Levítico 24 - Qheshwa Biblia DCK'anchanaspaj aceite 1-2 Señorqa Moisesman kay jinata parlarqa: Israelitasta kamachiy, apamunankuta sumajnin kaj olivo aceiteta k'anchanaspaj ajinamanta k'anchanallankupajpuni. 3 Chay k'anchaykunata allinta Aaronqa ch'isiyaymanta sut'iyaykama, Señorpa ñaupaqempi k'anchanallankupajpuni, Dioswan parlana toldopi, Diospa tratonwan kaj cajón qayllapi, velomanta jawapi. Kay kamacheyqa tukuy mirayniykichejpaj wiñaypaj kanqa. 4 Aaronqa chay k'anchanata churanqa ch'uwa qorimanta ruwasqa jatun sayachina k'anchanaman, Señorpa ñaupaqempi k'anchanallampajpuni. Señorman t'antata jaywanamanta 5 Sumajnin kaj jak'umanta chunka iskayniyoj t'antata ruwaspa sayachiy, sapa ujnin kachun tawa kilosmanta. 6 Chaytataj churanqa Señorpa ñaupaqenman ch'uwa qorimanta ruwasqa mesaman, iskayman t'aqaspa sapa uj ladoman sojtakama sinrullata. 7 Sapa uj sinru patamantaj sumaj kaj inciensota churanki, chaytaj kanqa yuyarikuna rikuchiku Señoraj ruphachisqa ofrenda jina. 8 Kaytaqa sapa samarikuna p'unchay Señorpa ñaupaqenman churanaykichejpuni, israelitaspa sutinkupi. Kay tratoqa wiñaypaj kanqa. 9 Kay t'antasqa Aaronmpata wawasnimpatawampuni kashan. Chanta chaykunata paykuna mikhukapunanku tiyan, Diospaj nisqa llimphu cheqapi. Ofrendasqa Señorpaj ruphachisqasmantaqa aswan sumajpuni kayqa. Jasut'i Diospa contranta rimajkunapaj 10 Israelitas ukhupi karqa uj runa, mamanmanta israelita, tatanmantataj egipcio. Mamampa sutin karqa Selomit, pay karqa Dibrej wawan Dan ayllumanta. Chay runaqa uj israelitawan k'aminakuyta qallarerqanku. 11 Chay israelita warmej wawanqa Diospa contranta rimarqa, Diospa sutinta maldicispa. Chayrayku Moisesman pusamorqanku. 12 Jinaspataj chay runataqa waqaycharqanku Señor imatachus kamachinankama. 13-14 Chaymantataj Señorqa Moisesman kay jinata parlarqa: Jaramanta jawaman orqhoy chay pichus maldiciwajta. Chay nisqanta uyarejkunataj makisninkuta paypa uman pataman churachunku, jinaspataj tukuy runas rumiwan ch'anqaspa wañuchichunku. 15 Kunanqa israelitasman niy: Mayqellampis Diosnimpa sutinta maldicejqa juchachasqa kanqa. 16 Pillapis Señorpa contranta rimajtaqa tukuy runas rumiwan ch'anqaspa wañuchenqanku. Señorpa contranta rimajqa karu llajtayojpis kachun, chayri israelitapis kachun, wañuchisqa kanqa. 17 Pillapis runa masinta wañuchejqa, wañuchisqallataj kanqa. 18 Pillapis waj runaj wakanta wañuchejqa kutichinan tiyan, uywamanta uywallatataj. 19 Pillapis ima sajrata ayllu masimpaj ruwajmanqa, chay jina sajrallatataj payman kutichenqanku. 20 Imata p'akin chayqa, pay p'akisqallataj kanqa, ñawimanta ñawi, kirumanta kiru; imatachus waj runajta nanachin, chay kikin nanachisqallataj pay kanqa. 21 Pichus uj runaj uywanta wañuchejqa, kausashaj uywata kutichinan tiyan. Pichus uj runata wañuchejqa wañuchisqallataj kanqa. 22 Chay kamachiyllapuni karu llajtayojkunapajpis kanqa, jinallataj chay kikin llajtayojkunapajpis. Noqamin kani Señor Diosniykichejqa. 23 Chay Moisesqa israelitasman willarqa. Paykunata pichus Diospa contranta parlajta, jaramanta jawaman orqhorqanku. Chaypitaj rumiwan ch'anqaspa wañucherqanku. Chayta israelitasqa ruwarqanku imaynatachus Señorqa Moisesman kamachisqanman jina. |
Qheshwa Biblia DC © Sociedades Bíblicas Unidas, 1986.
United Bible Societies