Levítico 22 - Qheshwa Biblia DC

Llimphu rikuchikusta mikhunamanta

^1-2 Señorqa Moisesman kay jinata parlarqa: Aaronman mirayninmanwan niy, imastachus israelitas apamuwanku chay llimphuchasqa kajkunamanta sumajta qhawakunankuta, sutiyta ama p'enqaypi qhawachinankupaj. Noqamin Señorqa kani.

³ Nillaytaj, kunanmanta qhepamanqa Aarompa mirayninmanta mayqellampis juchawan ch'ichichasqa kashaspa Señorman qayllachenqa jaywaspa chayqa, israelitaspa apamuwasqanku llimphuchasqa imasta, Señorpaj karqa chaykunatachus chayqa, pay ñaupaqenmanta chinkachisqa kanqa. Noqamin Señorqa kani.

^4-6 Mayqellampis Aarompa mirayninmanta lepra onqoywan kanman chayqa, chayri mujun llojsillajtimpuneqa, mana mikhuyta atinchu Diospaj nisqa kaj mikhunasmanta, chay imananchus kashan chaymanta llimphuchakunankama. Pichus imasllatapis llujchirinman wañusqarayku mana llimphuchu kashajtin, chayri llujchinman pichus mujunta llojsicherqa chayta, chayri pichus katari jina qhatatakoj animalta llankharerqa, jinamanta ch'ichipaj qhawasqa kanman, chayri uj mana llimphu runa ch'ichichanman, pichus payta llankharejta chayqa, chay sacerdote ch'ichipaj qhawasqa kanqa ch'isiyaykama. Chaykamataj mana mikhuyta atinchu llimphuchasqa mikhunasta manaraj yakuwan ñaupajta mayllakuspaqa.

⁷ Inti chinkaykojtinkama llimphuchasqa kanqa. Chaymantataj ima mikhunaschus Diospaj nisqas karqanku chaykunata atillanqaña mikhuyta. Chaykunaqa mikhunampuni kanku.

⁸ Wañusqa uywaj aychanta mana mikhunanchu tiyan, chayri sajra animalpa jap'isqan puchoj aychata, ama chaywan ch'ichichasqa rikhurinampaj. Noqamin Señorqa kani.

⁹ Niy paykuna kamachiykunasniyta junt'anankuta, ama chaykunasrayku juchachasqas qhepakunankupaj, amataj mana kasukusqankurayku wañunankupaj. Noqamin Señorqa kani, noqapaj t'aqarqani chay.

¹⁰ Sacerdotej kikin ayllunmanta kajkunaqa mikhuyta atenqanku, chay Señorpaj nisqa kajkunamanta. Sacerdotej wasinman karumanta watukoj rej runapis, chanta sacerdotepaj llank'apojpis manallataj mikhuyta atenqachu chay Señorpaj nisqa mikhunasmantaqa.

¹¹ Sichus uj sacerdote uj kamachita qolqenwan rantikun chayqa, chay kamachi runaqa Señorman qosqamanta mikhuyta atin. Jinallataj wasimpi nacekojkunapis chay mikhunasllamantataj mikhuyta atinku.

¹² Sichus uj sacerdotej warmi wawan mana sacerdote ayllumanta kajwanchu casaran chayqa, sacerdoteman qosqa mikhunamanta mana mikhuyta atinchyu.

¹³ Sichus sacerdotej warmi wawan chay warmi wawan viuda qhepakunman, chayri qosanmanta t'aqasqa, kutipuntaj tatampa wasinman, manataj wawasniyojchu, ñaupajta sipas kashaspa tatanwan tiyakorqa jinata chayqa, tatampa mikhunasninmanta mikhuyta atin. Chaywampis waj runaqa chay mikhunasmanta mikhuytaqa manapuni atinchu.

¹⁴ Sichus mayqellampis pantaspa mikhuykunman chay Señorpaj nisqa mikhunasmanta chayqa, sacerdoteman kutichinan tiyan chay mikhusqanmanta phishqamanta t'aqaspa chay uj t'aqata mikhunastawan khuska.

¹⁵ Sacerdotesqa ama ch'ichichachichunkuchu, israelitas imastachus Señorman qonku chaykunataqa, imaraykuchus chay mikhunasqa Señorpaj t'aqasqas.

¹⁶ Ama juchachakuchunkuchu chay jaywasqasta mikhuspa. Noqamin Señorqa kani, pichus qankunata t'aqarqani chay.

Imayna uywastachus rikuchikupaj apanamanta

^17-18 Señorqa Moisesman kay jinata parlarqa: Kay jinata niy Aaronman, mirayninman, israelitasmanwan: Sichus mayqen israelitallapis chay paykuna ukhupi tiyakoj karu llajtasniyojpis Señorman apamunman uj uywata, uj rikuchiku jina ruphachisqa kanampaj chayqa, sonqon ukhumanta qochun, ama pejpa kamachisqanraykuchu, chayri pay qosaj nisqanta junt'aspa.

¹⁹ Chay rikuchikun jap'isqa kanampajqa qonan tiyan uj sumajnin kaj corderota mana iman imanasqata cordero kachun, chayri toro kachun, chivo kachun.

²⁰ Jap'isqa kanampajqa ama iman imanasqapuni kanan tiyan.

²¹ Pillapis allinyakuy rikuchikuta Señorman qojqa, chayri qosaj nisqanmanta qojqa, chay mana pejpa kamachisqan, payllamanta qojqa, allinnin kajtapuni qochun, toropis kachun, chayri corderopis kachun. Ajinamanta Señorqa chay rikuchikuta walej ninampaj.

²² Señormanqa amapuni qonkichejchu onqosqa uywasta: Ciegosta, chakin p'akisqasta, k'irinchasqasta, sarnasniyojta, t'iri aychasniyojta, nitaj alqasniyojtapis, altarpi Señorpaj ruphachisqa kanampaj.

²³ Qanlla sonqoykimanta qonki torota chayri carnerota ima. Chayqa mana imananchu jatun chakiyojpis kachun, juch'uy chakiyojpis kachun. Sichus imatapis qosaj nerqanki chaymanta qonki chay uywata jina chayqa, mana chaytaqa Señor jap'isonqachu.

²⁴ Nillataj Señormanqa qonaykichejchu tiyan compañerosnin nanasqasta, kapasqasta, imasnin sik'isqasta, chayri imasnin khuchusqasta. Chaykunastaqa amapuni qoyta yachaychejchu jallp'aykichejpi.

²⁵ Karu llajtayojkunamantapis ama jap'iychejchu chay jina uywasta Señorman qosqankuta, imaraykuchus chay uywasqa mana allinkunachu kanku, chaykunata Señorqa mana jap'isonqachejchu.

Señorman qosqa uywasta imaynatachus wañuchinankumanta

^26-27 Señorqa Moisesman kay jinata parlarqa: Uj torillo, cordero, chivitopis nacekuspaqa qanchis diata mamanwan kanqa. Pusaj dianmantataj Señormanqa qoyta atinku rikuchiku ofrendata ruphachisqa kanampaj.

²⁸ Ama uj diallapi ñak'ankichu wakata, ovejata uñantawan khuska.

²⁹ Señorman graciasta qoy rikuchikuta apamunki chayqa, allinta ruwanki chay ofrenda allin jap'isqa kanampaj.

³⁰ Chantapis chay kikin diapi mikhunki, q'ayantimpajqa ama puchuchinkichu. Noqamin Señorqa kani.

³¹ Tukuy kamachisqasniyta kasuychej, junt'aychejtaj. Noqamin Señorqa kani.

^32-33 Ama llimphu sutiyta p'enqaypi qhawachinkichejchu, imaraykuchus ajinamanta noqaqa israelitaspa chaupimpi jatunchasqa kasaj. Noqamin Señorqa kani, pichus t'aqarqaykichej chay, Diosniykichej kanampaj Egipto jallp'amanta orqhomusorqachej, chay. Noqamin Señorqa kani.