Levítico 9 - Qheshwa Biblia DC

Aaronqa qallarin sacerdote kayninta

¹ Pusaj kaj p'unchaypi Moisesqa Aaronta, wawasnintawan wajyarqa, israelitaspa kurajkunasnintawan.

² Aaronmantaj nerqa: Juchasrayku ñak'asqa kanampaj apamuy uj waka uñata, uj sumajnin kaj mana imanasqa corderotawan ruphachisqa kanampaj. Chaykunata Señorpa ñaupaqenman apay.

³ Israelitasman niy uj chivota apamunankuta juchasrayku ñak'asqa kanampaj. Jinallatataj uj watayoj waka uñata, uj watayoj corderota mana iman imanasqasta ruphachisqas kanankupaj.

⁴ Jinallataj apamuchunku uj torota, uj corderotawan Señorpa ñaupaqempi ñak'anankupaj uj allinyakuy rikuchikuta jina. Apamullachunkutaj aceitewan chayasqa ch'aki mikhuy rikuchikuta, imaraykuchus Señorqa kunan paykunaman rikhurenqa.

⁵ Israelitasqa chay tukuyta Moisespa kamachisqanta apamorqanku Dioswan tinkukuna toldo punkuman. Chaymantataj tukuynin israelitas qayllaspa sayarqanku Señorpa ñaupaqempi.

⁶ Chaymantataj Moisesqa nerqa: Ajinata kamachin Señorqa, qankunataj chayta ruwaychej, Señortaj rikhurisonqachej jatun lliphipiywan.

⁷ Chaymanta Moisesqa Aaronman nerqa: Altarman qayllamuy, Señormantaj juchasrayku rikuchikuta jayway, chay uj uywatawan, juchasniykej cuentamanta, israelitaspa juchasninkoj cuentanmantawan jaywanayki tiyan chayta, ruphachisqa kanampaj. Jaywallaytaj israelitaspa rikuchikunkuta juchasninku pampachasqa kanampaj, Señorpa kamachisqanman jina.

⁸ Aaronqa altarman qayllaykorqa, ñak'arqataj juchasninkumanta chay waka uywa apamusqanta.

⁹ Chay kikimpacha Aarompa wawasnin payman yawarta apamorqanku, Aarontaj dedosninta yawarman chhapurispa jawirarqa altarpa cantosnimpi wajras jina ruwasqa karqa chaykunata, puchoj yawartataj altarpa urasninman jich'arqa.

¹⁰ Chaymantataj altar patapi ruphacherqa juchasrayku apamusqa uywaj wirasninta, lurunisninta, kukupi wirasnintawan, imaynatachus Señorqa Moisesman kamachisqanman jina.

¹¹ Uywaj aychanta, qarantawantaj jaramanta jawaman orqhospa ruphachimorqa.

¹² Chaymanta Aaronqa ruphachisqa kanampaj apamusqanku uywata ñak'arqa. Wawasnintaj yawarta payman aparqanku; Aarontaj chay yawarwan altarpa patanta, muyuynintawan ch'ajchorqa.

¹³ Chaymanta aparqanku chay uywaj umanta, khuchurasqa aychasnintawan, Aarontaj chaykunata altar patapi ruphaykucherqa.

¹⁴ Chaymantataj yakuwan mayllarqa uywaj ch'unchulasninta, pierna aychasnintawan; tukuynintataj altar patapi ruphacherqa.

¹⁵ Aaronqa Señorman jaywamullarqataj israelitaspa rikuchikusninta. Juchankumanta apamusqanku rikuchiku chivota Aaronqa jap'erqa, ñak'aspataj Señorman jaywarqa juchasmanta, imaynatachus ñaupaj rikuchikuta jaywarqa ajinata.

¹⁶ Chay ruphachisqa kanampaj uywata jaywaspaqa Aarón ruwarqa, imaynatachus ruwana kaj chayman jina.

¹⁷ Chay ch'aki mikhuy rikuchikumantañataj jaywarqa, uj maki junt'ata jap'ispa. Chaytataj altar patapi ruphacherqa. Chay rikuchikoqa wajtaj karqa tutamanta ruphachisqa uywamantaqa.

¹⁸ Chanta Aaronqa ñak'allarqataj israelitaspa allinyakuy apamusqanku torota, corderotawan. Wawasnintaj payman yawarta jaywarqanku, paytaj chay yawarwan ch'ajchumorqa, altarta tukuy muyuynintawan.

¹⁹ Chanta jaywallarqankutaj toroj wirasninta, corderoj wirasninta, chupanta, ch'unchulaj wirasninta, lurunisninta, kukupi wiranta ima.

²⁰ Chay wirastataj pecho aychaj patanman churaykorqa. Chaymanta Aaronqa chay wirasninta altar patapi ruphaykucherqa.

²¹ Chaymantataj Aaronqa pecho aychasta, iskaynin paña pierna aychastawan oqharikuspa Señorman rikucherqa Moisespa kamachisqanman jina.

²² Aaronqa makisninta oqharispa israelitasta bendicerqa. Chaymantataj juchasrayku rikuchikusta ruphachisqanmanta, allinyakuy rikuchikutawan jaywaytawan, altarmanta uraykamporqa.

²³ Chaymantataj Moisesqa Aaronwan Dioswan tinkukuna toldoman yaykorqanku, llojsimuspataj israelitasta bendicerqanku. Chaymanta Señorqa jatun lliphipej k'anchaywan tukuyninkuman rikhurerqa.

²⁴ Señorpa ñaupaqenmantataj nina lauray llojserqa, chaytaj rupharqa altar patapi kasharqa chay jaywasqa uywasta, wirastawan. Chayta rikuspataj tukuynin israelitas kusiywan qhaparerqanku, k'umuykorqankutaj pampaman umasninkuta chayachinankukama.