Levítico 2 - Qheshwa Biblia DC

Ch'aki mikhuy rikuchiku

¹ Maypachachus mayqempis rikuchikuta ch'aki mikhuymanta Señorpaj apamunman chayqa, ñut'u jak'uta apamuchun. Chay jak'umanqa aceiteta jich'aykuchun, inciensotataj churaykuchun.

² Chaymantaqa aaronita sacerdotesman jaywachun. Ujnin kaj sacerdotetaj uj k'ispiña jak'uta, aceiteyoj tukuynin inciensota ima altarpi ruphachenqa yuyarikunapaj rikuchikuta jina. Chay ruphachispa jaywasqampa q'apaynenqa Señorpaj allin kanqa.

³ Chay rikuchikumanta puchoj jak'utaj Aarompaj wawasnimpajwan kanqa. Chay jak'oqa Señorpaj sumaj llimphuchasqa kanqa tukuy ruphachisqa rikuchikusmanta astawan.

⁴ Maypachachus hornopi chayasqa rikuchikuta apamunkiman chayqa, sumajnin ñut'u jak'umanta aceitewan ruwasqa mana levadurayoj t'antata apamunki, manachayri mana levadurayoj t'antaqa aceitewan jawisqa kachun.

⁵ Sichus paylapi chayasqa rikuchikuta apamunki chayqa, sumajnin kaj ñut'u jak'umanta mana levadurayojta aceitewan ñatusqata apamunki.

⁶ Chaymanta chhikan chhikanta t'unarachinki, chay patamantaj aceitewan chhalluykunki. Chayqa Señorpaj rikuchiku.

⁷ Sichus ch'aki mikhuykunamanta fierro mankapi chayasqa rikuchikuta apamunki chayqa, sumajnin kaj ñut'u jak'umanta aceitewan ñatusqata apamunki.

⁸ Ajinata chaykunamanta rikuchiku wakichisqaña kajtin Señorpa ñaupaqenman apamunki, sacerdotemantaj jaywanki. Paytaj altarman apanqa.

⁹ Chaypi sacerdoteqa uj pisita chay rikuchikumanta orqhospa ruphachenqa altar patapi, yuyarikunapaj rikuchikuta jina. Chay ruphachispa jaywasqampa q'apaynenqa Señorpaj allin kanqa.

¹⁰ Chay rikuchikumanta puchojqa sacerdotepaj kanqa. Chay rikuchikumanta puchojqa Señorpaj sumaj llimphuchasqa tukuy ruphachisqa rikuchikusmanta astawan. Chayqa Aarompaj miraynimpajwan kanqa.

¹¹ Chay tukuy ch'aki mikhuy rikuchikusmanqa amapuni levadurata churankichejchu, Señorman jaywamunaykichejpaj. Levadurayojta, chayri misk'iyoj kajtapis amapuni Señorpaj altar patapi ruphachimunkichejchu.

¹² Chay levadurata misk'itawanqa Señorman jaywayta atinkichej ñaupaj poqoykunata jina. Chaykunataqa ama altar patapi ruphachimunkichejchu Señorpaj allin q'apay jinataqa.

¹³ Señorman qonaykipaj chay tukuy rikuchikusman kachita churankipuni. Kacheqa runata yuyarichin Dioswan tratota ruwasqanta. Tukuy rikuchikusniykimanqa kachita churankipuni.

¹⁴ Ch'aki mikhuykunasta ñaupaj poqoykunasniykichejmanta Señorman rikuchikuta qojtiykichej, chay rikuchikoqa sumaj poqosqa espigasmanta kanan tiyan. Espigasta kankankichej, granostataj kutankichej.

¹⁵ Chay rikuchikuman aceiteta jich'aykunki, inciensotataj patanman churaykunki. Chayqa Señorpa ch'aki mikhuna rikuchiku.

¹⁶ Sacerdotetaj aceiteyoj kutasqa granota uj chhikanta Señorpaj ruphachenqa tukuy inciensotawan, yuyarikunapaj rikuchikuta jina.