Levítico 5 - Qheshwa Biblia DC

Juchapaj waj rikuchiku

¹ Sichus mayqen wajyasqa kashan imatachus rikusqanta, chayri uyarisqanta sut'inchanampaj, manataj munanmanchu sut'inchayta chayqa, pay juchayoj rikhurenqa. Chay juchanmantataj cuentata qonqa.

² Sichus pillapis llankhanman ima ch'ichitapis: mayqen wañusqa monte animalpa ch'ichi aychanta chayri uywaj ch'ichi aychanta, chayri wañusqa katarej ch'ichi aychanta chayqa, paypis ch'ichillataj qhepakonqa. Chay runaqa juchachasqa kanqa mana reparakunman chaypis.

³ Sichus mayqempis chayri imallapis payta ch'ichichajta jina ch'ichichasqa runaj imallantapis llankhanman, manataj chay kikimpacha reparakunchu, qhepatañapis reparakuchun juchachasqa kanqa.

⁴ Sichus mayqellampis usqhayllata simillanwan juranman, allin kajtachus mana allin kajtachus ruwananta, mana cuentata qokuspalla chayqa, chaymanta reparakuytawan chay runaqa juchachasqa kanqa.

⁵ Pichus kay imaspi juchayoj kanman chayqa, chay juchachakusqanta willakuchun.

⁶ Chay juchampa cuentanmanta Señorman apamuchun china ovejata, chayri china cabrata. Sacerdoteqa chay rikuchikuta jaywanqa. Chaywantaj chay runaj juchasnin pampachasqa kanqa.

⁷ Sichus chay runajta mana tiyapunchu chay uywasta rantinampaj chayqa, juchampa cuentanmanta apamuchun iskay juruk'utasta, chayri iskay irpasta. Ujnenqa kanqa juchampa cuentanmanta, ujnintaj ruphachisqa kanampaj.

⁸ Chaykunastaqa sacerdoteman apamonqa. Paytaj chay runaj juchampa cuentanmanta ujnin kajta ñaupajta jaywanqa kunkanta q'ewispa mana umanta khuchuspa.

⁹ Jinaspataj uywaj uj chhika yawarninwan altarpa uj lado uyanman ch'ajchonqa. Puchoj yawartataj altarpa uranman suruchenqa, chay runaj juchampa cuentanmanta. Chayqa runaj juchampa cuentanmanta rikuchiku.

¹⁰ Ujnin kajtataj sacerdoteqa ruphachenqa kamachisqa kasqanman jina. Sacerdoteqa ajinamanta chay rikuchikuta chay runaj juchasnin pampachasqa kanampaj jaywanqa.

¹¹ Sichus chay runajta mana tiyapunchu iskay juruk'utasta, chayri iskay irpastapis rantikunampaj chayqa, juchampa cuentanmanta apamuchun iskay kilos sumajnin ñut'u jak'uta. Chay ñut'u jak'umanqa amapuni aceiteta, nitaj inciensotapis churanqachu. Chayqa juchaj cuentanmanta rikuchiku apamusqa.

¹² Chaymantataj sacerdoteman apamuchun uj k'ispiña jakuta, yuyarikunampaj rikuchikuta jina altarpi ruphachenqa Señorpaj ruphachisqa rikuchikustawan khuska. Chayqa runaj juchampa cuentanmanta rikuchiku.

¹³ Ajinamanta sacerdoteqa chay runaj ima jucha ruwasqasninmantapis perdonachenqa. Kay rikuchikumanta puchojqa sacerdotespaj kanqa, imaynatachus ch'aki mikhuy rikuchikuswan ruwakorqa ajinata. Chayqa juchaspa cuentanmanta rikuchiku.

Juchasmanta rikuchikus

^14-15 Señorqa kay jinata Moisesman nerqa: Sichus mayqempis mana reparashaspalla, Señorpaj t'aqasqa kananmanta mana qonmanchu chayqa, ovejasninmanta sumajnin kaj mana imanasqa corderota apamuchun Señorman uj rikuchikuta juchaspa cuentanmanta. Chay corderoj valornenqa tasakonqa qolqepi Diospa wasimpi nisqankuman jina imaynatachus juchasrayku.

¹⁶ Chay runaqa Señorpaj t'aqasqa kajmanta mana qosqanta qopunan tiyan. Chaymantataj valorninmanta sapa phishqamanta ujta yapaykonqa, chaytataj sacerdoteman jaywanqa. Chay rikuchiku jaywasqa ovejawantaj sacerdoteqa perdonta tarenqa chay juchachakoj runapaj. Jinamanta chay runaj juchasnin pampachasqa kanqa.

¹⁷ Sichus mayqempis mana reparakushaspalla Señorpa nisqasnimpa contranta juchallikunman mana ruwana kajta ruwaspa chayqa, chay runa juchayoj kanqa.

¹⁸ Chayrayku apamunan tiyan ovejasninmanta uj sumajnin kaj mana imanasqa corderota. Chay juchanmanta cuentata qonqa. Chaypa valornintataj churanki; chaytataj sacerdoteman apanqa juchampa cuentanamanta rikuchikuta. Ajinamanta chay runaqa perdonta tarenqa juchasninmanta mana reparakusqanmanta. Chay juchantaj pampachasqa kanqa.

¹⁹ Chayqa juchamanta rikuchiku, imarayuchus chay runaqa juchayoj karqa Señorpa ñaupaqempi.