Levítico 21 - Qheshwa Biblia DC

Sacerdotes imaynachus kanankumanta

¹ Moisesman Señorqa parlarqa: Aarompa miraynin sacerdotesman niy: Ama ch'ichipaj qhawasqas kachunkuchu, mayqen ayllusninkoj ayasninraykupis.

^2-3 Sacerdoteqa chimpayta atin mamampaman, tatampaman, chayri wawasnimpa ayanman, chayri wauqempaman; chayri sapallanraj kaj panan kaj wañupojtin. Payqa payllawanraj tiyakun mana casarakunrajchu. Chaykunaraykoqa sacerdotesqa atillanku mana llimphupaj qhawasqas kayta.

⁴ Chanta mayqellampis ayllunmanta wañupojtenqa mana chimpayta atinchu, ama ch'ichipaj qhawasqa kanampaj.

⁵ Ama chujchasninkuta uj cheqallata k'utuchikuspa p'ajlayachenqankuchu, nitaj sunkhasninkutapis rasphachikonqankuchu, nillataj ukhusninkutapis k'irinchakonqankuchu.

⁶ Manachayqa Diosninkupaj llimphuchasqas kachunku, Diosninkoj sutinta ama p'enqaypi qhawachichunkuchu; imaraykuchus paykuna rikuchikusta ruphachispa jaywanku. Jinallataj Señorpaj nisqa t'antatapis Diosman jaywanku, chayrayku llimphuchasqapuni kachunku.

⁷ Chantapis ama mana allin puriyniyoj warmiwan casarachunkuchu, ni qharispa imanasqan warmiwan, nitaj saqerpayasqa kaj warmiwan; imaraykuchus sacerdotesqa Señorpaj llimphuchasqas kanku.

⁸ Chayrayku paykunaqa tukuy imamanta karunchasqas kachunku, imaraykuchus paykunaqa rikuchiku t'antata Diosniykiman jaywanku. Qampajqa santos kanqanku, imaraykuchus noqa Señorqa santopuni kani, pichus qankunatapis paykunatataj santoyachini.

⁹ Sichus uj sacerdotej warmi wawan mana allin puriyniyoj warmiman tukunman chayqa, tatanta p'enqaypi rikhurichin, kausashajta ruphachichunku.

¹⁰ Sacerdotespa kurajninku ajllasqa aceitewan umampi jawisqa, payqa sacerdote p'achasta churakunampaj t'aqasqa. Umanta ama q'ara umakonqachu, nitaj p'achasnintapis llik'irakonqachu llakisqa kasqanta rikuchinampaj.

¹¹ Nitaj maypichus aya kashan chayman yaykonqachu, ni tatanrayku, nitaj mamanrayku, ama ajinamanta ch'ichipaj qhawasqa rikhurinampaj.

¹² Diosnimpa tiyakunanmanta mana llojsinanchu tiyan, nitaj p'enqaypi rikhurichenqachu chay maypichus kashan chayta. Paypa umampi churasqa kashan Diospaj ajllana jawina aceite. Noqamin Señorqa kani.

¹³ Sacerdoteqa manaraj qharita rejsej warmiwan casaranqa.

^14-15 Uj viuda warmiwanqa ni ima kashajtin casaranqachu, nitaj saqerpayasqawan, nitaj qharispa imanasqanña warmiwan, nillataj mana allin puriyniyoj warmiwampis. Manachayqa kanan tiyan paypa kikin ayllunmanta, mananarj qharita rejsej warmi, mirayninmanta kajkuna, ama ch'ichipaj qhawasqa kanankupaj. Noqa Señor payta llimphuchani.

Mana sacerdotes kayta atinankumanta

^16-17 Señorqa Moisesman kay jinata parlarqa: Aaronman niy: Kunanmanta qhepamanqa, mirayniykimanta kajkuna, mana mayqempis imanku imanasqa kajtenqa, Señorman qayllaspa, Diosniykej rikuchiku t'antanta jaywayta atenqachu.

^18-20 Cheqamanta ni mayqen qhari sichus iman imanasqa chayqa, ima oqharisqapis Señormanqa mana qayllayta atinchu. Kay jina: Ciego, cojo, senqan, chayri ningrin imanasqa, chakin p'akisqa, chayri makin p'akisqa, moqo wasa, chayri juch'uy moqo runa, ñawin imanasqa, sarnarara, chayri ukhusnimpi yuraj alqasniyoj, chayri compañeron nanasqa.

²¹ Aarompa mirayninmanta mana mayqempis, sichus ajina imallankupis mana allinchu kanman chayqa, Señorman qayllachiyta mana atinchu, Señorpaj rikuchiku ofrendasta ruphachipuspa. Chayrayku mana qayllachiyta atenqachu Diosnimpa rikuchiku t'antanta.

²² Chay Diospa t'antanmanta, may jina llimphuchasqamanta, Diospaj t'aqasqa imasmantapis mikhuyta atenqa.

²³ Tiyakunay wasita ama p'enqaypi qhawachinampajqa velo qayllaman, altar qayllamampis amapuni chimpanqachu. Noqamin Señorqa kani, pichus paykunata noqapaj t'aqarqani chay.

²⁴ Moisesqa ajinata willarqa Aaronman, wawasninman, tukuy israelitasmanwan.