Levítico 4 - Qheshwa Biblia DC

Juchasmanta rikuchikus

^1-2 Señorqa Moisesman parlarqa kay jinata: Israelitasman ninki. Sichus pipis mana reparakushaspalla Señorpa mayqen nisqasnimpa contranta juchallikunman chayqa, mana ruwana kajtataj ruwanman chayqa, kay jinata ruwakonqa.

³ Sichus aceitewan jawisqa sacerdote juchallikun, runastawan juchallichin chayqa, pay Señorman apamuchun uj torillota sumajnin kajta mana iman imanasqata, chay juchampa cuentanmanta rikuchiku kanampaj.

⁴ Chay torillotaqa apamonqa Señorpa ñaupaqenman, Dioswan tinkukuna toldo punkuman. Chaypi torillojpa umanman makinta churaykuspa ñak'anqa Señorpa ñaupaqempi.

⁵ Chaymantaqa aceitewan jawisqa sacerdoteqa torilloj yawarninmanta jawispa apanqa, Dioswan tinkukuna toldoman.

⁶ Chaypitaj sacerdoteqa uj dedonwan yawarman chhapurispa qanchis kutita ch'ajchonqa Señorpa ñaupaqempi cheqaj cortinanman.

⁷ Chantaqa sumajta q'apashaj incienso altarpa wajras jina kaj esquinasninta uj pisi yawarwan jawiykonqa, Señorpa ñaupaqempi Dioswan tinkuna toldopi. Tukuynin puchoj yawartataj, rikuchikusta ruphachina altarpa uranman jich'aykonqa Dioswan tinkukuna toldo punkupi.

⁸ Orqhonqataj juchaspa cuentanmanta wañusqa torilloj tukuy ch'unchula wirasninta.

⁹ Iskaynin lurunisninta wirasnintinta, ura wasa wirasninta, wirata ima, chaytataj lurunisnintawan khuska khuchuchun.

¹⁰ Chayta ruwanqa imaynatachus allinyakuy ofrenda torillota Diosman jaywaykun ajinata. Chaymantataj tukuy chayta sacerdoteqa altar patapi ruphachenqa.

^11-12 Chaymantataj torilloj qaranta, tukuy aychasninta, umanta chakisninta, ch'unchulasninta, wanunta ima, torillojta imasninchus tiyan chaytawan jaramanta jawaman uj llimphu cheqaman orqhonqa, maypichus ushphata jich'anku chayman. Chaypitaj ushpha qotu pataman llant'ata churaykuspa ninawan q'olaykuchenqa.

^13-14 Sichus tukuynin israelitas mana yachashaspalla juchallikunkuman, manataj mayqempis reparakunchu, Señorpa mayqen nisqasnimpa contranta juchallikusqankuta, jinamantataj juchallisqas rikhurinkuman chayqa, juchayoj kasqankuta reparakuytawanqa, uj torillota apamuchunku juchankoj cuentanmanta jaywasqa kanampaj. Chaytataj apamuchunku Dioswan tinkukuna toldo punkuman.

¹⁵ Chaypitaj Israelpa kurajkunasninku makisninkuta churanqanku torilloj umanman Señorpa ñaupaqempi, chay kikimpitaj ñak'anqanku.

¹⁶ Chaymantaqa aceitewan jawisqa sacerdoteqa torilloj yawarninmanta Dioswan tinkukuna toldoman apanqa.

¹⁷ Chaypitaj sacerdoteqa uj dedonwan yawarman chhapurispa qanchis kutita Señorpa ñaupaqempi ch'ajchonqa cortina cheqannejman.

¹⁸ Uj pisi yawarwantaj Señorpa ñaupaqempi kashan chay altarpata wajras jina kaj esquinasninta jawenqa Dioswan tinkukuna toldo ukhupi. Tukuynin puchoj yawartataj rikuchikusta ruphachina altarpa uranman jich'anqa, Dioswan tinkukuna toldo punkupi.

¹⁹ Chaymantaqa torilloj wiranta orqhoytawan tukuyninta altar patapi ruphachenqa.

²⁰ Kay torillowanqa ruwakonqa, imaynatachus juchasapaj cuentanmanta kaj torillowan ruwarqanku ajinata. Sacerdoteqa ajinamanta chay rikuchikuta jaywanqa paykunaj juchasninkumanta. Juchasninkutaj pampachasqa kanqa.

²¹ Chaymantataj chay torillota jaramanta jawaman orqhospa ruphachimonqa, imaynatachus chay ñaupaj kaj torillowan ruwarqa, ajinata. Chay torilloqa ruphachisqa kanan tiyan tukuy israelitaspa juchasninkoj cuentanmanta.

²² Sichus mayqen kuraj kaj runa juchallikunman chayqa, Señor Diosnimpa, mayqen nisqasnimpa contranta ruwaspa juchallisqa kanqa, mana yachashaspalla ruwaspapis.

²³ Reparakuytawan juchayoj kasqanta, apamuchun juchampa cuentanmanta uj chivota sumajnin kajta, mana iman imanasqata.

²⁴ Chay chivoj umanman makinta churaytawantaj ñak'achun Señorpa ñaupaqempi, may cheqapichus ruphachisqa kanampaj uywasta ñak'anku chaypi. Chayqa juchaspa cuentanmanta rikuchiku.

²⁵ Chaymantataj sacerdoteqa uj dedonwan chhapuspa juchaspa cuentanmanta ñak'asqa uywaj yawarninwan jawenqa chay ruphachina altarpa wajras jina kaj esquinasninta. Chay tukuynin puchoj yawarwantaj jich'anqa rikuchikuta ruphachina altarpa uranman.

²⁶ Chivoj tukuynin wirasnintataj altar patapi ruphachenqa, imaynatachus allinyakuy rikuchiku wirawan ruwanku ajinata. Sacerdoteqa ajinamanta chay rikuchikuta jaywanqa, kuraj kajpa juchasninmanta, juchasnintaj pampachasqa kanampaj.

²⁷ Sichus mayqen runallapis juchallikunman chayqa, Diospa mayqen nisqampa contranta ruwaspa, juchachasqa kanqa mana yachaspalla ruwashaspapis.

²⁸ Reparakuytawan juchayoj kasqanta, apamuchun juchampa cuentanmanta uj cabrata sumajnin kajta mana ima imanasqata.

²⁹ Chay cabraj umanman makinta churaytawantaj ñak'achun, may cheqapichus ruphachisqa kanampaj uywasta ñak'anku chaypi.

³⁰ Chaymantataj sacerdoteqa uj dedonwan chhapuspa juchaspa cuentanmanta ñak'asqa uywaj yawarninwan jawenqa chay ruphachina altarpa wajrasnin jina kaj esquinasninta. Chay tukuynin puchoj yawartataj altarpa uranman jich'anqa.

³¹ Chaymantaqa cabraj tukuy wirasninta wirachanqa, imaynatachus ruwanku allinyakuy rikuchiku wirawan ajinata. Sacerdoteqa ajinamanta chay rikuchikuta jaywanqa, chay runaj juchasninmanta. Juchasnintaj pampachasqa kanqa. Chay ruphachispa jaywasqampa q'apaynenqa Señorpaj allin kanqa.

³² Sichus mayqempis juchampa cuentanmanta apamunman uj ovejata chayqa, apamuchun sumajnin kaj china ovejata mana ima imanasqata.

³³ Chay ovejaj umanman makinta churaytawantaj ñak'anqa may cheqapichus ruphachisqa kanampaj uywasta, ñak'anku chaypi. Chayqa juchaspa cuentanmanta rikuchiku.

³⁴ Chaymantataj sacerdoteqa uj dedonwan chhapuspa juchaspa cuentanmanta ñak'asqa uywaj yawarninwan jawenqa chay ruphachina altarpa wajras jina kaj esquinasninta, juchaj cuentanmanta. Jinaytawantaj chay tukuynin puchoj yawarwan altarpa uranman jich'anqa.

³⁵ Chaymantataj ovejaj tukuy wirasninta wirachanqa, imaynatachus ruwanku allinyakuy rikuchiku wiraswan ajinata. Sacerdoteqa chay wirasta altar patapi ruphachenqa, Señorman rikuchikus qosqa karqa chaykunatawan khuska. Ajinamanta chay sacerdoteqa chay rikuchikuta jaywanqa chay runaj juchasninmanta. Juchasnintaj pampachasqa kanqa.