqastapis rumiswan ch'anqarqanki! Mashkha kutita, wawasniykita tantayta munarqani, imaynatachus wallpa chillwisninta lijrasnin uraman tantaykun ajinata, qantaj mana munarqankichu!

³⁵ Qhawariychej, wasiykichejqa ch'impacha qhepakonqa; kunantaj niykichej: Manaña ujtawan rikuwankichejchu: Kausachun Señorpa sutimpi jamojqa, ninaykichejkama.