Levítico 7 - Qheshwa Biblia DC

Juchasrayku rikuchikusta qonamanta

^1-4 Juchasrayku jaywasqa rikuchikoqa t'aqasqamin. Kaykuna kanku leyes chay imasta ruwanamanta: Juchasrayku apamusqa rikuchiku uywastaqa ñak'anqanku maypichus uywasta ñak'anku ruphachinankupaj chaypi, uywaj yawarninwantaj ch'ajchonqanku chay altar patata tukuy muyuynintinta ima. Chaymantaqa tukuy uywaj wirasninta wirachanqa: Chupa wiranta, ch'unchula wiranta ima, iskay lurunisninta, wirasnintinta, ura wasa wirasninta, kukupi wirata ima, lurunisnintawan khuska khuchuchunku.

⁵ Chaymantataj sacerdoteqa chay wirasninta altar patapi ruphachenqa, Señorpaj mikhuna rikuchikuta jina. Chay rikuchikoqa juchaspa cuentanmanta jaywasqa.

⁶ Chay jina jaywasqa uywasmantaqa tukuy sacerdotes mikhuyta atenqanku. Chaytaqa mikhuyta atenqanku t'aqasqa cheqapi, imaraykuchus chayqa t'aqasqamin.

⁷ Juchaspa cuentanmanta rikuchikusqa, juchasmanta rikuchikus jina. Chay ruwanamanta leyesqa, iskayninkupaj uj rejlla. Chay aychasqa kanqa juchasmanta jaywaj sacerdotepaj.

⁸ Jinallataj sacerdote rikuchiku uywata ruphachenqa chay uywaj qaranta jap'ikaponqa.

⁹ Chaymantaqa kikillantaj jaywajpaj sacerdote kanqa ch'aki mikhuykunamanta rikuchikus: Hornopi chayasqas, chaymantataj fierro mankapi, chayri paylapi chayasqaspis.

¹⁰ Chaymantataj aaronita sacerdotesqa jap'ikonqanku tukuyninku uj rejta, chay chawa ch'aki mikhuykuna apamusqa rikuchikusmanta, aceiteyoj kajmanta, mana aceiteyoj kajmantapis.

Allinyakuy rikuchiku

¹¹ Señorman allinyakuy rikuchikoqa kay jinata jaywasqa kanqa:

¹² Sichus uj agradecekuy rikuchikuta Señorman jaywayta munanku chayqa, apamuchunku mana levadurayoj t'antata, aceitewan ruwasqata, mana levadurayoj torillatawan aceitewan jawisqata, sumajnin kaj ñut'u jak'umanta aceitewan ruwasqa t'antatawan.

¹³ Jinallataj allinyakunampaj agradecekuy uywatawan khuska apamullanqataj levadurayoj t'antasta jaywanampaj.

¹⁴ Chay tukuynin rikuchikumanta wakin Señorman t'aqasqa kanqa. Chaymantataj sacerdotepaj kanqa, allinyakuy rikuchiku uywaj yawarninta altarpi ch'ajchumojpaj.

¹⁵ Allinyakunapaj agradecekuy uywaj aychantaqa chay p'unchaypacha mikhonqanku. Q'ayantinpajqa mana imapis puchonqachu.

¹⁶ Sichus pipis mana pejpa nisqalla uj uywata apamun, chantapis noqa qosaj nisqanraykupis chayqa, chay kikin p'unchaypacha mikhusqa kanqa. Chaymanta puchojtataj q'ayantin mikhuyta atenqanku.

¹⁷ Sichus kinsa p'unchaykama chay puchoj aycha kanqaraj chayqa, ninaman ruphaykuchichunku tukuyninta.

¹⁸ Sichus kinsa p'unchaymanta pipis chay puchoj aychata, allinyakuy rikuchikumanta puchojta mikhonqa chayqa, chay Señorman jaywasqaqa mana valenqachu, nitaj apamojpa cuentanman churasqachu kanqa. Chay aychaqa qhesachasqaña. Pichus chay aychata mikhojqa, chay juchamanta juchachasqa kanqa.

¹⁹ Ima ch'ichimampis chay aycha chayanman chayqa, amaña pipis mikhonqachu, manachayqa ruphachinallapajña kanan tiyan. Aychataqa llimphu nisqa kajkunalla mikhonqanku.

²⁰ Pillapis ch'ichi kashaspa, chay allinyakuy rikuchikuta Señorman jaywasqamanta mikhojqa, ayllun ukhumanta chinkachisqa kanqa.

²¹ Pillapis runaj ch'ichisninta, chayri uywaj ch'ichisninta llankhaspa, chayri ima mana allimpaj qhawasqata llujchispa, allinyakuy rikuchiku jaywasqa aychata mikhunman Señorpata karqa chayta chayqa, chay runa ayllun ukhumanta chinkachisqa kanqa.

Imaynatachus wirata yawartawan ruwanamanta

²² Señorqa Moisesman kay jinata parlarqa:

²³ Ajinata niy israelitasman: Ama mikhunkichejchu waka wirata, oveja wirata, nitaj cabra wirata, nispa.

²⁴ Chaymantapis wañusqa uywaspa wirasninta, chayri ima monte k'ita animalespa jap'isqasnin uywaspa wirasninwanqa, imatapis ruwayta atinkichej. Mikhuytarí mana atinkichejchu.

²⁵ Sichus pipis Señorman jaywasqa rikuchiku uywaspa wiranta mikhonqa ruphachisqa kanan kajmanta chayqa, ayllun ukhumanta chinkachisqa kanqa.

²⁶ Maypichá qankuna tarikunkichej chaypi, amapuni mikhunkichejchu ni ima p'isqoj yawarninta, nitaj uywajtapis.

²⁷ Pichus ima laya uywaj yawarninta mikhojqa, ayllun ukhumanta chinkachisqa kanqa.

Sacerdotespaj imaschus kananmanta

^28-29 Señorqa Moisesman kay jinata parlarqa: Niy israelitasman pichus allinyakuy rikuchikuta ruphasqa kanampaj apamojqa, Señorpa ñaupaqenman apananta.

³⁰ Chaytataj kikin makisninwan apanqa Señorman ruphachisqa kanampaj, pecho wirasninta, pechontinta Señorpa ñaupaqempi chayta rikuchinampaj.

³¹ Chay wirastataj sacerdoteqa altar patapi ruphachenqa. Chay uywaj pechontaj sacerdote Aarompaj, miraynimpajwan kanqa.

³² Chay allinyakuy uywa jaywasqa paña aychaqa piernan sacerdotemampuni qosqa kanqa.

³³ Chay paña piernaqa kanqa mayqen sacerdotechá Señorman jaywanqa allinyakuy ofrenda qosqa uywaj wiranta, yawarnintawan, chaypaj.

³⁴ Allinyakuy rikuchiku ofrendasta israelitas qowasqankumantaqa, noqa t'aqani uj sumajnin kaj ofrendata pecho aychanta, pierna aychantawan, sacerdote Aaronman, mirayninmanwan qonaypaj. Chaykunaqa paykunapajpuni wiñaypaj kanan tiyan.

³⁵ Señorman ofrendasta ruphachisqa kanampaj qosqasninkumanta, chayta qonankupuni tiyan Aaronman, mirayninmanwan, Señorqa sacerdotesnimpaj rejserqa chay p'unchaymantapacha.

³⁶ Chayta Señorqa Israelitasta kamacherqa, sacerdotespaj t'aqasqas kasqankumantapacha chay imasta qonankupaj. Kayqa kamachisqa karqa junt'anankupaj tukuy miraykuna wiñaypaj.

³⁷ Chay jinamanta jaywananku tiyan rikuchikusta, ruphachisqa kajkunata, ch'aki mikhuykunata, jucharayku rikuchikusta, juchayoj rikhurispa, jaywasqanku rikuchikusta, llimphuchakuy rikuchikusta, allinyakuy rikuchikusta ima.

³⁸ Chaykunataqa Señorpuni Sinaí orqopi qorqa, maypachachus Sinaí ch'in pampapi Señor kamacherqa israelitasman rikuchikusta qonankuta.