Levítico 27 - Qheshwa Biblia DC

Señorpaj t'aqasqa imasmanta

^1-2 Señorqa Moisesman parlarqa kay jinata: Israelitasman kay jinata niy: Maypachachus pipis imatachus qosaj nisqanta Señorman qopuyta munan, uj runaj valesqanman jina qoponqa.

³ Qharispaj iskay chunka watayojmanta, sojta chunka watayojkama, ninkichej phishqa chunka phisu qolqeta qonankuta, imaynachus Diospa tiyakunampi nisqankuman jina.

^4-7 Uj warmimantaqa kinsa chunka phisu qolqeta qonankuta; phishqa watayojmanta, iskay chunka watayojkama qharismanta iskay chunka phisu qolqeta qonankuta; warmismantaqa chunka phisu qolqeta qonankuta, uj killayojmanta phishqa watayojkama, qharismantaqa phishqa phisu qolqeta qonankuta; warmismantataj kinsa phisu qolqesta qonankuta; sojta chunka watayojmanta qhepaman qharismantaqa chunka phishqayoj phisu qolqesta qonankuta, warmismantataj chunka phishqayoj phisu qolqeta.

⁸ Sichus chay runa qosaj nejqa mana kapuyniyoj, manataj chay nisqa qolqeta qoyta atinchu chayqa, sacerdoteman pusachunku, watejmanta ninampaj mashkhatachus qonanta chay runaj nisqanman jina.

⁹ Sichus pipis jaywana uywata Señorman qosaj ninman chayqa, chay uywa Señorpaj sumaj t'aqasqa kanqa.

¹⁰ Manataj chay uywata waj uywawan trocayta atinkuchu allimpis kachun mana allimpis kachun. Sichus pipis chay uywata waj uywawan trocanman chayqa, chay trocasqa uywantin iskaynin Señorpaj t'aqasqas kanqanku.

¹¹ Señorman mana jaywayta atina, mana llimphupaj qhawasqa kajtenqa chay uywataqa sacerdoteman apanqanku.

¹² Ajinamanta sacerdote ninampaj mashkhatachus chay uywamanta qonanta. Sacerdote nisqanman jinataj qosqa kanqa.

¹³ Sichus chay uywata orqhokapuyta munan chayqa, sapa phishqamanta ujtawan qonan tiyan, mashkhachus qonan karqa chaytawan khuska.

¹⁴ Sichus pipis wasinta Señorman jaywan chayqa, sacerdote chay wasita qhawarispa ninan tiyan mashkhachus valesqanta. Sacerdotej nisqanman jina kanan tiyan.

¹⁵ Sichus chay wasinta qojqa watejmanta rantikapuyta munan chayqa, sapa phishqamanta ujtawan qonan tiyan, mashkhatachus sacerdote nerqa valesqanta chaytawan khuska. Waseqa chay runallamantaj kutiponqa.

¹⁶ Sichus mayqellampis jallp'anmanta uj cheqata Señorman qonman chayqa, valesqanqa kanan tiyan, mashkha mujuwanchus tarpukusqanman jina. Sapa uj carga granowan tarpukoj jallp'aqa phishqa chunka qolqe valenqa.

¹⁷ Pipis jallp'anta Señorman qonman, kacharina watamantapacha, chay jallp'amanta qonaqa maychus nisqa jinallapuni kanqa.

¹⁸ Sichus kacharina watamanta qhepaman pipis jallp'anta Señorman qonman chayqa, sacerdote nenqa mashkhatachus chay jallp'amanta qonanta, pisiyachispa mashkhachus karqa chaymanta, mashkha watarajchus kacharina wataman kasqanman jina.

¹⁹ Sichus chay jallp'ata qojqa, orqhokapuyta, watejmanta rantikapuyta munanman chayqa, sapa phishqamanta ujtawan qonan tiyan, mashkhamanchus chay jallp'a qhawasqa karqa chaytawan khuska. Jinamanta jallp'aqa paypallatapuni kanqa.

²⁰ Sichus jallp'anta mana rantikapunmanchu chayqa, chay jallp'ataj waj runaman vendesqa kanman chayqa, manaña rantikapuyta atenqachu.

²¹ Maypachachus kacharina watapi chay jallp'a libre qhepakonqa chayqa, Señorllapaj kanqa. Sacerdotetaj chayta jap'ikaponqa.

^22-23 Sichus pipis rantisqan jallp'ata Señorman qonman, manataj ayllumpa chayaqenchu kanman chayqa, sacerdote chay jallp'ata qhawanqa, qoj runaman mashkhatachus qonampaj kacharina watakama. Chay kikin diallapitaj chay runaqa sacerdotej nisqanman jina paganqa. Señorpajtaj t'aqasqa kanqa.

²⁴ Pichus vendejqa jallp'anta jap'ikaponqa kacharina watapi. Chay niyta munan pipunichus jallp'ayoj karqa chay.

²⁵ Tukuy ima tasasqayki kanan tiyan, Diospa tiyakunanmanta phisu qolqeman jina. Sapa phisu qolqeqa iskay chunka geras nisqayoj kanqa.

²⁶ Tukuy uywaspa kuraj uñasnenqa Señorpata, kuraj uñas kasqankurayku, nitaj pipis chaytaqa Señorman qosaj nenqachu. Uj waka uñapis kachun, chayri uj oveja uñapis, chayqa ñapis Señorpataña.

²⁷ Sichus mana llimphupaj qhawasqa animal kanman chayqa, rantikapuyta atenqa maychus valesqanman jina, yapaspa sapa phishqamanta ujtawan. Sichus mana rantikapunmanchu chayqa, vendekunan tiyan mashkhatachus ninku kananta chayman jina.

²⁸ Sichus mayqellampis kapuyninmanta wiñaypaj Señorman qopunman: Runasta, uywasta, jallp'asninta ima chayqa, chaykunata mana vendekuyta, nitaj watejmanta rantikapuytapis atinchu. Chaykunaqa Señorpaj t'aqasqaña.

²⁹ Ni pipis rantikapuyta atinmanchu, uj runata wiñaypaj Señorman qosqantaña. Chay runaqa wañunampuni tiyan.

³⁰ Tukuy poqochisqaykichejmantaqa sapa chunkamanta ujqa Señorpata. Paypaj t'aqasqa: Mujusmanta, sach'aspa poqoyninmanta ima.

³¹ Sichus pipis chaykunamanta uj chhikallatapis rantikapuyta munanman chayqa, sapa phishqamanta ujta qonan tiyan, chay mashkhachus valesqantawan.

³² Wakasmanta, chayri ovejasmantaqa sapa chunkamanta ujqa Señorpata kanqa.

³³ Ni pipis ajllanqachu allimpis kachun mana allimpis kachun, nitaj waj uywawampis trocanqachu. Sichus mayqellampis uj uywawan trocanman chayqa, iskaynin uywas Señorpaj kanqa. Manaña pipis chaymantaqa rantikapuyta atenqachu.

³⁴ Kay kamachiykunata Señorqa qorqa Moisesnejta israelitasman Sinaí orqopi.