Levítico 3 - Qheshwa Biblia DC

Allinyakuy rikuchiku

¹ Maypachachus mayqempis Señorman apamunman uywasninmanta uj wakata, chayri uj torota allinyakuy rikuchikuta jina, chay uywaqa sumajnin kaj kanan tiyan mana imanasqa.

² Chay rikuchikuta Señorman apamojqa, makinta churanqa chay uywaj umanman. Chaymantataj Dioswan tinkukuna toldo punkupi ñak'anqa. Sacerdotestaj chay uywaj yawarninwan ch'ajchonqanku chay altar patasninta tukuy muyuynintinta ima.

^3-4 Pichus uj uywata apamojqa allinyakuy rikuchikuta jina, Señorman ruphachispa qonqa: chay uywaj ch'unchula wirasninta, iskaynin lurunisninta wirasnintinta, ura wasa wirasninta, kukupi wiranta ima, chayta lurunisnintawan khuska khuchuchun.

⁵ Chaytaqa sacerdotes ruphachenqanku altarpi llant'a patapi ruphachisqa rikuchikutawan khuska. Chay ruphachispa jaywasqampa q'apaynenqa Señorpaj allin kanqa.

⁶ Maypachachus mayqempis Señorman apamunman uywasninmanta, orqotapis chinatapis allinyakuy rikuchikuta jina chayqa, chay uywaqa sumajnin kaj kachun mana iman imanasqa.

⁷ Sichus rikuchikupaj corderota apamunman chayqa, Señorpa ñaupaqenman apamuchun.

⁸ Chay rikuchikuta Señorman apamojqa makinta churanqa chay uywaj umanman, Dioswan tinkukuna toldo punkupitaj ñak'anqa. Sacerdotestaj chay uywaj yawarninwan ch'ajchumonqanku chay altar patasta, tukuy muyuyninta ima.

⁹ Pichus uj uywata apamojqa, allinyakuy rikuchikuta jina, Señorman ruphachisqa qonqa: Wiranta, chantapis chupanta wasa tullunmantapacha khuchusqata, chanta ch'unchulla wirasninta ima.

¹⁰ Jinallataj iskaynin lurunninta wirasnintinta, ura wasa wirasninta, kukupi wirata ima, chayta lurunisnintawan khuska khuchuchun.

¹¹ Chaymantataj chaykunata sacerdote tukuynin altar patapi ruphachenqa mikhuna rikuchikuta jina Señorpaj.

¹² Sichus cabrata rikuchikupaj apamunman chayqa, Señorpa ñaupaqenman apamuchun.

¹³ Chay rikuchikuta Señorman apamojqa, chay uywaj umanman makinta churaspa, Dioswan tinkukuna toldo punkupi ñak'anqa. Sacerdotestaj chay cabraj yawarninwan chay altar patata tukuy muyuynintinta ima ch'ajchumonqanku.

¹⁴ Pichus uj uywata apamojqa Señorpaj ruphachispa qonqa: Chay ch'unchu wirasninta.

¹⁵ Jinallataj iskaynin lurunisninta wirasnintinta, ura wasa wirasnintinta, kukupi wirata ima. Chayta lurunisnintawan khuska khuchuchun.

¹⁶ Chaymantataj chaykunata sacerdote tukuyninta altar patapi ruphachenqa Señorpaj mikhuna rikuchikuta jina. Chay ruphachispa jaywasqampis q'apaynenqa Señorpaj allin kanqa. Uywaj tukuy wirasnenqa Señorpaj kachun.

¹⁷ Kayqa ley jina unaypaj churasqa sapa kuti ruwanapaj miraymanta miraykama kanampaj. Maypichá tiyakunkichej chaypi amapuni wirata, nitaj yawartapis mikhunkichejchu.