Levítico 25 - Qheshwa Biblia DC

Jallp'aj samarikunan wata

^1-2 Señorqa Moisesman Sinaí orqopi kay jinata parlarqa: Israelitasman kayta niy: Qankunaman ima jallp'atachus qosqaykichej chayman yaykuspañaqa, jallp'ata samarichinkichej Señorpaj.

³ Chay jallp'aspi tarpunkichej sojta watata. Kikillantataj sach'asniykichejtapis ramasninta k'utunkichej sojta watata, jinallataj poqoynintapis pallankichej sojta watata.

⁴ Qanchis kaj watapitaj Señorpaj chay jallp'ata samarichinkichej. Chay watapi ama tarpunkichejchu chay jallp'api, nitaj uvas sach'astapis k'utunkichejchu.

⁵ Chanta nillataj ruthunkichejchu k'ipa trigosta chay watapi poqojta, nillataj huertaykichejmanta uvastapis pallankichejchu, chay jallp'aqa sumajta samarikunan tiyan.

⁶ Jallp'ata samachishankichej chay wataqa jallp'a sapallanmanta poqoj kallanqa qankuna mikhunaykichejpaj: Qhari kamachisniykichejpaj, warmi kamachisniykichejpaj, llank'ajkunapaj, karu llajtayojkuna qankunawan tiyakojkunapajwan.

⁷ Uywasniykichejpaj tukuy chay jallp'api kaj monte animalespaj imapis mikhunaqa kallanqataj. Imaschá chay jallp'aspi poqonqa, chaykuna mikhunaykichejpaj kanqa.

Kusikuna wata

⁸ Qanchis semana watasta yupanaykichej tiyan, jinamanta chay watasqa tukuynimpi tawa chunka isq'onniyoj watas kanqanku.

⁹ Qanchis kaj killapi chunka día kashajtin, carneroj wajrasninmanta putututa tocankichej tukuy chay jallp'aykichejpi, mayqen diachus Señormanta perdonta tarina p'unchaypi.

¹⁰ Ninkichej phishqa chunka wataqa Diospaj t'aqasqa kananta. Chay watapi ninkichej chay jallp'api tukuy runasqa kacharichisqa kanankuta. Jallp'aqa kutipullanqa pejpatachus karqa chay runaman. Sapa uj kutipullanku ayllusnimpaman.

¹¹ Phishqa chunka wataqa sutichasqa kanqa kacharina wata. Chay watapi ama tarpunkichejchu, nitaj ruthunkichejchu chay k'ipas poqojkunata. Nillataj uvaskunatapis pallankichejchu.

¹² Chayqa Diospaj t'aqasqa wata qankunapajqa librana wata. Jallp'a sapallanmanta poqon chayllata mikhunkichej.

¹³ Chay watapi watejmanta tukuyniykichej jallp'asniykichejta jap'ikapunkichej.

¹⁴ Sichus jallp'ata vendenkichej, chayri rantinkichej chayqa, ama ch'aukiyanakunkichejchu.

¹⁵ Perdonanakuna chay watamanta mashkha watachus pasasqanman jina, jallp'ataqa runa masiykichejmanta rantinkichej. Jinallataj mashkha cosechasrajchus mana kanrajchu chayman jina vendenkichej.

¹⁶ Astawan ashkha watas cosecha kajtinraj astawan valenqa, pisi wataslla kajtinrí pisillataj jallp'apis valenqa. Jallp'asqa vendekunan tiyan mashkha cosechasrajchus mana kanchu chayman jina.

¹⁷ Ni pipis ch'aukiyachunchu ni mayqen runa masintapis. Sapa ujpis Diosniykichejta manchachikuychej. Noqamin qankunaj Señor Diosniykichejqa kani.

¹⁸ Leyesniyta kasuychej, imatachus kamachisqasniytapis junt'aychej. Chaykunata allinta ruwankichej chayqa, tukuy sonqo allinta tiyakunkichej chay jallp'api.

¹⁹ Jallp'aqa sumajta poqopusonqachej, qankunataj chaykunata mikhurinkichej sajsakunaykichejkama. Jinata tukuy sonqo allinta tiyakunkichej.

²⁰ Ichapis qankunaqa tapunakunkichej: Imatataj mikhusun chay qanchis watapi mana tarpuspari, nitaj cosechatapis oqharispari?, nispa.

²¹ Noqa bendicionniyta apachimusqaykichej sojta kaj watapi. Chay wataspi poqopusonqachej kinsa watasta mikhunaykichejpaj.

²² Watapi mikhushankichejraj rezago mikhuykunata, pusaj kaj ujtawan tarpunaykichejkama. Chay watapi tarpusqaykichej poqonankama isq'on watakama rezago mikhuykunata mikhunkichejraj.

²³ Chay jallp'astaqa ama wiñaypaj vendenkichejchu, imaraykuchus noqajtamin jallp'aqa. Qankunaqa karu llajtayoj, noqaj wajyarisqay jinalla kankichej.

²⁴ Chayrayku ima jallp'atapis qankunapaj jap'ikuspaqa, ñaupaj kaj dueñosta saqenaykichej tiyan watejmanta rantikapunankuta.

²⁵ Sichus mayqen aylluyki pisichikuspa jallp'anta vendesunkiman, qantaj rantikapuwaj chayqa, mayqenchá aswan qaylla ayllun kajqa, jamuspa chay vendesusqan jallp'ata watejmanta rantiyta atin.

²⁶ Pejpatachus mana ayllun kanchu, chay vendesqan jallp'ata watejmanta rantinayan chayqa, payllataj qolqeta tantakunan watejmanta rantikapunampaj.

²⁷ Mayk'ajchus vendesorqa chaymantapacha watasta yupanqa, chayman jina kutichenqa qolqeta pimanchus venderqa chayman, watejmantataj chay jallp'ata rantikaponqa.

²⁸ Sichus mana qolqeta tariyta atenqa chayqa, pichus rantikojpa makimpi qhepakonqa chay jallp'aqa kacharina nisqa watakama. Chaymantaraj chay jallp'aqa libre kanqa. Pichus vendejqa jallp'ata watejmanta jap'ikaponqa.

²⁹ Sichus pisis wasinta perqawan muyuykusqa llajtapi vendenman chayqa, vendesqanmanta watankamalla atin watejmanta jap'ikapuyta.

³⁰ Sichus chay vendej mana chay watapi watejmanta jap'ikapuyta atinchu chayqa, chay waseqa pichus rantikojpa makimpi qhepakonqa, miraynintimpaj wiñaypaj kanqa. Manataj kutichipuyta atenqachu chay kacharina nisqa watapi.

³¹ Mana perqawan muyuykusqa juch'uy llajtaspi waseqa campospi jinalla qhawasqa kanqa. Atenqanku watejmanta rantikapuyta, kacharina watapeqa librasqa kayta atenqanku.

³² Chaywampis levitasqa llajtasninku ukhupi wasisninkuta watejmanta rantikapuyta atillanku.

³³ Pillapis levitasmanta uj wasita rantikojqa saqepunan tiyan chay wasita kacharina watapi, ripunantaj tiyan maypichus tiyakorqa chayman. Imaraykuchus levitaspataqa chaylla kapun, israelitaspa llajtasninkoj chaupimpi tiyakunankupaj.

³⁴ Levitaspata llajtasninkoj qayllampi campo michinasninkoqa mana vendekuyta atinkuchu, imaraykuchus chay jallp'asninkoqa wiñaypaj paykunapaj kanqa.

³⁵ Mayqen llajta masillaykipis pisichikapunman, qanmantaj jamusunkiman chayqa, qan yanapanayki tiyan karu llajtayojta jina, wasiykipitaj qanwan tiyakonqa.

³⁶ Manusqaykimantapis ama ni ima laya reditosta mañankichu, manachayqa Diosniykita manchachikuspa wasiykiman wajyakuy qanwan tiyakunampaj.

³⁷ Ama qolqeta manusqaykimantapis reditosta mañankichu, nitaj aswan ashkhatapis mikhuykunasta payman vendenkichu.

³⁸ Noqamin kani Señorqa qankunaj Diosniykichej, Egiptomanta orqhomorqaykichej Canaán jallp'ata qosunaykichejpaj, Diosniykichejtaj kanaypaj.

³⁹ Sichus mayqen llajta masiyki qanwan tiyakushaspa astawan pisichikapunman, qanmantaj vendekusunkiman chayqa, ama wata runata jina llank'achinkichu.

⁴⁰ Payqa llank'ajniyki jina kanqa, chayri karu llajtayoj jina. Jinamanta qampaj llank'apusonqa kacharina wata chayamunankama.

⁴¹ Chay watataj wasiykimanta llojsiponqa tukuy wawasninwan. Kutiponqataj ayllusninman, tatanmanta chayaqentataj ujtawan jap'ikaponqa.

⁴² Paykunaqa noqaj kamachisniy, noqa Egiptomanta orqhomorqani. Chayrayku paykunataqa mana vendekuyta atinkuchu wata runasta jina.

⁴³ Chantapis ama sajra runa jina, paykunata ñak'arichinkichu; manachayqa Diosniykita manchachikunki.

⁴⁴ Sichus munanki warmi kamachisniyoj, chayri qhari kamachisniyoj kayta chayqa, muyuyniykipi kaj nacionesmanta rantikuy.

⁴⁵ Chantapis atillankichejtaj rantikuyta qankunawan karu llajtasniyoj tiyakojkunamanta, qankunaj jallp'asniykichejpi kashajtinku nacenku chay wawasninkuta. Chaykunata qankunaqa rantikuyta atinkichej qankunajtapuni kanampaj.

⁴⁶ Chaykunatataj wawasniykichejman saqenkichej uj chayaqeta jina mayk'ajchus wañupunkichej chaypacha. Chaykunata qankunaqa kamachisniykichejpaj wata runasta jina jap'ikunkichej. Chaywampis ni mayqenniykichej qankuna israelitasqa, mayqen israelita masiykichejtapis kamachinkichejchu, sajramanta nitaj millayta phiñakuspapis.

^47-49 Sichus mayqen karu llajtayoj qankuna ukhupi qhapajyanman, chay qayllampi israelita masiykichejtaj pisichikunman chayqa, chay karu llajtayojmantaj vendekunman chayqa, chayri waj karu llajtayojman chayqa, vendesqa kasqanmantaña watejmanta rantisqa kayta, mayqen wauqempis rantiyta atin, chayri uj tion, uj ayllun, chayri mayqen karu ayllunraj kaj. Manachayqa pay kikimpis atenqa rantikuyta, sichus qolqen tiyanqa chayqa.

⁵⁰ Ima watapichus vendesqa kasqanmantapacha allinta yupanqaqanku rantejninwan khuska kacharina watapi. Chay runaj precionqa kanan tiyan mashkha watañachus kasqanman jina. Mashkha watañachus llank'asqanman jina, uj llank'aj runa mashkhatachus ganan chayman jina.

⁵¹ Sichus ashkha watasraj kashan chayqa, chay watasman jina qolqeta kutichinan tiyan, mashkhapichus vendesqa kasqanman jina.

⁵² Sichus pisi watasllaña kashan kacharina watapaj chayqa, mashkha qolqerajchus qonan kashan chayta, chay mashkha watawanrajchus kanan kashan chayman jina qopuchun.

⁵³ Qhawanan tiyan uj watapaj mink'asqa llank'aj runata jina. Ama saqenkichu ñak'arichispa llank'achinanta.

⁵⁴ Sichus chay wataspi rantiyta mana atinchu chayqa, kacharina watallapiña wawasninwan khuska llojsiponqa.

⁵⁵ Israelitasqa kamachisniy, noqa kikiypa kamachisniy. Noqa Egiptomanta orqhomorqani. Noqamin kani paykunaj Diosnin.