Levítico 6 - Qheshwa Biblia DC

Ch'aukiyasqamanta rikuchiku

^1-3 Señorqa Moisesman kay jinata nerqa: Uj runa juchayoj kanqa maypachachus Señorpa contranta sajra kajta ruwan runa masinta ch'aukiyaspa, kay jinata: Payman saqekusqan qolqeta jap'ikapojtin, chayri prendata, chanta suwajtin, chayri kallpawan imallatapis runa masinmanta qhechojtin; chayri imallatapis tarikuspa pakaykojtin, qhasimanta juraspa chay imaspichus runas juchallikuyta yachanku chaykunapi.

⁴ Chay runaqa runa masinman kutichipunan tiyan: Atiyniyoj kaspa qhechusqanta, prendata jap'ikapusqanta, chayri tarikuspa pakaykusqanta ima.

⁵ Jinallatataj imallatapis qhasimanta juraspa jap'ikapusqanta ima. Tukuyninta kutichipunan tiyan pejpatachus karqa chayman. Yapaykonqataj valorninmanta sapa phishqamanta ujta rikuchikuta juchanmanta apamojtin.

⁶ Chayrayku apamunan tiyan ovejasninmanta uj sumajnin kajta mana imanasqa corderota. Chaypa valornintataj qan churanki. Chaytataj sacerdoteman apanqa juchampa cuentamanta rikuchikuta jina, juchanrayku ruphachisqa kanampaj.

⁷ Jinamanta sacerdoteqa Señormanta perdonta tarenqa chay runapaj mayqen juchallanmantapis. Juchasnintaj pampachasqa kanqa.

Imaynatachus rikuchikusta ruphachinamanta

^8-9 Señorqa Moisesman parlallarqataj kay jinata nispa: Kayta kamachiy Aaronman, mirayninmanwan kay jinata rikuchikusta ruphachinankupaj: Rikuchikoqa tutantin kanan tiyan altar pata brasaspi. Ninaqa laurallanqapuni.

¹⁰ Sacerdoteqa p'achasta, calzoncillostawan linomanta ruwasqa churakunan tiyan. Chay ruphachisqa uywaj ushphasninta oqharispa altarpa ladonman churanqa.

¹¹ Chaymantataj sacerdoteqa p'achasninta lluch'ukuspa waj p'achasta churaykukuytawan, chay ushphata jaramanta jawaman uj llimphu cheqaman apanqa.

¹² Chay altar patapi k'ajaj ninaqa manapuni wañonqachu. Chayman sacerdoteqa sapa paqarin llant'ata yapanan tiyan. Chay patamantaj ima uywatachus ruphachinanta ruphanampaj churanqa. Jinallataj chay pataman churanqa allinyakuy rikuchikusmanta orqhosqa wirasta.

¹³ Chay altar patapi ninaqa laurallanqapuni, ni jayk'ajpis wañonqachu.

Ch'aki mikhuy rikuchikusta qonamanta

¹⁴ Kay jina kanqa ch'aki mikhuy rikuchikusmantaqa: Aarompa miraynin sacerdotes kay rikuchikustaqa altar qayllapi: jaywanqanku Señorpa ñaupaqempi.

¹⁵ Ujnin kaj sacerdotetaj aceiteyoj k'ispiña jak'uta, inciensota ima altarpi ruphachenqa yuyarikunapaj rikuchikuta jina. Chay rikuchikoj q'apaynenqa Señorpaj allin kanqa.

¹⁶ Chay rikuchikusmanta puchojtataj Aaronwan wawasninwan mikhonqanku mana levadurayojta uj sumaj t'aqasqa cheqapi, Dioswan tinkukuna toldoj ñaupaqempi kaj patiopi.

¹⁷ Chaytaqa amapuni levadurayojta chayachenqankuchu. Chayta paykunaman chayaqenkuta qoni ruphachisqa rikuchikumanta. Chayqa sumaj llimphuchasqa, juchasmanta rikuchikus jina, juchaj cuentanmanta rikuchis jinataj.

¹⁸ Qhepamanqa wiñaypaj tukuy qharis Aarompa mirayninmanta kajkuna kay mikhunasmanta chayaqenkuta mikhuyta atenqankupuni; Señorpaj ruphachisqa rikuchikusmanta, imaraykuchus kayqa kanqa uj ley jina. Pillapis, chaypi imallapis kay rikuchikusman chayajqa llimphuchasqa kanqa.

Sacerdotespa rikuchikusnin

^19-20 Señorqa Moisesman parlarqa, kay jinata: Aaronqa, miraynimpis aceitewan jawisqas kajtinku sacerdotes kanankupaj kay rikuchikuta jaywanqanku: Ch'aki mikhuymanta iskay kilo sumajnin kaj jak'uta qonqanku, tutamanta khuskanta, ch'isiyaykuytataj chay khuskanta. Chaytaj ruwakonqa sapa p'unchay.

²¹ Chay ofrendataqa aceitewan sumajta chajruspa, paylapi chayachichunku, chaymantataj p'akiraspa chay ruphachispa jaywasqampa q'apaynenqa Señorpaj allin kanqa.

²² Chay kikin rikuchikuta jaywallanqataj. Aarompa mirayninmanta jawisqaqa kuraj kaj sacerdote kanampaj. Chay rikuchikoqa Señorpatapuni kanan tiyan, tukuynintaj ruphachisqa kanqa.

²³ Sacerdotespa rikuchiku qosqankoqa tukuynimpuni ruphachisqa kanqa, nitaj pipis chaymanta mikhonqachu.

Juchasmanta rikuchikus

^24-25 Señorqa Moisesman kay jinata parlarqa: Aaronman, mirayninmanwan yachachiy juchasrayku rikuchikusta kay jinata ruwanankuta: Maynejpichá ñak'ayta yachanku ruphachisqa kanampaj rikuchikusta, chayllapitaj ñak'achunku jucharayku jaywasqa rikuchikusta. Señorpa ñaupaqempi chayqa sumaj t'aqasqapuni.

²⁶ Chay juchasrayku apamusqa rikuchikusmantaqa sacerdoteqa llimphu kaj nisqa cheqapi mikhuyta atin Dioswan tinkukuna toldoj ñaupaqempi kaj patiopi.

²⁷ Pillapis, chayri imallapis kay uywaj aychanman chayajqa llimphuchasqa kanqa. Sichus uywaj yawarnin p'achaman ch'allpaykonqa chaypis, sumaj t'aqasqa cheqapi mayllasqa kanqa.

²⁸ Ima t'uru mankapichus chay rikuchiku aycha chayasqa karqa chay mankaqa p'akisqa kanqa. Sichus uj bronce mankapi chayasqa karqa chayqa, chay mankata mikhuyninta mikhuspa mayllallanqanku.

²⁹ Sacerdoteslla chay rikuchiku jaywasqa aychataqa mikhuyta atenqanku, imaraykuchus chayqa t'aqasqa nisqa.

³⁰ Mana mikhuyta atenqankuchu ni mayqen uywata juchaj cuentanmanta rikuchiku jina jaywasqa kajtin. Mayqen yawarchus apasqa kanqa Dioswan tinkukuna toldo ukhuman juchas pampachasqa kanampaj. Kay rikuchikusqa ninapi ruphachisqas kananku tiyan.